ស៊ីរីវាយសម្រុកចូលយកក្រុងរ៉ាកាពីពួកអង្គការរដ្ឋអ៊ីស្លាម
នៅថ្ងៃអង្គារនេះ យុទ្ធជនអារ៉ាប និងគួដឌីស្ថាននៅស៊ីរី ដែលគាំទ្រឧបត្ថម្ភដោយសហរដ្ឋអាមេរិក បានបើកយុទ្ធនាការវាយសម្រុកចូលយកក្រុងរ៉ាកា Raqa។ ក្រុងដែលជាទីតាំង ដ៏សំខាន់របស់ពួកអង្គការរដ្ឋអ៊ីស្លាម នៅស៊ីរី។ សម្រាប់កងកម្លាំងប្រជាធិបតេយ្យស៊ីរី នេះជាយុទ្ធនាការផ្តាច់ព្រ័ត្រ ដើម្បីរំដោះក្រុង។
ចុះផ្សាយនៅថ្ងៃ៖
ស្តាប់ - ០២:១១
បន្ទាប់ពីបាន បើកប្រតិបត្តិការប្រយុទ្ធទ្រង់ទ្រាយធំ កម្ចាត់ពួកអង្គការរដ្ឋអ៊ីស្លាម រុលបន្តិចម្តង ក្នុងតំបន់ដ៏ល្វឹងល្វើយ ទម្រាំមកដល់និងឡោមព័ទ្ធក្រុងរ៉ាកានេះបាន ដោយបានចំណាយពេលអស់៧ខែ កងកម្លាំងទ័ពប្រជាធិបតេយ្យស៊ីរី បានប្រកាស នៅព្រលឹមថ្ងៃអង្គារ វាយសម្រុកចូលរំដោះរ៉ាកា និងបានអំពាវនាវឱ្យជនស៊ីវិលទាំងអស់ ដកខ្លួនឱ្យឆ្ងាយពីទីតាំងរបស់ពួកអង្គការរដ្ឋអ៊ីស្លាម។
បើតាមអង្គការក្រៅរដ្ឋាភិបាល កងកម្លាំងប្រជាធិបតេយ្យស៊ីរី ដែលរួមមានយុទ្ធជនអារ៉ាបនិងគួដឌីស្ថាន និងដែលមានជំនួយអាវុធ ព្រមទាំងទឹប្រឹក្សាប្រយុទ្ធលើសមរភូមិថ្មើរជើងពីសម្ព័ន្ធអន្តរជាតិ ដឹកនាំដោយសហរដ្ឋអាមេរិកបានសម្រុកចូលក្រុងតាមទិសខាងកើត។ ហើយការប្រយុទ្ធគ្នាក៏សភាពហិង្សាខ្លាំងនៅភាគខាងកើតនិងជើង ព្រមទាំងភាគខាងលិច។
សម្ព័ន្ធអន្តរជាតិបានបើកការវាយប្រហារផ្លូវអាកាសអស់ពេញមួយយប់រួចហើយ ដើម្បីជាលក្ខណៈត្រៀមបើកផ្លូវឱ្យទ័ពជើងគោកនៅថ្ងៃនេះ។ នេះបើតាមការលម្អិតរបស់ក្រុមអ្នកសង្កេតការណ៍សិទ្ធិមនុស្សស៊ីរី។ យន្តហោះរុស្ស៊ី ក៏បានធ្វើការវាយប្រហារតាមផ្លូវអាកាសដែរលើរាលក្បួនរថយន្តអង្គការរដ្ឋអ៊ីស្លាមណាដែលចាកចេញពីក្រុងរ៉ាកា។
សូមបញ្ជាក់ថា ក្រុងរ៉ាកា បានធ្លាក់ចូលក្នុងកណ្តាប់ដៃ ពួកអង្គការរដ្ឋអ៊ីស្លាម នៅឆ្នាំ២០១៤ ឆ្នាំដែលអង្គការនេះបានស្វ័យប្រកាសបង្កើតរដ្ឋកាលីហ្វា។ រ៉ាកា មានប្រជាជនរស់នៅប្រមាណ៣០ម៉ឺននាក់ ក្នុងនោះ ៨ម៉ឺននាក់ជាភៀសខ្លួនពីសង្គ្រាមមកពីតំបន់ផ្សេង។
អង្គការសហប្រជាជាតិបានសម្តែងការព្រួយបារម្ភយ៉ាងខ្លាំងចំពោះសុវត្ថិភាពជនស៊ីវិល ដោយរាប់ឃើញ ក្នុងមួយថ្ងៃៗ មានជនភៀសខ្លួនប្រមាណ៨០០នាក់ក្នុងកំពុងនាំសម្រុកចាកចេញពីក្រុងរ៉ាកាមកកាន់ជំរំមនុស្សធម៌ នៅចម្ងាយប្រមាណ៣០គីឡូម៉ែត្រពីភាគខាងជើងក្រុង។
ថ្វីបើពួកអង្គការរដ្ឋអ៊ីស្លាមហាក់ដូចបរាជ័យលើសមរភូមិមែន ប៉ុន្តែពួកជីហាតជ្រុលនិយមនេះនៅតែអាចបន្តធ្វើភេរវកម្មមរណៈជាច្រើននៅស៊ីរី និងអ៊ីរ៉ាក់ឬដល់ក្រៅតំបន់ដូចជានៅអង់គ្លេសកាលពីពេលថ្មីៗ។ មិនតែប៉ុណ្ណោះពួកនេះនៅបន្តកាន់កាប់តំបន់ជាច្រើនរបស់ស៊ីរី ដូចភាគខាងត្បូងខេត្តរ៉ាកា និងខេត្តDier Ezzor ដែលសម្បូរប្រេងកាត តំបន់ភាគកណ្តាលប្រទេស និងតិចតួចនៅខេត្តក្រុងជាច្រើនផ្សេងទៀតរាប់ទាំង ក្រុងអាឡិប(ភាគខាងជើង) និងក្រុងដាម៉ាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ