នៅអារ៉ាប៊ីសាអូឌីត លោកដូណាល់ ត្រាំ ត្រូវថ្លែងសន្ទរកថាបង្រួបបង្រួមប្រទេសអ៊ីស្លាម
ចុះផ្សាយនៅថ្ងៃ៖
ស្តាប់ - ០៧:៣៣
លោក ដូណាល់ ត្រាំ កំពុងបន្តទស្សនកិច្ច នៅតំបន់អារ៉ាប់ដើមបូព៌ា ដោយថ្ងៃអាទិត្យនេះ លោកត្រូវធ្វើសន្ទរកថា ជាផ្លូវការ នៅចំពោះមុខថ្នាក់ដឹកនាំអារ៉ាប៊ីសាអូឌីត និងប្រមុខដឹកនាំប្រទេសឥស្លាមប្រមាណជា៥០ប្រទេស។ ជាសន្ទរកថា ដែលគេរំពឹងចាំស្តាប់ ព្រោះគ្រប់គ្នា សង្ឃឹមថា លោក ដូណាល់ ត្រាំ និងប្រកាស អំពាវនាវឲ្យប្រទេសអ៊ីស្លាម គ្រប់និកាយទាំងអស់ រួមសាមគ្គីគ្នា ដើម្បីបោសសំអាត ចលនាភេរវកម្ម។
អារ៉ាប៊ីសាអូឌីត បានទទួលលោកប្រធានាធិបតីដូណាល់ ត្រាំ ព្រមទាំងភរិយា បានយ៉ាងអធិកអធមបំផុត។ អ្នកសង្កេតការណ៍ព័ត៌មានជាច្រើន បានលើកឡើងថា លោកត្រាំ ត្រូវបានអារ៉ាប៊ីសាអូឌីត ទទួលស្វាគម បានល្អ នឹងធំដំជាងកាលពីពេលដែលលោក អូបាម៉ាទៅ ធ្វើទស្សនកិច្ច កាលពីឆ្នាំមុន។
“រួមគ្នា យើងនឹងបានជោគជ័យ !”
ព្រះចៅសាលម៉ាន់ របស់អារ៉ាប៊ីសាអូឌីត បានមកឈរ ចាំទទួលលោកដូណាល់ ត្រាំ នៅនឹងជណ្តើរយន្តហោះតែម្តង ហើយបានចាប់រលាក់ដៃគ្នា ក្នុងទឹកមុខញញឹមញញែមបំផុត។ នៅតាមផ្លូវវិញ គេមានចងបដា បាញ់ភ្លើងរូបថត របស់មេដឹកនាំទាំងពីរនាក់។ លើបដាមានសរសេរឃ្លាថា “រួមគ្នា យើងនឹងបានជោគជ័យ”។ ជាការកត់សម្គាល់មួយទៀតនោះ គឺ លោកស្រី មេឡានា ភរិយាលោកដូណាល់ ត្រាំ មិនមានទទូលក្រណាត់ គ្របក្បាល ទេ។ នេះបង្ហាញឲ្យឃើញពីករណីពិសេសណាស់ សម្រាប់ប្រទេសអារ៉ាប៊ីសាអូឌីត ព្រោះថាប្រទេសមួយនេះ តែងតែពិន័យ ផ្តន្ទាទោស មនុស្សស្រីណា ដែលមិនយកក្រណាត់មកជូតក្បាល ឲ្យជិត។
ជាការកត់សម្គាល់មួយទៀតនោះ គឺទស្សនកិច្ចថ្ងៃទីមួយ ពោរពេញទៅដោយ ជំនួញរកស៊ី។ គ្មានអ្វីគួរឲ្យភ្ញាក់ផ្អើលទេ ព្រោះថា លោកដូណាល់ ត្រាំ គឺជាអតីតអ្នកជំនួញ។ លោកត្រាំ បាននាំកូនស្រីច្បង លោកស្រី អ៊ីវង់កា និងស្វាមី ទៅជាមួយ ដែលអ្នកទាំងពីរនេះ ត្រូវគេដឹងយ៉ាងច្បាស់ថា គឺជាមនុស្សស្និតស្នាលបំផុតនឹងលោកត្រាំ ហើយជាអ្នកគ្រប់គ្រង កិច្ចការរកស៊ី របស់អណាចក្រក្រុមហ៊ុនត្រាំ ទូទាំងពិភពលោក។
រដ្ឋាភិបាលលោក ដូណាល់ ត្រាំ បានចុះកិច្ចសន្យាលក់អាវុធ ឲ្យអារ៉ាប៊ីសាអូឌីត ក្នុងទឹកប្រាក់ប្រមាណជា១១០ពាន់លានដុល្លារ ដែលចំនួននេះ ច្រើនមិនធ្លាប់មានទេ សម្រាប់វិស័យអាជីវកម្មអាវុធរបស់អាមេរិក។ ក្រៅពីនេះ នៅមានកិច្ចសន្យា គិតជាទឹកប្រាក់ប្រមាណ ជា២៧០ពាន់លានដុល្លារផ្សេងទៀត។ កុំភ្លេចថា នៅអារ៉ាប៊ីសាអូឌីត មានក្រុមហ៊ុនជាច្រើន ដែលមានទំនាក់ទំនងរកស៊ីជាមួយនឹងក្រុមហ៊ុនត្រាំ របស់កូនចៅលោកដូណាល់ ត្រាំ។ នេះនៅមិនទាន់រាប់ពីក្រុមហ៊ុនអចលនទ្រព្យច្រើនសេ្អកស្កះ របស់លោកត្រាំ ដែលមាននៅកាតា និងនៅអេមៀរ៉ាតអារ៉ាប់រួម ផងទេ។
សត្រូវរបស់មិត្តខ្ញុំ ក៏គឺជាសត្រូវរបស់ខ្ញុំ!
កន្លងមក អាមេរិក តែងតែជាសម្ព័ន្ធមិត្ត របស់អារ៉ាប៊ីសាអូឌីត ហើយមានគោលជំហរ ប្រឆាំងនឹងអ៊ីរ៉ង់។ ក៏ប៉ុន្តែអ្វីៗ បានប្រែប្រួលខ្លះ កាលពីនៅក្នុងអាណត្តិចុងក្រោយ របស់លោកអូបាម៉ា។ លោក អូបាម៉ា មិនចង់កាន់ជើងអ្នកណាទេ។ លោកអូបាម៉ា បានជ្រើសយកការបើកផ្លូវ ឲ្យអ៊ីរ៉ង់ វិលត្រលប់មករកឆាកអន្តរជាតិវិញ តាមរយៈកិច្ចព្រមព្រៀងកម្មវិធីនុយក្លេអ៊ែរ។ គឺត្រង់នេះហើយ ដែលអារ៉ាប៊ីសាអូឌីត មិនសូវពេញចិត្តលោកអូបាម៉ា។
ក៏ប៉ុន្តែជាមួយនឹង លោកដូណាល់ ត្រាំ អ្វីៗ វាផ្ទុយស្រលះពីលោកអូបាម៉ា។ លោកត្រាំ មិនដែលលាក់ទេ ថាគាត់ស្អប់អ៊ីរ៉ង់។ គ្មានមូលហេតុអ្វីផ្សេង ក្រៅពីមូលហេតុ ជំនួញទេ។ ពោលគឺ លោកត្រាំ ស្អប់អ៊ីរ៉ង់ ដើម្បីបំពេញចិត្ត ប្រទេសផ្សេងទៀត ដែលស្អប់អ៊ីរ៉ង់ដែរ។ ប្រទេសទាំងនោះ គឺមាន ជាអាទិ៍ គឺអារ៉ាប៊ីសាអូឌីត នេះឯង ហើយសុទ្ធតែជាប្រទេស ដែលក្រុមហ៊ុនលោកត្រាំ មានទំនាក់ទំនងរកស៊ីជាមួយ។
ប្រទេសអារ៉ាប់ដែលស្អប់អ៊ីរ៉ង់ គ្មាននរណាចង់ឲ្យអ៊ីរ៉ង់ អាចបើកទ្វារសេដ្ឋកិច្ច មកដណ្តើមទីផ្សារលក់ប្រេងរបស់ពួកគេទេ។ អញ្ចឹងហើយបានជាលោកដូណាល់ ត្រាំ ខំស្រែក ថាលោកនឹងហែកកិច្ចព្រមព្រៀងដកទណ្ឌកម្មសេដ្ឋកិច្ចចេញពីអ៊ីរ៉ង់ ចោល។ យ៉ាងណាមិញ កាលពីថ្ងៃទី១៨ ឧសភា នេះ រដ្ឋាភិបាលលោកត្រាំ បានសម្រេចបន្ត មិនព្រមលប់ទណ្ឌកម្មផ្នែកខ្លះ ដែលដាក់លើអ៊ីរ៉ង់។ ធ្វើនេះ ក្នុងបំណងតែមួយគត់ គឺបញ្ជោរអារ៉ាប៊ីសាអូឌីត ២ថ្ងៃមុនលោកត្រាំទៅដល់។
ចាត់ទុកអ៊ីរ៉ង់ ជាសត្រូវនៃសន្តិភាព ក្នុងតំបន់ដើមបូព៌ា ដើម្បីយកលេសលក់អាវុធ
ទាក់ទិននឹងការលក់អាវុធ ក្នុងទឹកប្រាក់ដ៏មហាសាល ទៅឲ្យអារ៉ាប៊ីសាអូឌីត នាពេលនេះ គេសង្កេតឃើញថា រដ្ឋាភិបាលលោកត្រាំ បានប្រើយុទ្ធសាស្ត្រមួយ ដោយចាត់ទុកអ៊ីរ៉ង់ ជាសត្រូវ និងជាគ្រោះថ្នាក់ សម្រាប់តំបន់ដើមបូព៌ា។ ដូច្នេះ វិធីតែមួយគត់ ដើម្បីទប់ទល់ជាមួយ អ៊ីរ៉ង់ គឺជួយផ្គត់ផ្គង់អាវុធ ទៅឲ្យអារ៉ាប៊ីសាអូឌីត។ កាលពីខែមេសាកន្លងទៅ រដ្ឋមន្ត្រីការពារជាតិអាមេរិក Jim Mattis បានទៅអារ៉ាប៊ីសាអូឌីតដែរ ហើយបាននិយាយថា៖ “ក្រឡេកមើលចុះ នៅតំបន់ដើមបូព៌ា ទីណាមានបញ្ហា មានសង្រ្គាម គឺទីនោះហើយ ដែលមានការលូកដៃកកូកកាយ ពីសំណាក់អ៊ីរ៉ង់”។ លោកម្នាក់នេះ បានចាត់ទុកអ៊ីរ៉ង់ ថាជាសត្រូវនៃសន្តិភាព ក្នុងតំបន់ដើមបូព៌ា ទៀតផង។
ជាងនេះទៅទៀត ក្នុងឱកាសចុះកិច្ចសន្យាលក់អាវុធ កាលពីថ្ងៃ ទី២០ ឧសភានេះ លោករដ្ឋមន្ត្រីការបរទេសអាមេរិក Rex Tillerson បាននិយាយ ដោយត្រង់ៗតែម្តងថា៖ “អាវុធដែលអាមេរិក លក់ទៅឲ្យអារ៉ាប៊ីសាអូឌីតនេះ គឺដើម្បីទប់ទល់ នឹងសកម្មភាពគំរាមកំហែង របស់អ៊ីរ៉ង់”។
រដ្ឋាភិបាលលោកត្រាំ បានយកអ៊ីរ៉ង់ ជាចំណាប់ខ្មាំង ជាសត្រូវ ដើម្បីបំពេញបំណងម៉ូយទិញអាវុធ និង អ្នករកស៊ីជាមួយខ្លួន គឺ អារ៉ាប៊ីសាអូឌីត ព្រមទាំងប្រទេសមហាសេដ្ឋីអ៊ីស្លាមស៊ុនីត មួយចំនួនទៀត។
លោកត្រាំ ត្រូវបង្ខំចិត្ត ថ្លែងសន្ទរកថាបង្រួបបង្រួមប្រទេសអ៊ីស្លាម ទាំងកុហកខ្លួនឯង
យ៉ាងណាក៏ដោយ នៅថ្ងៃអាទិត្យនេះ លោកត្រាំ កំពុងតែត្រៀមខ្លួន ថ្លែងសារ មួយដ៏សំខាន់ បំផុត ដែលតំរូវឲ្យលោក ប្រយ័ត្នមាត់ប្រយ័ត្នក មិនមែនដូចកាលជំនាន់ឃោសនាបោះឆ្នោតទេ។ សន្ទរកថា ដែលតាមការរំពឹងទុក គឺត្រូវមានខ្លឹមសារ បង្រួបបង្រួម អំពាវនាវ ឲ្យប្រទេសសាសនាអ៊ីស្លាម ក្នុងតំបន់ដើមបូព៌ាទាំងអស់ រួមគ្នា ទប់ស្កាត់ ចលនាភេរវកម្ម។
តាមការវិភាគ ក្រុមការងារលោកត្រាំ កំពុងពិចារណា ថ្លឹងថ្លែងប្រើពាក្យពេជន៍ណា ឲ្យសមរម្យ។ កន្លងមក ពាក្យមួយឃ្លាដែលលោកត្រាំចូលចិត្តប្រើនោះ គឺ ចលនាភេវកម្ម ដែលបង្កដោយពួកអ៊ីស្លាមផ្តាច់ការ។ ក្នុងឃ្លានេះ មានប្រទេសអ៊ីស្លាមខ្លះ គេមិនពេញចិត្តទេ ដោយគេគិតថា វាបានលាបពណ៌ ឲ្យប្រឡាក់ប្រឡូសសាសនាអ៊ីស្លាមទាំងមូល។
តាមពិតទៅ សម្តី បែបញុះញ៉ង់ លាបពណ៌ បង្កាច់បង្ខូច គឺលោកត្រាំ ចូលចិត្តនិយាយណាស់ កាលពីជំនាន់ឃោសនាបោះឆ្នោត។ ក្រោយមកទៀត ក្រោយបានឡើងជាប្រធានាធិបតី លោកត្រាំ មិនមែនត្រឹមតែនិយាយទេ តែថែមទាំងបានចេញវិធានការ ដែលមានខ្លឹមសាររើសអើង ដាក់ប្រជាជនអ្នកកាន់សាសនាអ៊ីស្លាមទាំងមូល ទៅក្នុងបណ្តុំតែមួយ នៃពួកភេរវកម្មជ្រុលនិយមតែម្តង។
ចង់មិនចង់ សន្ទរកថា ដែលលោកត្រាំ មានបំណងឲ្យប្រទេសអ៊ីស្លាមរួបរួមគ្នា ដែលគេរំពឹងចាំនាពេលនេះ គឺវាផ្ទុយស្រលះពីអ្វីដែលលោកត្រាំបានធ្វើ ពោលគឺមិនខុសពីលោកត្រាំ និយាយកុហកខ្លួនឯងទេ។ កុហកត្រង់ថា ចង់ឲ្យប្រទេសអ៊ីស្លាមរួបរួមគ្នា តែខ្លួនឯងបែរជាហាមប្រជាជនអ៊ីស្លាមប្រទេសក្រីក្រខ្លះ មិនឲ្យជាន់ដីអាមេរិក ចំណែកប្រទេសអ៊ីស្លាមអ្នកមាន និងជាសំបុកពួកភេរវកម្ម ដូចអារ៉ាប៊ីសាអូឌីតជាដើម ឲ្យចូលអាមេរិកបានដដែល។ លោកត្រាំ កុហកមួយទៀតនោះ គឺកុហកត្រង់ថា អំពាវនាវឲ្យប្រទេសអ៊ីស្លាមសាមគ្គីគ្នា ក៏ប៉ុន្តែ ទន្ទឹមគ្នានោះ គាត់ចាត់ទុកអ៊ីរ៉ង់ ដែលជាប្រទេសអ៊ីស្លាមដ៏ធំមួយដែរនោះ ជាសត្រូវទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ