ប្រជាជនអ៊ីរ៉ង់ធ្វើបាតុកម្មប្រឆាំងនឹងវិបត្តិសេដ្ឋកិច្ច ក្រោយការវិលមកវិញ នៃទណ្ឌកម្មរបស់អាមេរិក
នៅក្នុងប្រទេសអ៊ីរ៉ង់ ប៉ុន្មានថ្ងៃចុងក្រោយនេះ បាតុកម្មរបស់ប្រជាជន បានចាប់ផ្តើមកើតមាន នៅតាមទីក្រុងនានា ទូទាំងប្រទេស ដើម្បីប្រឆាំងនឹងវិបត្តិសេដ្ឋកិច្ច ដែលកាន់តែរួមរិតលំបាកទៅ ពីមួយថ្ងៃទៅមួយថ្ងៃ។ វិបត្តិសេដ្ឋកិច្ចដែលកាន់ធ្ងន់ធ្ងរ ជាមួយនឹងការវិលត្រលប់មកវិញ នៃទណ្ឌកម្មសេដ្ឋកិច្ច កំហិតដោយរដ្ឋាភិបាលសហរដ្ឋអាមេរិក។ ចាប់ពីថ្ងៃអាទិត្យ ទី៥ សីហាម្សិលមិញនេះ គឺជាថ្ងៃដាច់ឱសានុវាទ ដែលរដ្ឋាភិបាលសហរដ្ឋអាមេរិក បានដាក់កំហិតឲ្យក្រុមហ៊ុនបរទេស ដែលរកស៊ីនៅអ៊ីរ៉ង់ទាំងអស់ ត្រូវតែចាកចេញពីអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
៥ថ្ងៃជាប់គ្នាមកហើយ ដែលមានមនុស្សជួបជុំគ្នា ធ្វើបាតុកម្មត្រង់នេះបន្តិចត្រង់នោះបន្តិច នៅតាមទីក្រុងធំៗរបស់អ៊ីរ៉ង់ ដូចជានៅតេអេរ៉ង់ អ៊ីសប៉ាអង់ ឈីរ៉ាឆ និង ការ៉ាចជាដើម។ មូលហេតុ ដែលជំរុញ ឲ្យមានការជួបជុំធ្វើបាតុកម្មរបស់ប្រជាជនអ៊ីរ៉ង់ គឺដើម្បីតវ៉ាប្រឆាំងនឹងវិស័យសេដ្ឋកិច្ច ដែលកាន់តែដាំក្បាលចុះ បង្កការលំបាកយ៉ាប់យឺន ដល់ជីវភាពប្រចាំថ្ងៃរបស់ប្រជាជន។
ជាងនេះទៅទៀត សេចក្តីសង្ឃឹមថាសេដ្ឋកិច្ចនឹងមានដង្ហើយដកវិញ ត្រូវរលាយក្លាយជាផេះ បន្ទាប់ពីរដ្ឋាភិបាលលោកដូណាល់ ត្រាំ បានសម្រេចដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់។ ជាផលវិបាក គឺរដ្ឋាភិបាលសហរដ្ឋអាមេរិក បានដាក់កំហិតថា ចាប់ពីថ្ងៃទី៥សីហានេះទៅ ក្រុមហ៊ុនបរទេសណាដែលចង់រកស៊ីជាមួយអាមេរិក គឺត្រូវតែដកខ្លួនចេញពីទីផ្សារអ៊ីរ៉ង់ឲ្យអស់។
សូមបញ្ជាក់ថា ដោយសារតែការសម្រេចរបស់លោកដូណាល់ ត្រាំនេះ ក្រុមហ៊ុនបរទេសមួយចំនួនធំ បានសម្រេចចិត្តដោយបង្ខំ ដកខ្លួនចេញ ឈប់រកស៊ីនៅអ៊ីរ៉ង។ ធនាគារ ក្រុមហ៊ុនវិនិយោគ ក៏មិនអាចបន្តបោះទុនរកស៊ីនៅអ៊ីរ៉ង់ដែរ។ អត្រាតម្លៃប្រាក់ រីយ៉ាល់ ដែលជារូបិយបណ្ណរបស់អ៊ីរ៉ង់ បានធ្លាក់ចុះយ៉ាងគំហុក ក្នុងរវាង៤ខែនេះ ដែលកាលពីខែមីនា ៥ម៉ឺនរីយ៉ាល់ អាចដូរបាន១ដុល្លារ អាមេរិក តែពេលនេះគេត្រូវការដល់ទៅជាង១០ម៉ឺនរីយ៉ាល់ ទើបអាចដូរបានមួយដុល្លារ។
ការធ្លាក់ចុះតម្លៃរូបិយបណ្ណ បានធ្វើឲ្យទំនិញគ្រប់សព្វសារពើ កាន់តែឡើងថ្លៃ។ សូម្បីតែទំនិញ ដែលផលិតនៅអ៊ីរ៉ង់ បានឡើងថ្លៃដល់ទៅ៤០%។ រីឯទំនិញនាំចូលពីបរទេសវិញ បានឡើងថ្លៃចន្លោះ ពី១០០ ទៅ១៥០%ឯណោះ។ ដោយសារតែឱនភាពនេះ ជីវភាពប្រចាំថ្ងៃរបស់ប្រជាពលរដ្ឋ កាន់តែលំបាក បូបបន្ថែម ជាមួយនឹងអត្រាអ្នកអត់ការងារធ្វើ កាន់តែឡើងខ្ពស់។ តាមការរំពឹងទុក ដោយសារតែទណ្ឌកម្មរបស់អាមេរិក ការនាំចេញរបស់អ៊ីរ៉ង់ អាចនឹងធ្លាក់ចុះចំនួន២ភាគ៣ ចន្លោះពីនេះរហូតដល់ចុងឆ្នាំ២០១៨។
ថ្វីត្បិតតែមកត្រឹមពេលនេះ បាតុកម្មរបស់ប្រជាជន ត្រូវបានធ្វើក្រោមរូបភាព សំដែងការតវ៉ា ប្រឆាំងនឹងវិបត្តិសេដ្ឋកិច្ច ទំនិញឡើងថ្លៃ ពិតមែន តែនៅតេអេរ៉ង់ គេសង្កេតឃើញថា បាតុកម្មនេះកំពុងប្រែរូបរាង ក្លាយជាបាតុកម្មប្រឆាំងរដ្ឋាភិបាលអ៊ីរ៉ង់។ វីដេអូមួយ ដែលគេចែកចាយតាមបណ្តាញសង្គម បានបង្ហាញថា យុវជនបាតុករនៅតេអ៉េរ៉ង់ បានស្រែកថា មេដឹកនាំផ្តាច់ការត្រូវតែស្លាប់!។ មេដឹកនាំផ្តាច់ការនេះ គឺសំដៅទៅលើលោកមគុទេសន៍សាសនារបស់អ៊ីរ៉ង់ អាយ៉ាតូឡា អាលី ខាំមឺណី។ វីដេអូផ្សេងទៀត ថតនៅទីតាំងផ្សេងៗគ្នា ក៏បានស្តែងឲ្យឃើញពីការស្រែកតវ៉ា ប្រឆាំងរដ្ឋាភិបាលអ៊ីរ៉ង់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ