អ៊ីរ៉ង់៖ ឃាត់ខ្លួន៤០នាក់ ក្នុងបាតុកម្មប្រឆាំងនឹងការដំឡើងតម្លៃប្រេងឥន្ធនៈ
ចាប់តាំងពីយប់ថ្ងៃសុក្រ បាតុកម្មបានផ្ទុះឡើង នៅតាមទីក្រុងនានា នៅក្នុងប្រទេសអ៊ីរ៉ង់ ដើម្បីប្រឆាំងនឹងការសម្រេចតម្លើងថ្លៃប្រេងឥន្ធនៈ។ បាតុកម្មហិង្សា ភាពចលនា និងការបង្រ្កាបរបស់អាជ្ញាធរ បានបង្កឲ្យមនុស្សម្នាក់ស្លាប់ ហើយនៅថ្ងៃអាទិត្យនេះ អាជ្ញាធរបានអះអាងថា គេបានឃាត់ខ្លួនបាតុករហិង្សាចំនួន៤០នាក់។ លោក អាយ៉ាតុឡា អាលីខាមឺណី មគុទេសន៍សាសនាកំពូលរបស់អ៊ីរ៉ង់ បានប្រកាសជាសាធារណៈថា លោកគាំទ្រការដំឡើងថ្លៃប្រេងឥន្ធនៈនេះ ហើយថាបាតុករហិង្សា គឺសុទ្ធសឹងតែជាជនអន្ធពាល ដែលមានអ្នកនយោបាយឆក់ឱកាស នៅពីក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ទីភ្នាក់ងារព័ត៌មានផ្លូវការអ៊ីរ៉ង់ ISNA បានប្រកាសផ្សាយ នៅថ្ងៃអាទិត្យទី ១៧វិច្ឆិកាថា មានការឃាត់ខ្លួនមនុស្សចំនួន៤០នាក់ ដែលជាប់ពាក់ព័ន្ធនឹងបាតុកម្មហិង្សា នៅឯទីក្រុង Yazd ភាគកណ្តាលប្រទេស។ ចំណែកកាលពីថ្ងៃសៅរ៍ បាតុករម្នាក់បានស្លាប់ នៅឯទីក្រុង Sirjan ភាគខាងត្បូង និងមានអ្នករបួសជាច្រើននាក់ទៀត។
សូមរំលឹកថា ប្រមាណ២ថ្ងៃ២យប់មកហើយ ដែលបាតុកម្មបានផ្ទុះឡើងនៅតាមទីក្រុងនានា មិនថានៅរដ្ឋធានី តេអេរ៉ង់ ក្រុងChiraz ឬ Ispahan។ បាតុករជ្រុលនិយមខ្លះ បានវាយកម្ទេចហេដ្ឋារចនាសម្ព័ន្ធសាធារណៈ ទីតាំងស្ថានីយ៍ប្រេងឥន្ធនៈ និងបានដុតបំផ្លាញរថយន្ត បិទផ្លូវជាច្រើនកន្លែងផងដែរ។ មូលហេតុដែលបង្កឲ្យផ្ទុះបាតុកម្មនេះ គឺការសម្រេចរបស់ក្រុមប្រឹក្សាជាន់ខ្ពស់សម្របសម្រួលសេដ្ឋកិច្ចអ៊ីរ៉ង់ ដែលបានអនុញ្ញាតឲ្យតម្លើងថ្លៃប្រេងឥន្ធនៈ។ សម្រាប់៦០លីត្រដំបូងក្នុងរយៈពេល១ខែ តម្លៃនឹងឡើងចំនួន៥០% ហើយចាប់ពីកម្រិតនេះទៅ តម្លៃនឹងឡើងចំនួន៣០០%។
សម្រាប់ប្រជាជនអ៊ីរ៉ង់ ដែលមានជីវភាពលំបាកណាស់ទៅហើយ ដោយសារតែទណ្ឌកម្មសេដ្ឋកិច្ចរបស់អាមេរិក ការដំឡើងថ្លៃប្រេងឥន្ធនៈនេះ ហាក់ដូចជាការសង្កត់កបន្ថែម។ រដ្ឋាភិបាលអ៊ីរ៉ង់ បានអះអាងថា គេមានគម្រោងប្រមូលចំណូលបន្ថែម ដើម្បីយកទៅជួយគ្រួសារអ៊ីរ៉ង់ ដែលមានជីវភាពក្រីក្របំផុត។
គួររំលឹកថា គម្រោងតម្លៃថ្លៃប្រេងឥន្ធនៈនេះ ធ្លាប់ត្រូវបានរដ្ឋាភិបាលអ៊ីរ៉ង់ ដាក់ស្នើម្តងរួមមកហើយ នៅឆ្នាំមុន តែត្រូវបានក្រុមប្រឹក្សាជាតិសម្របសម្រួលសេដ្ឋកិច្ចអ៊ីរ៉ង់ បដិសេធ។ ដោយឡែក នៅថ្ងៃអាទិត្យទី១៧វិច្ឆិកានេះ លោកអាយ៉ាតុឡា អាលីខាមឺណី បានចេញមកប្រកាសថា លោកគាំទ្រការតម្លើងថ្លៃប្រេងឥន្ធនៈនេះ។ លោកបញ្ជាក់ថា បើសមាជិកនៃក្រុមប្រឹក្សាជាន់ខ្ពស់សម្របសម្រួសសេដ្ឋកិច្ច ដែលមានតំណាងស្ថានប័នកំពូលទាំង៣ មានរដ្ឋាភិបាល មានសភា និងតុលាការ សម្រេចយល់ថាជាវិធានការល្អ លោកក៏យល់ស្របដែរ។
លោកអាយ៉ាតុឡា បានថ្កោលទោសចំពោះសកម្មភាពបាតុកម្មហិង្សាដែលកំពុងកើតឡើង ថាការដុតបំផ្លាញទ្រព្យសម្បត្តិឯកជន និងសាធារណៈមិនមែនជាដំណោះស្រាយនោះទេ ហើយអ្នកដែលធ្វើវាគឺសុទ្ធតែជាជនអន្ធពាល។ លោកអាយ៉ាតុលា បានរំលឹកឲ្យប្រជាជនអ៊ីរ៉ង់ កុំចាញ់បោកការឃោសនាពន្យុះ កេងចំណេញនយោបាយ ពីក្រុមប្រឆាំងមួយចំនួន ដែលចង់ឲ្យកើតមានវិបត្តិនយោបាយនៅអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ