មេបញ្ជាការចលនាអេស្បូឡាលីបង់ នៅស៊ីរី ស្លាប់ដោយសារស្នាដៃពួកជីហាត
ការស្លាប់របស់មេបញ្ជាការចលនាអេស្បូឡាលីបង់ Hezbollah ឈ្មោះ មូស្តាហ្វា បាដ្រឺឌីន Mostapha Badreddine នៅក្នុងហេតុការណ៍ផ្ទុះមួយ ក្បែរអាកាសយានដ្ឋាន ក្រុងដាម៉ាស បានបំផុសឱ្យមានការសង្ស័យ ចម្ងល់ ជាច្រើន ទាក់ទងនឹងកាលៈទេសៈនៃការស្លាប់ និងអំពីអំពីផលវិបាកនៃការបាត់បង់មេបញ្ជាការដ៏ខ្លាំងម្នាក់នេះ។ ទាំងនេះក៏ដោយសារតែភាពយឺតយ៉ាវខុសទម្លាប់ របស់ចលនាអេស្បូឡា ក្នុងការផ្តល់ព័ត៌មានជាសាធារណៈ អំពីដំណើរដើមហេតុនៃការផ្ទុះ។ ចលនាអេស្បូឡា ទើបបានចេញមុខធ្វើការចោទប្រកាន់ នៅថ្ងៃសៅរ៍នេះ ថាក្រុមជីហាតរដ្ឋអ៊ីស្លាមជ្រុលនិយម និកាយស៊ុននីត ជាអ្នកសម្លាប់មេបញ្ជាការរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០៤
គេត្រូវរង់ចាំដល់ជិត៣៦ម៉ោង ទើបឃើញចលនាអេស្បូឡា បង្ហើបអំពីដំណើរដើមហេតុនៃការធ្វើឃាត អគ្គមេបញ្ជាការរបស់ខ្លួន និងជាលើកទីមួយហើយ ដែលចលនាអេស្បូឡា មិនបានធ្វើការចោទប្រកាន់ភ្លាម អ៊ីស្រាអែល។
នៅក្នុងសេចក្តីថ្លែងការណ៍ដ៏ខ្លីមួយ ចលនាឈីអ៊ីតបានអះអាងថា ការផ្ទុះដែលបានផ្តាច់ជីវិតអគ្គមេបញ្ជាការមូស្តាហ្វា បាដដ្រឺឌីន បង្កឡើងដោយប្រតិបត្តិការបាញ់កាំភ្លើងធំរបស់ពួកជីហាត។ អេស្បូឡាសន្យានឹងយកឈ្នះពួកបនឧក្រិដ្ឋជននេះឱ្យបាន។
ប៉ុន្តែបើគេអានសារព័ត៌មានធំៗរបស់អ៊ីរ៉ង់ និងស៊ីរីទៅ គេឃើញមានសេចក្តីសន្និដ្ឋានចម្រូងចម្រាសគ្នាណាស់ និងបង្កើនឱ្យមានភាពមិនច្បាស់លាស់ច្រើន។
បើតាមប្រភពសន្តិសុខស៊ីរី កាលពីថ្ងៃម្សិលមិញ បានអះអាងថា សំឡេងផ្ទុះបានលាន់ឡើងនៅក្នុងយប់ថ្ងៃព្រហស្បតិ៍ឆ្លងចូលថ្ងៃសុក្រ ត្រង់ឃ្លាំងមួយក្បែរអាកាសយានដ្ឋានក្រុងដាម៉ាស និងដែលមូស្តាហ្វា បាដ្រឺឌីន នៅខាងក្នុង។ មុនការផ្ទុះ គេគ្មានឃើញមានយន្តហោះណាហោះលើមេឃទេ ហើយក៏គ្មាននរណាម្នាក់ដឹងថាអគ្គមេបញ្ជាការអេស្បូឡា មានវត្តមាននៅទីនោះដែរ។
អាកាសយានដ្ឋាន និងតំបន់ជាយក្រុង ជាសមរភូមិប្រយុទ្ធគ្នាយ៉ាងខ្លាំងរវាងកម្លាំងបក្សដិបក្ស។ ក្នុងចម្ងាយ១០គីឡូម៉ែត្រពីក្រុងដាម៉ាស កន្លែងកាន់កាប់ដោយពួកឈីអ៊ីត និងទាហានរដ្ឋាភិបាលស៊ីរី តែក្រុមអ៊ីរ៉ង់ និងអេស្បូឡា ក៏មានច្រើននៅទីនោះដែរ។ ទីតាំងពួកឧទ្ទាមនៅចម្ងាយ៧គីឡូម៉ែត្រពីគ្នា។ ស្ថានភាពបែបនេះ តម្រូវឱ្យមានការស៊ើបអង្កេតច្បាស់លាស់សិន ដើម្បីកុំឱ្យមានការសង្ស័យលើគ្នាកើតឡើងបាន។
មូស្តាហ្វា បាដ្រឺឌីន ជានរណា?
មានអាយុជាង៥០ឆ្នាំ និងមានកំណើតកើតជានៅភាគខាងត្បូងប្រទេសលីបង់ មូស្តាហ្វា បាដ្រឺឌីន បានចូលបម្រើយោធា កាន់អាវុធជាលើកដំបូងនៅក្នុងរង្វង់កងទ័ពហ្វាតាសប៉ាឡេស្ទីន។ ក្រោយការឈ្លានពានរបស់អ៊ីស្រាអែលលើលីបង់ នៅឆ្នាំ១៩៨២ មូស្តាហ្វា ក៏ទៅចូលរួមក្នុងចលនាអេស្បូឡា ដែលបង្កើតដោយអ៊ីរ៉ង់។
មូស្តាហ្វា បានធ្វើសកម្មភាពខុសច្បាប់ជាច្រើន និងជាភេរវជនដៃដល់ម្នាក់ ក្នុងភេរវកម្មប្រឆាំងនឹងស្ថានទូតអាមេរិក និងបារាំង នៅប្រទេសកូវ៉ែត កាលពីខែធ្នូឆ្នាំ១៩៨៣ ហើយក៏ត្រូវបានចាប់ខ្លួននៅពេលនោះ។ ចោរអាកាសបានចាប់បង្វែរទិសយន្តហោះកូវ៉ែតនិងក្រុមហ៊ុនអាមេរិក នៅឆ្នាំ១៩៨៥ ជាថ្នូរនឹងការដោះលែងមូស្តាហ្វា ដែលបានរួចពីគុក នៅពេលអ៊ីរ៉ាក់ចូលឈ្លានពានកូវ៉ែតនៅឆ្នាំ១៩៩០។
មូស្តាហ្វា ក៏ត្រូវបានតុលាការពិសេសដើម្បីលីបង់ ចោទប្រកាន់ និងកាត់ទោសដោយកំបាំងមុខ ពីបទ ដឹកនាំធ្វើឃាតកម្មប្រឆាំងនឹងអតីតនាយករដ្ឋមន្ត្រីលីបង់ លោក រ៉ាហ្វិក ហារីរី នៅឆ្នាំ២០០៥។
នៅពេលដែលមេដឹកនាំសន្តិសុខអេស្បូឡា អ៊ីម៉ាដ ម៉ូនីយ៉េ ត្រូវជាបងថ្លៃ បានស្លាប់ ក្នុងភេរវកម្មនៅក្រុងដាម៉ា ឆ្នាំ២០០៨ ម៉ូស្តាហ្វា ក៏បានឡើងកាន់តំណែងជាអគ្គមេបញ្ជាការជំនួស ហើយពេលចលនាឈីអ៊ីតនេះ លូកដៃចូលធ្វើសង្គ្រាមនៅស៊ីរី ម៉ូស្តាហ្វា ក៏បានធ្វើជាមេបញ្ជាការដឹកនាំប្រតិបត្តិការ។
តើអាចមានផលវិបាកអ្វីខ្លះ ក្រោយការស្លាប់អគ្គមេបញ្ជាការអេស្បូឡា ?
ចលនាអេស្បូឡា ជាសម្ព័ន្ធមិត្តអ៊ីរ៉ង់ និងកំពុងដើរតួនាទីយ៉ាងសំខាន់ជួយរដ្ឋាភិបាលស៊ីរី របស់លោក បាស្ហារ អាល់អាសាដ។ ប៉ុន្តែ អ្នកឯកទេសភាគច្រើន យល់ស្របគ្នាថា ការស្លាប់របស់មូស្តាហ្វា បាដ្រឺឌីននេះ ទំនងជាពុំសូវមានផលប៉ះពាល់អ្វីដល់ចលនាឈីអ៊ីតអេស្បូឡាឡើយ។ ថ្វីត្បិតតែមូស្តាហ្វាមានតួនាទីសំខាន់ ក្នុងប្រតិបត្តិការសម្ងាត់លើសមរភូមិដោយផ្ទាល់មែន តែអេស្បូឡាមានមេបញ្ជាការធំពីលើដ៏រឹងម៉ាំគឺ អ៊ីរ៉ង់។
ក្នុងនាមជាមនុស្សខ្លាំង ចាស់ទុំ ក្នុងក្រុម និមិត្តរូបនៃការស្លាប់របស់មេអាចប៉ះពាល់ដល់អារម្មណ៍ ដល់ផ្លូវចិត្តកូនចៅខ្លះមែន តែគ្មានផលវិបាកអ្វីដល់បក្ស ដល់កំរិតយោធាឡើយ។ នឹងមានការតែងតាំងមេបញ្ជាការថ្មីក្នុងពេលឆាប់ៗ។
ដូច្នេះក៏នឹងគ្មានឡើយ ការប្តូរផ្លាស់យុទ្ធសាស្ត្រឬនយោបាយ របស់ចលនាអេស្បូឡា នៅក្នុងប្រទេសស៊ីរី។ ការស្លាប់ជាហេតុផលពង្រឹងបន្ថែមផ្លូវដើររបស់ពួកគេ ដែលចាក់ស្រេះក្នុងខួរ ពីមេម្នាក់ទៅមេម្នាក់ ពីទុក្ករបុគ្គលមួយទៅទុក្ករមុគ្គលមួយ។ ម្យ៉ាងវិញទៀត បើតាមអ្នកឯកទេស អេស្បូឡានឹងត្រូវតែបន្តលូកដៃក្នុងសង្គ្រាមនៅស៊ីរីដដែល ព្រោះមានមូលហេតុបី ៖ ទីមួយ គឺសាមគ្គីភាពសហគមន៍ ទីពីរខ្លាចមានការគំរាមកំហែងជីហាត និងជាចុងក្រោយ មកពីអ៊ីស្រាអែល ជាសត្រូវសួរពូជ ក៏បានធ្វើលូកដៃធ្វើអន្តរាគមន៍ នៅស៊ីរី ប្រឆាំងដោយផ្ទាល់ នឹងចលនាអេស្បូឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ