កងទ័ពអ៊ីរ៉ាក់ត្រៀមវាយលុកនៅលើព្រលានយន្តហោះក្រុង Mossoul
កងទ័ពអ៊ីរ៉ាក់ប្រុងប្រៀបខ្លួនដើម្បីវាយលុកនៅលើប្រលានយន្តហោះក្រុងMossoul តាមផ្លូវចូលផ្នែកខាងលិចក្រុង Mossoul ។ ទីនោះហើយ គឺជាបន្ទាយធំចុងក្រោយរបស់ក្រុមប្រដាប់អាវុធជីហាតនៃអង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
កងទ័ពអ៊ីរ៉ាក់ដោយមានជំនួយពីកងទ័ពសម្ព័ន្តមិត្តក្រោមបញ្ជាការរបស់អាមេរិក បានពង្រឹងតួនាទីរបស់ខ្លួនថែមទៀតនៅថ្ងៃពុធម្សិលមិញ ៤ថ្ងៃបន្ទាប់ពីការបើកប្រតិបត្តិការវាយលុកទៅលើក្រុងMossoulដ៏ចំណាស់នៅភាគខាងលិចរួចមក។
ម្យ៉ាងទៀត គោលដៅទីមួយរបស់កងទ័ពអ៊ីរ៉ាក់ គឺការវាយយកព្រលានយន្តហោះដែលបោះបង់ចោលនិងអតីតមូលដ្ឋានយោធាមួយដែលស្ថិតនៅជាប់គ្នានោះ។ ការគ្រប់គ្រងរបស់ទ័ពអ៊ីរ៉ាក់នឹងបើកផ្លូវដល់ពួកគេក្នុងប្រតិបត្តិការវាយលុកបន្ថែមទៀតទៅលើតំបន់នានាដែលស្ថិតនៅជុំវិញភាគខាងត្បូងជាប់ច្រាំងទន្លេ Tigre ។ ទន្លេ ដែលកាត់ក្រុង Mossoul ជាពីរផ្នែក។
តាំងពីថ្ងៃអាទិត្យមុនម្ល៉េះ កងទ័ពអ៊ីរ៉ាក់ បានវាយដណ្តើមយកបានប៉ុស្តិ៍ត្រួតពិនិត្យដ៏សំខាន់មួយនៅលើដងផ្លូវហាយវ៉េដែលតភ្ជាប់ទីក្រុងបាកដាតទៅក្រុង Mossoul ក៏ព្រមទាំងភូមិមួយដែលស្ថិតនៅក្បែរព្រលានយន្តហោះភាគខាងត្បូងក្រុង Mossoul។
រីឯ ក្បួនរថយន្តកងទ័ពអាមេរិកវិញ នៅថ្ងៃពុធម្សិលមិញ បានបើកតម្រង់ទៅកាន់តំបន់នោះដែរ នេះបើយោងតាមការអះអាងរបស់អ្នកកាសែតរបស់ទីភ្នាក់ងារសារព័ត៌មានបារាំង AFP។ ការវាយរុលទៅមុខជាលំដាប់របស់កងទ័ពអ៊ីរ៉ាក់និងសម្ព័ន្ធមិត្តក្នុងរយៈពេលប៉ុន្មានថ្ងៃចុងក្រោយនេះ បានអនុញ្ញាតឲ្យប្រជាជនស៊ីវីលអ៊ីរ៉ាក់ជាច្រើនរយនាក់ អាចរត់ភៀសខ្លួនចេញពីភូមិនានាដែលកងទ័ពអ៊ីរ៉ាក់ បានវាយដណ្តើមបានពីពួកជីហាត។ ចំណែកប្រជាជនភៀសខ្លួនប្រមាណជា៤៨០នាក់ ត្រូវបានកងទ័ពដឹកបញ្ជូនទៅកាន់តំបន់រំដោះនានានៅភាគខាងត្បូងប្រទេសអ៊ីរ៉ាក់ដែរ។
កងទ័ពអ៊ីរ៉ាក់ ជាបន្ទាប់មកទៀតនឹងត្រូវធ្វើប្រតិបត្តិការប្រឈមមុខជាមួយពួកប្រដាប់អាវុធជីហាតដែលលាក់ខ្លួននៅតាមកូនផ្លូវតូចៗក្នុងទីក្រុងចំណាស់ Mossoul នៅលើច្រាំងខាងលិច ។ ហើយយោងតាមអ្នកទទួលខុសត្រូវផ្នែកស៊ើបការណ៍របស់អាមេរិកមួយរូបបានឲ្យដឹងថា ពួកជីហាតប្រដាប់អាវុធ មាននៅសេសសល់តែប្រមាណ២០០០នាក់ប៉ុណ្ណោះនៅក្នុងតំបន់នោះ។ ពួកជីហាតដែលនៅមុនការវាយលុកលើកតំបូងនៅថ្ងៃទី១៧តុលា មានគ្នាប្រមាណពី៥០០០នាក់ទៅ៧០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ