សម្ព័ន្ធយោធាអារ៉ាបទទួលស្គាល់ថាបាញ់ខុសត្រូវជនស៊ីវិលនៅយេម៉ែន
សម្ព័ន្ធយោធាអារ៉ាប ដែលចេញធ្វើអន្តរាគមន៍នៅយេម៉ែន បានទទួលស្គាល់កំហុសខ្លួននៅថ្ងៃនេះ ថាបានទម្លាក់គ្រាប់ ដោយច្រលំទិសដៅ កាលពីសប្តាហ៍មុន សម្លាប់មនុស្សអស់១៤០នាក់ ដែលកំពុងចូលរួមប្រារព្ធពិធីបុណ្យសព។ ការបាញ់ខុស ទៅផ្តាច់ជីវិតជនស៊ីវិល ដែលបានរងការរិះគន់ តាមប្រព័ន្ធអ៊ីនធ័រនែត ពេញពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
អារ៉ាប៊ីសាអ៊ូឌីត និងសម្ព័ន្ធមិត្ត ដែលផ្សំគ្នាជាសម្ព័ន្ធយោធាអារ៉ាប ដើម្បីគាំទ្រប្រធានាធិបតីយេម៉ែន លោក អាប់ រ៉ាប់បូ ម៉ង់សួរ ហាឌី ធ្លាប់រងការចោទប្រកាន់ ថាបានទម្លាក់គ្រាប់សម្លាប់ជនស៊ីវិល ពីមុនមក។ នៅថ្ងៃទី ៨ តុលាសប្តាហ៍មុននេះ ប្រតិបត្តិការផ្លូវអាកាសបានដៅទិសដៅវាយប្រហារ សាលប្រជុំធំមួយនៅក្រុងសាណា ត្រួតត្រាដោយពួកហ៊ូទិស្ស ដែលកំពុងរៀបចំពិធីបុណ្យសពមេដឹកនាំជាន់ខ្ពស់របស់ខ្លួន បង្កឱ្យមានស្លាប់១៤០នាក់ និងរបួស៥២៥នាក់។ នេះបើអង្គការសហប្រជាជាតិ។
ដំបូងឡើយ សម្ព័ន្ធយោធាអារ៉ាបបានបដិសេធទំនួលខុសត្រូវ តែក្រោយពីបើកការអង្កេត ទើបព្រមទទួលស្គាល់នៅថ្ងៃសៅរ៍នេះ ថាពិតជាបាញ់ដោយច្រលំ និងធ្វើឱ្យបាត់បង់ជីវិតពលរដ្ឋស៊ីវិល។ ទាំងនេះគឺដោយហេតុតែបានទទួលព័ត៌មានខុស មានអ្នកមិនគោរពវិធាន និងដំណើរការរបស់សម្ព័ន្ធយោធា។ បើតាមក្រុមអ្នកអង្កេត សម្ព័ន្ធអារ៉ាបបានបើកការទម្លាក់គ្រាប់បែកក្រោយពីបានទទួលព័ត៌មានមិនត្រឹមត្រូវពីក្រុមយោធារបស់ប្រធានាធិបតីយេម៉ែនលោក ហាឌី ថាមានអ្នកទទួលខុសត្រូវយោធាហ៊ូទិស្សជាច្រើនចូលរួមក្នុងពិធីបុណ្យសព។
សម្ព័ន្ធយោធាអារ៉ាបសន្យាដាក់ទោសអ្នកទទួលខុសត្រូវលើប្រតិបត្តិការនោះ និងផ្តល់សំណងដល់ជនរងគ្រោះ ព្រមទាំងសន្យាសើរើមើលកិច្ចសន្យាធ្វើប្រតិបត្តិការយោធានៅយេម៉ែននេះឡើងវិញ។ ការបាញ់ខុសនេះ បានជំរុញឱ្យសហរដ្ឋអាមេរិកសម្ព័ន្ធមិត្តរបស់អារ៉ាប៊ីសាអ៊ូឌីត ដកខ្លួនមកពិចារណាឡើងវិញ ការគាំទ្រសម្ព័ន្ធយោធាអារ៉ាបនៅយេម៉ែន ដែលសង្គ្រាមនេះបានសម្លាប់មនុស្សអស់៦៨៨៥នាក់ គិតចាប់ពីខែមីនា ២០១៥មក ក្នុងនោះជិងពាក់កណ្តាលជាជនស៊ីវិល។
ចំណែកអង្គការការពារសិទ្ធិមនុស្សHumain Rights Watch ទង្វើបាញ់ខុសនេះសឹងអាចចាត់ទុកជាឧក្រិដ្ឋកម្មសង្គ្រាម ព្រោះសម្ព័ន្ធយោធាអារ៉ាបប្រើកម្លាំងហួសប្រមាណ បាញ់លើពិធីបុណ្យសព ដែលនរណាក៏ដឹងថាមានជនស៊ីវិលចូលរួមច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ