អាមេរិក ចង់បង្កើតសម្ព័ន្ធភាពយុទ្ធសាស្ត្រនៅមជ្ឈឹមបូព៌ា ដើម្បីទប់ទល់ជាមួយអ៊ីរ៉ង់
បើតាមប្រភពជាច្រើន ទាំងពីខាងរដ្ឋាភិបាលអាមេរិក និងរដ្ឋាភិបាលប្រទេសអារ៉ាប់តំបន់មជ្ឈឹមបូព៌ា បានឲ្យដឹងថា រដ្ឋាភិបាលលោកដូណាល់ ត្រាំ កំពុងតែពិចារណា បង្កើតក្រុមសម្ព័ន្ធភាពយុទ្ធសាស្ត្រមួយ ជាមួយនឹងប្រទេសអ៊ីស្លាមស៊ូនីត នៅតំបន់ដើមបូព៌ា។ ប្រភពទាំងអស់ អះអាងថា សម្ព័ន្ធយុទ្ធសាស្ត្រ ដែលគេយកគំរូតាមសម្ព័ន្ធអង្គការOTANនេះ នឹងមានតួនាទីទប់ទល់ នឹងការគំរាមកំហែង របស់មហច្ឆិតាយោធា របស់អ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
សហរដ្ឋអាមេរិក កំពុងរិះគិត អំពីការបង្កើត សម្ព័ន្ធភាពយុទ្ធសាស្ត្រមួយ ក្នុងតំបន់ដើមបូព៌ា ដោយយកគំរូតាមអង្គការអូតង់។ ប្រទេសដែលអាចចូលរួម ក្នុងបក្សសម្ព័ន្ធយោធានេះជាមួយអាមេរិក គឺក្រុមប្រទេសអារ៉ាប់ឈូងសមុទ្រទាំង៦ មានអារ៉ាប៊ីសាអូឌីត អេមៀរ៉ាត់អារ៉ាប់រួម អូម៉ង់ កូវ៉េត កាតា និងបារ៉ែន រួមទាំងប្រទេស២ទៀត គឺអេហ្ស៊ីប និងហ្សកដានី។
យោងតាមប្រភពបួនផ្សេងគ្នា គឺសហរដ្ឋអាមេរិក មានចេតនារិតចំណងសម្ព័ន្ធភាព ជាមួយប្រទេសអ៊ីស្លាមនិកាយស៊ូនីតទាំងនេះ ដែលក្នុងនោះ មានជាពិសេស អារ៉ាប៊ីសាអូឌីត និងអេមៀរ៉ាត់អារ៉ាប់រួម ក្នុងវិស័យយុទ្ធសាស្ត្រយោធា ការទប់ស្កាត់បណ្តាញភេរវកម្ម ការទប់ទល់នឹងប្រព័ន្ធមីស៊ីល ព្រមទាំងលើកកំពស់ទំនាក់ទំនងសេដ្ឋកិច្ច និងការទូត។ គំរោង ដែលគេដាក់ឈ្មោះបណ្តោះអាសន្នថា សម្ព័ន្ធភាពយុទ្ធសាស្ត្រដើម្បីតំបន់មជ្ឈឹមបូព៌ា (ASMO) អាចនឹងត្រូវគេលើកមកពិភាក្សាគ្នាជាផ្លូវការ នៅក្នុងជំនួបកំពូល ដែលនឹងត្រូវធ្វើនៅខែតុលា ខាងមុខ នៅក្រុងវ៉ាស៊ីនតោន។
ប្រភពផ្លូវការ ពីសេតវិមានអាមេរិក បានទទួលស្គាល់ថា រដ្ឋាភិបាលលោកដូណាល់ ត្រាំ ពិតជាកំពុងតែពិចារណាលើគំរោងនេះមែន។ ប្រភពពីមន្ត្រីទូតអាមេរិក បានលើកឡើងថា សំណើបង្កើតសម្ព័ន្ធភាពយោធានេះ ត្រូវបានលើកឡើង ដោយថ្នាក់ដឹកនាំអារ៉ាប៊ីសាអូឌីត កាលពីឆ្នាំទៅ នៅមុនពេលលោកដូណាល់ ត្រាំទៅធ្វើទស្សនកិច្ចនៅរីយ៉ាត។ អ្នកនាំពាក្យក្រុមប្រឹក្សាសន្តិសុខជាតិអាមេរិក ក៏បានទទួលស្គាល់ដែរថា សម្ព័ន្ធភាពយុទ្ធសាស្ត្រនៅមជ្ឈឹមបូព៌ានេះ គឺជាឧបករណ៍មួយដើម្បីរក្សស្ថិរភាពតំបន់ ហើយវានឹងក្លាយជាខែលមួយដ៏រឹងមាំ ដើម្បីការពារប្រទេសក្នុងតំបន់នេះ ពីមហិច្ឆិតាវាទីរបស់អ៊ីរ៉ង់។
សូមបញ្ជាក់ថា បើសិនជាសម្ព័ន្ធយុទ្ធសាស្ត្រយោធា រវាងអាមេរិក និងក្រុមប្រទេសអ៊ីស្លាមស៊ូនីតនេះ ពិតជាអាចចាប់បដិសន្ធិមែននោះ វានឹងរិតតែធ្វើឲ្យទំនាក់ទំនងរវាងសហរដ្ឋអាមេរិក និងអ៊ីរ៉ង់ ដែលជាមេក្រុមប្រទេសអ៊ីស្លាមឈីអ៊ីត កាន់តែអាក្រក់ទៅៗ។ រដ្ឋាភិបាលថ្មីរបស់អាមេរិក ក្រោយការចូលកាន់តំណែងរបស់លោកដូណាល់ ត្រាំ បានបែរខ្នងដាក់អ៊ីរ៉ង់ទាំងស្រុង តាមរយៈការដើរចេញពីកិច្ចព្រមព្រៀងនុយក្លេអ៊ែរអ៊ីរ៉ង់ ហើយទន្ទឹមនឹងនេះ រដ្ឋាភិបាលលោកដូណាល់ ត្រាំ បានបោះដៃហុចទៅអារ៉ាប៊ីសាអូឌីត កាន់តែខ្លាំង។ ក្នុងពេលទស្សនកិច្ចលោកដូណាល់ ត្រាំ នៅក្រុងរីយ៉ាដ សហរដ្ឋអាមេរិក និង អារ៉ាប៊ីសាអូឌីត បានចុះកិច្ចសន្យានឹងគ្នាក្នុងទឹកប្រាក់ ៣៥០ពាន់លានដុល្លារ ដែលក្នុងនោះគ្រាន់តែកិច្ចសន្យាទិញសព្វាវុធ គឺមានតំលៃ១១០ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ