វិបត្តិអ៊ីរ៉ង់-អារ៉ាប៊ីសាអូឌីត សម្ព័ន្ធអារ៉ាបកោះប្រជុំវិសាមញ្ញនៅក្រុងគែរ
នៅថ្ងៃអាទិត្យទី ១០មករានេះ សម្ព័ន្ធអារ៉ាបបានកោះប្រជុំវិសាមញ្ញមួយ នៅទីក្រុងគែរប្រទេសអេហ្ស៊ីប ដើម្បីពិចារណាអំពីវិបត្តិរវាងក្រុងរីយ៉ាដ និងតេហេរ៉ង់ ក្រោយហេតុការណ៍ប្រហារជីវិតប្រមុខចលនាប្រឆាំងឈីអ៊ីតនៅអារ៉ាប៊ីសាអូឌីត តែគាំទ្រខ្លាំងដោយអ៊ីរ៉ង់។ ក្រុងរីយ៉ាដបានស្នើរៀបចំជំនួបនេះ ក្នុងបំណងតែមួយគឺប្រមូលសំឡេងគាំទ្រ និងដាក់អ៊ីរ៉ង់ឱ្យកាន់តែឯកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ក្រោយពីការប្រហារជីវិតមេចលនាឈីអ៊ីតនៅអារ៉ាប៊ីសាអូឌីតមក សង្គ្រាមការទូតអ៊ីរ៉ង់ អារ៉ាប៊ីសាអូឌី បានផ្ទុះឡើងដូចលាជ។ រាជាណាចក្រអ៊ីស្លាមកាន់និកាយស៊ុននីត បានផ្តាច់ទូតជាមួយប្រទេសជិតខាងឈីអ៊ីតភ្លាម ព្រមទាំងអូសទាញប្រទេសកាន់និកាយស៊ុននីតផ្សេងទៀតក្នុងតំបន់ និងប្រទេសជិតខាងនៅអាហ្វ្រិកមួយចំនួន ឱ្យធ្វើតាម កាត់ ឬផ្អាកសកម្មភាពការទូតពាណិជ្ជកម្មជាមួយរបបសាធារណរដ្ឋអ៊ីស្លាមអ៊ីរ៉ង់ដែរ។
ជាផ្លូវការ ក្រុងរីយ៉ាដខឹងសម្បារនឹងក្រុងតេហេរ៉ង់ ដែលបានបណ្តោយឱ្យមានការវាយប្រហារស្ថានទូតអារ៉ាប៊ីសាអូឌីតនៅអ៊ីរ៉ង់។ ក្រុងរីយ៉ាងបរិហារសេចក្តីថ្លែងការណ៍ញុះញង់របស់ថ្នាក់នាំអ៊ីរ៉ង់ ជាក់ស្តែងប្រសាសន៍របស់អាយ៉ាតូលា ខាមេនី។ ប៉ុន្តែ នៅក្រោយសេចក្តីសម្រេចចិត្តទាំងអស់ មានលាក់ការពិត នូវកំហឹងដែលធ្លាប់ជាគូប្រជែងនឹងគ្នាទេ។
តាំងពីសាធារណរដ្ឋអ៊ីស្លាមអ៊ីរ៉ង់ វិលមកឡើងឆាកអន្តរជាតិ មានមុខមានមាត់ពេញលេញលើពិភពលោក ក្រោយពីបានចុះហត្ថលេខាលើកិច្ចព្រមព្រៀងនុយក្លេអ៊ែរជាមួយសហគមន៍អន្តរជាតិ ក្រោមសម្រែកអបអរជាទូទៅ ពីគ្រប់ជ្រុងនៃភពផែនដី លើកលែងតែអារ៉ាប៊ីសាអូឌីតមួយចេញ។ រីយ៉ាដពិតជាមិនអាចទទួលយកបានឡើយនៅពេលឃើញគូប្រជែងមានប្រៀបស្មើ ទើបស្វែងរកគ្រប់មធ្យោបាយដាក់ប្រទេសជិតខាងមួយនេះ ឱ្យបន្តនៅឯកាទៀត។ តាំងពីច្រើនសប្តាហ៍មកហើយ ដែលអារ៉ាប៊ីសាអូឌីត បានផ្តើមចងសម្ព័ន្ធមេត្រីភាព បង្កើតជាសម្ព័ន្ធក្រុមប្រទេសកាន់សាសនាអ៊ីស្លាមនិកាយស៊ុននីត។
ម្សិលមិញក្រុមប្រទេសជារាជាណាចក្រនៅតំបន់ឈូងសមុទ្ទពែក្ស និងនៅអាហ្វ្រិកខ្លះបានងាកមកការពារអារ៉ាប៊ីសាអូឌីត ថ្កោលទោសអ៊ីរ៉ង់ ! នៅថ្ងៃអាទិត្យនេះ សម្ព័ន្ធអារ៉ាបបានជួបប្រជុំវិសាមញ្ញ នៅអេហ្ស៊ីប ដើម្បីដោះស្រាយវិបត្តិអ៊ីរ៉ង់-អារ៉ាប៊ីសាអូឌីត ដោយបានបរិហារថាអ៊ីរ៉ង់បង្ករឿង។ តើនេះមិនមែនមានន័យថារបបរាជានិយមសាអូឌីត កំពុងចងសម្ព័ន្ធភាពថ្មីដើម្បីប្រឆាំងនឹងគូប្រជែងពីអតីតទេឬ ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ