អ៊ីស្រាអែលប្រកាសព្យួរកិច្ចសហប្រតិបត្តិការជាមួយអង្គការយូណេស្កូ
ចុះផ្សាយនៅថ្ងៃ៖
ស្តាប់ - ០៦:២៩
បន្ទាប់ពីការប្រកាសរបស់ជប៉ុនផ្អាកការបង់ប្រាក់វិភាគទានឱ្យអង្គការយូណេស្កូ អ៊ីស្រាអែលបានសម្រេចព្យួរកិច្ចសហប្រតិបត្តិការ តែម្តងជាមួយស្ថាប័នអង្គការសហប្រជាជាតិទទួលបន្ទុកផ្នែកវប្បធម៌និងអប់រំ យូណេស្កូ។ សេចក្តីសម្រេចចិត្តរបស់អ៊ីស្រាអែល គឺជាផលវិបាកនៃការបោះឆ្នោតអនុម័ត លើគម្រោងសេចក្តីសម្រេចពីរ ទាក់ទងនឹងក្រុងហ្សេរ៉ុយសាឡិម កាលពីថ្ងៃព្រហស្បតិ៍។ គម្រោងអត្ថបទដែលបដិសេធចំណងជាប្រវត្តិសាស្ត្រពាន់ឆ្នាំរបស់អ៊ីស្រាអែលនិងហ្សេរ៉ុយសាឡិម។ នេះបើតាមការបរិហាររបស់អ៊ីស្រាអែល។
ដោយជាក់ស្តែង គ្មានតំណាងអ៊ីស្រាអែលណាម្នាក់ នឹងត្រូវចូលជួបចរចា និយាយស្តីជាមួយតំណាងរបស់អង្គការ- អ៊ីស្រាអែលនឹងគ្មានវត្តមាននៅក្នុងជំនួបប្រជុំ ឬសន្និសីទរបស់រៀបចំដោយយូណេស្កូទេ បើគ្មានបញ្ជាថ្មី។
នាយករដ្ឋមន្ត្រីអ៊ីស្រាអែល លោក នេតាន់យ៉ាហ៊ូ បានរិះគន់សេចក្តីសម្រេចរបស់យូណេស្កូថា អង្គការកំពុងបាត់បង់ភាពស្របច្បាប់ដ៏តិចខ្លួនស្រាប់របស់ខ្លួនហើយ។ សម្រាប់លោកនាយករដ្ឋមន្ត្រី គម្រោងសេចក្តីសម្រេចចិត្តដែលយូណេស្កូទើបអនុម័តនេះ មានន័យស្មើនឹងការមិនទទួលស្គាល់ថា អ៊ីស្រាអែលមានប្រវត្តិសាស្ត្រចងនឹងទឹកដីសក្តិសិទ្ធហ្សេរ៉ុយសាឡិម (ជញ្ជាំង Lamentations)។ មិនទទួលស្គាល់ចំណងនេះ ប្រៀបដូចគេមិនទទួលចំណងរវាងប្រទេសចិននិងកំផែងយ៉ាងដូច្នោះ។ បើតាមប្រធានសភាអ៊ីស្រាអែល ប្រសិនបើជនជាតិអ៊ីស្រាអែលគ្មានចំណងនឹងទឹកដីសក្តិសិទ្ធហ្សេរ៉ុយសាឡិមទេ នោះមានន័យថាយូណេស្កូនិងអង្គការសហប្រជាជាតិក៏គ្មានចំណងនឹងប្រវត្តិសាស្ត្រនិងការពិត។
គម្រោងសេចក្តីសម្រេចចិត្តស្តីពីប៉ាឡេស្ទីន
គម្រោងសេចក្តីសម្រេចចិត្តពីរត្រូវបានអនុម័តកាលពីថ្ងៃព្រហស្បតិ៍ដោយសំឡេង ២៤គាំទ្រ ២៨អនុប្បវាទ (មួយសំឡេងជារបស់បារាំង) និង៦ប្រឆាំង (មួយសំឡេងជារបស់សហរដ្ឋអាមេរិក)។ គម្រោងអត្ថបទនេះ នឹងត្រូវបញ្ចូនទៅឱ្យក្រុមប្រឹក្សាប្រតិបត្តិឬ ក្រុមប្រឹក្សារដ្ឋបាលរបស់យូណេស្កូទាំង៥៨ប្រទេស អនុម័តសម្រេច នាឱកាសសម័យប្រជុំពេញអង្គ នៅថ្ងៃអង្គារទី ១៨តុលា។ ប៉ុន្តែដោយហេតុតែមានការប្រឆាំងពីអ៊ីស្រាអែល ការបោះឆ្នោតសម្រេចចុងក្រោយ ទំនងជានឹងត្រូវលើកពេលទៅថ្ងៃក្រោយវិញ ដើម្បីផ្តល់សំណាងដល់ការចរចា។
គម្រោងសេចក្តីសម្រេចទាំងពីរ ស្តីពីប៉ាឡេស្ទីនក្រោមការកាន់កាប់របស់អ៊ីស្រាអែល ស្នើឡើងដោយក្រុមប្រទេសអារ៉ាប៧ប្រទេស (អាល់ហ្សេរី អេហ្ស៊ីប លីបង់ ម៉ារ៉ុក អូម៉ង់ ការតា និងស៊ូដង់) ដើម្បីការពារនិងថែរក្សា បេតិកភ័ណ្ឌវប្បធម៌ប៉ាឡេស្ទីន និងលក្ខណៈពិសេសរបស់ហ្សេរ៉ុយសាឡិមខាងកើត។ បែក ដែលប៉ាឡេស្ទីនចង់យកមកធ្វើជារដ្ឋធានី នៅពេលបានក្លាយជារដ្ឋឯករាជ្យពេញលេញ និងដែលក្លាយជាចំណុចខ្ចាស់ការចរចាសន្តិភាពអ៊ីស្រាអែលប៉ាឡេស្ទីនរហូតមក។
គម្រោងសេចក្តីសម្រេចបានថ្កោលទោសសកម្មភាពឈ្លានពានរបស់អ៊ីស្រាអែល ឬការដាក់កំហិតពីសំណាក់អាជ្ញាធរអ៊ីស្រាអែលមិនឱ្យអ្នកកាន់សាសនាអ៊ីស្លាមអាចចេញចូលដោយសេរី ទៅកាន់ទីលាននិងវិហារដ៏សក្តិសិទ្ធិ ទីបីនៃសាសនាអ៊ីស្លាម នៅហ្សេរ៉ុយសាឡិមខាងកើតនេះ។ ហ្សេរ៉ុយសាឡិមខាងកើត ដែលក៏មានតាំងនៅវិហារភ្នំដ៏សក្តិសិទ្ធិ Mont du Temps របស់សាសនាយូដា ប្រកាន់ភ្ជាប់និងគោរពដោយអ៊ីស្រាអែល ដែលត្រូវបានពួករ៉ូម៉ាំងកម្ទេចនៅគ្រិស្តសករាជ ទី ៧០។ ប៉ុន្តែនៅក្នុងគម្រោងសេចក្តីសម្រេចនោះ គ្មានឃ្លាប្រយោគណា មានន័យ មានខ្លឹមសារ បញ្ជាក់ពីចំណងជាប្រវត្តិសាស្ត្ររវាងជនជាតិជ្វីហ្វ និងទឹកដីសក្តិសិទ្ធិក្នុងសាសនាយូដាសោះ គេឃើញមានប្រើពាក្យតែមួយ គឺវិហារអ៊ីស្លាមជាភាសាអារ៉ាប អាល់ប៊ូរាក។
ហ្សេរ៉ុយសាឡិមខាងកើត ទឹកដីសក្តិសិទ្ធិ នៃបីសាសនា
នៅលើទឹកដីសក្តិសិទ្ធិនេះ ហ្សេរ៉ុយសាឡិមខាងកើតនេះ ជាប្រជុំនេះសាសនាបី។ មួយចំណែកមានវិហារអ៊ីស្លាម អាល់ប៊ូរ៉ាក់ ជាទីសក្ការៈរបស់អ្នកកាន់សាសនាអ៊ីស្លាម- របស់ពលរដ្ឋប៉ាឡេស្ទីន មួយចំណែកទៀត មានទីសក្ការៈរបស់អ្នកកាន់សាសនាយូដា តាមរយៈជញ្ជាំងដ៏សក្តិសិទ្ធិ Lamentations។ ហើយទឹកដីមួយដុំនេះ ក៏ជាកន្លែងកំណើតនៃសាសនាគ្រិស្តដែរ។
លោកស្រីអគ្គនាយកអង្គការយូណេស្កូ ដែលមិនបង្ហាញជំហរចំពោះគម្រោងសេចក្តីសម្រេចនេះ បានធានាអះអាងតាមរយៈសេចក្តីថ្លែងការណ៍ថា បេតិកភណ្ឌហ្សេរ៉ុយសាឡិម មិនអាចបែងចែងបានឡើយ សហគមន៍នីមួយៗត្រូវតែមានសិទ្ធិទទួលបាននូវការទទួលស្គាល់ប្រវត្តិសាស្ត្រនិងចំណងរបស់សហគមន៍ខ្លួនទៅនឹងក្រុងនេះ ដោយច្បាស់លាស់។ ការខ្ទាស់ ឬការចង់លុបបំបាត់ប្រពៃណីណាមួយ មិនថាយូដា គ្រិស្ត ឬអ៊ីស្លាមទេ គឺជាការបំផ្លាញបេតិកភណ្ឌ។
តាមការពិតនៅក្នុងគម្រោងសេចក្តីសម្រេចរបស់យូណេស្កូ អនុម័តកាលពីថ្ងៃព្រហស្បតិ៍កន្លងទៅនេះក៏មានបញ្ជាក់អំពីលក្ខណៈសំខាន់នៃក្រុងហ្សេរ៉ុយសាឡិមថាជាទឹកដីសក្តិសិទ្ធិនៃសាសនាបីដែរ ប៉ុន្តែមិនគ្រប់គ្រាន់ឡើយសម្រាប់ក្រសែភ្នែកអ៊ីស្រាអែល ដែលតាំងពីឆ្នាំ១៩៦៧មក បានកាន់កាប់ក្រុងហ្សេរ៉ុយសាឡិមខាងកើត និងដាក់ឱ្យស្ថិតក្រោមអាណានិគមន៍កិច្ចអ៊ីស្រាអែលរហូតមក បើទោះបីអង្គការសហប្រជាជាតិចាត់ទុកជាទង្វើខុសច្បាប់ ក៏ដោយ។ ហើយបច្ចុប្បន្ននេះ មរតកប្រវត្តិសាស្ត្រមួយនេះស្ថិតក្រោមការគ្រប់គ្រងរដ្ឋបាលដោយហ្ស័កដានី ឯអ៊ីស្រាអែលជាត្រួតត្រាច្រកចេញចូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ