ប្រទេសកាតាបានផ្តើមគិតគូរធ្វើកំណែទម្រង់លើច្បាប់ការងារសម្រាប់ពលករបរទេស
ចុះផ្សាយនៅថ្ងៃ៖
ស្តាប់ - ០៤:៣៤
នៅក្នុងប្រទេសកាតា រដ្ឋាភិបាលបានផ្តើមគិតគូរធ្វើកំណែទម្រង់ច្បាប់ការងារដ៏ចម្រូងចម្រាសសម្រាប់ពលករបរទេសដែលគេហៅថាច្បាប់ « កាហ្វាឡា »។ សូមជម្រាបជូនថាបច្ចុប្បន្ននេះ មានពលករបរទេសជាង ២៥ម៉ឺននាក់ ពិសេសមកពីទ្វីបអាស៊ីកំពុងធ្វើការនៅក្នុងប្រទេសកាតា។ តែច្បាប់ និងលក្ខខណ្ឌការងារសព្វថ្ងៃសម្រាប់ពលករបរទេសកំពុងបន្តទទួលរងការរិះគន់យ៉ាងខ្លាំងពីក្រុមអង្គការសិទ្ធិមនុស្ស និងអង្គការក្រៅរដ្ឋាភិបាល។
អ្វីដែលកាតាចង់បាននៅក្នុងគម្រោងកំណែទម្រង់ច្បាប់ការងារសម្រាប់ពលករបរទេសពេលនេះ គឺលុបចោលទាំងស្រុងនូវច្បាប់ « កាហ្វាឡា » ដ៏ចម្រូងចម្រាសដោយដាក់ច្បាប់ថ្មីផ្អែកលើយន្តការកិច្ចសន្យាជំនួសវិញ។ នេះជាគម្រោងកំណែទម្រង់ច្បាប់ការងារដ៏ធំសម្រាប់ពលករបរទេសដែលកាតាមិនធ្លាប់បានធ្វើទេនាពេលកន្លងមក។ តែគេនៅមិនទាន់ដឹងថា តើច្បាប់ការងារថ្មីនោះនឹងចប់សព្វគ្រប់នៅពេលណា និងអាចផ្តើមអនុវត្តន៍ចាប់ពីពេលណាទៅទេ។ យ៉ាងណាក៏ដោយ នេះពិតជាដំណឹងមួយល្អណាស់សម្រាប់ពលករបរទេសទាំងជាង ២៥ម៉ឺននាក់ដែលកំពុងបំពេញការងារនៅក្នុងទឹកដីអារ៉ាប់អ្នកមានមួយនេះ។
សូមជម្រាបជូនថា តាំងពីប្រទេសកាតាទទួលបានសិទ្ធិធ្វើជាម្ចាស់ផ្ទះរៀបចំការប្រកួតកីឡាបាល់ទាត់ពិភពលោកនាឆ្នាំ ២០២២ មក រដ្ឋាភិបាលទីក្រុងដូហាត្រូវការកម្លាំងពលករបរទេសយ៉ាងច្រើនដើម្បីសាងសង់ពហុកីឡាដ្ឋានថ្មី និងរៀបចំហេដ្ឋារចនាសម្ព័ន្ធថ្មីឡើងវិញ។ តែបញ្ហានៅត្រង់ថា ច្បាប់ការងារសព្វថ្ងៃសម្រាប់ពលករបរទេសហៅច្បាប់ « កាហ្វាឡា » បាន និងកំពុងបន្តក្លាយជាផ្ទាំងស៊ីបនៃការរិះគន់ និងការវាយប្រហារពីសំណាក់ក្រុមអង្គការសិទ្ធិមនុស្ស និងអង្គការក្រៅរដ្ឋាភិបាលជាច្រើន។ ក្រុមអង្គការសិទ្ធិមនុស្សបានប្រដូចច្បាប់ « កាហ្វាឡា » ទៅនឹងទាសភាពសម័យទំនើបដែលធ្វើឲ្យពលករបរទេសទាំងនោះប្រឈមនឹងភាពងាយរងគ្រោះ។
ច្បាប់ « កាហ្វាឡា » បានអនុញ្ញាតឲ្យថៅកែមានសិទ្ធិពេញទីក្នុងការហាមឃាត់ពលករមិនឲ្យទៅបម្រើការនៅកន្លែងផ្សេង ឬដកហូតលិខិតឆ្លងដែនរបស់ពលករមិនឲ្យចាកចេញពីប្រទេសជាដើម។ ជាមួយនឹងច្បាប់ « កាហ្វាឡា » ពលករបរទេសគ្រប់រូបដែលចង់ប្តូរការងារថ្មី ឬមួយក៏ចង់វិលត្រឡប់ទៅស្រុកកំណើតវិញ ចាំបាច់ត្រូវតែស្គាល់ក្រុមហ៊ុន ឬពលរដ្ឋកាតាណាម្នាក់នៅកាតាចេញមុខធានា និងមានការអនុញ្ញាតពីក្រុមហ៊ុន ឬពលរដ្ឋកាតារូបនោះ។ តែច្បាប់ការងារថ្មីដែលផ្អែកលើយន្តការកិច្ចសន្យានឹងផ្តល់ការធានាបន្ថែមលើពលករបរទេស ពិសេសផ្តល់លទ្ធភាព និងសិទ្ធិសេរីភាពក្នុងការជជែកតវ៉ាផ្ទាល់ជាមួយថៅកែ។
ជាការពិត ការចង់បានរបស់ពលករបរទេសដែលកំពុងធ្វើការនៅក្នុងប្រទេសកាតា គឺច្បាប់ការងារថ្មីដែលនឹងអនុញ្ញាតឲ្យពួកគេទទួលបានលក្ខខណ្ឌការងារថ្មី។ តែគេមិនត្រូវភ្លេចនិយាយទេថា បញ្ហាជាអាទិភាពរបស់ពួកគេនៅតែផ្តោតសំខាន់លើប្រាក់ខែ ពោលគឺគម្លាតរវាងចំនួនប្រាក់ខែដែលបានសន្យានៅមុនពេលដាក់ជើងជាន់ទឹកដីកាតា និងប្រាក់ខែដែលទទួលបានជាក់ស្តែងនៅពេលមកដល់ប្រទេសកាតា។ ពលករបរទេសដែលភាគច្រើនមកពីប្រទេសអាស៊ីក្រីក្រ ដូចយ៉ាងនេប៉ាល់ ឬបង់ក្លាដែសបានរអ៊ូរទាំថា ប្រាក់ខែដែលពួកគេទទួលបានពិតប្រាកដមិនសក្តិសមនឹងទម្ងន់ការងារដ៏លំបាក និងប្រកបដោយគ្រោះថ្នាក់ទេ។
ជាទូទៅ ប្រាក់ខែដែលសន្យាឲ្យជាង ៣០០ដុល្លារ តែជាក់ស្តែងទទួលបានតែពាក់កណ្តាលប៉ុណ្ណោះ។ ក្រៅពីជួបប្រទះនឹងគម្លាតរវាងប្រាក់ខែសន្យា និងប្រាក់ខែទទួលបានជាក់ស្តែង ពួកគេក៏ត្រូវប្រឈមនឹងការដែលថៅកែបើកប្រាក់ខែឲ្យមិនទៀងទាត់ដែរ។ ម្យ៉ាងទៀតមុននឹងអាចទទួលបានការងារធ្វើនៅក្នុងប្រទេសកាតា មានពលករខ្លះបានបង់ប្រាក់ឲ្យទីភ្នាក់ងារក្នុងស្រុករបស់ខ្លួនជាង ៨ ០០០ដុល្លារ។ គឺជាទឹកប្រាក់ដ៏ច្រើនសម្បើមដែលពលកររូបនោះត្រូវខ្ចីលុយគេ និងសន្យាសន្សំលុយនៅកាតាដើម្បីសងវិញ។ បើរូបពលករនោះនៅលីវមិនសូវជាចំណោតទេ តែសម្រាប់ពលករជាមេគ្រួសារវិញ ត្រូវសន្សំលុយដើម្បីសងគេផង និងចិញ្ចឹមគ្រួសារនៅស្រុកកំណើតផង។
តាមរបាយការណ៍មួយក្រោមចំណងជើងថា « រូបភាពនៃក្រុមជនអន្តោប្រវេសន៍តម្លៃថោកនៅកាតាសព្វថ្ងៃ » ឲ្យដឹងថា មានពលករបរទេសដល់ទៅ ២១% ត្រូវបានថៅកែបើកប្រាក់ខែឲ្យមិនទៀងពេលទេ។ ថ្មីៗកន្លងទៅ រដ្ឋាភិបាលកាតាក៏ធ្លាប់បានអនុម័តច្បាប់មួយផាកពិន័យថៅកែជាប្រាក់ និងដាក់គុកពីបទយឺតយ៉ាវក្នុងការបើកប្រាក់ខែឲ្យពលករបរទេសរបស់ខ្លួន។ តែរហូតមកដល់ពេលនេះ គេនៅមិនទាន់ឃើញមានការដាក់ទោសលើថៅកែណាមួយចំពោះបញ្ហានេះទេ។ ជាថ្មីម្តងទៀត ពលករបរទេសសង្ឃឹមថា គម្រោងបង្កើតច្បាប់ការងារថ្មីដោយផ្អែកលើយន្តការកិច្ចសន្យានឹងជួយការពារពួកគេ ពិសេសធានាសន្តិសុខរឿងប្រាក់ខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ