ស៊ីរី៖ ស្លាប់ជនស៊ីវីល ៤២នាក់ ដោយការទម្លាក់គ្រាប់របស់កងទ័ពសម្ព័ន្ធមិត្ត នៅតំបន់រ៉ាខា
តំបន់រ៉ាខា នៅប្រទេសស៊ីរី គឺជាសមរភូមិចុងក្រោយ ដែលកងទ័ពសម្ព័ន្ធមិត្ត និងកងកម្លាំងប្រជាធិបតេយ្យស៊ីរី កំពុងរួមគ្នាប្រយុទ្ធ ដើម្បីរំដោះទីក្រុងនេះ ចេញពីដៃក្រុមជីហាតអង្គការរដ្ឋអ៊ីស្លាម។ តែយ៉ាងណា ប្រជាជនស៊ីវីល ដែលជាប់នៅទីនោះ បានក្លាយជាជនរងគ្រោះ ដំបូងគេបង្អស់ ដោយសារតែគ្រាប់បែក ទំលាក់ដោយកងទ័ពសម្ព័ន្ធមិត្ត។ ជាក់ស្តែង កាលពីថ្ងៃចន្ទ កន្លងទៅ យ៉ាងហោចណាស់មនុស្សស្លូតត្រង់៤២នាក់ បានស្លាប់ដោយសារគ្រាប់បែក ដែលគេទំលាក់ សំដៅសម្លាប់ក្រុមជីហាតអង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ក្នុងចំណោមជនស៊ីវីល ទាំង៤២នាក់ ដែលបានស្លាប់កាលពីថ្ងៃចន្ទ ដោយគ្រាប់បែករបស់កងទ័ពសម្ព័ន្ធមិត្ត គឺមាន១៩នាក់ជាកុមារ។ នេះ បើតាមការរាយការណ៍ របស់អង្គការឃ្លាំមើលសិទ្ធិមនុស្ស នៅស៊ីរី។ ចំណែកកាលពីថ្ងៃអាទិត្យ មានជនស្លូតត្រង់ប្រមាណជា២៧នាក់ផ្សេងទៀត បានស្លាប់ ដោយការទម្លាក់គ្រាប់បែក ស្រដៀងគ្នានេះដែរ។
លោក Rami Abdel Rahmane ប្រធានអង្គការឃ្លាំមើលសិទ្ធិមនុស្សនៅស៊ីរី បានលើកឡើងថា នៅរ៉ាខា មានប្រជាជនស៊ីវីល ស្លាប់ជារៀងរាល់ថ្ងៃ ដោយការទំលាក់គ្រាប់ជិញ្ជ្រុំរបស់កងទ័ពសម្ព័ន្ធមិត្ត។ លោកបញ្ជាក់ថា ក្នុងរយៈពេល ៨ថ្ងៃចុងក្រោយនេះ គឺមានប្រជាជនស៊ីវីល ស្លាប់ចំនួន១៧០នាក់ហើយ នៅក្នុងសមរភូមិរ៉ាខា។
សូមបញ្ជាក់ថា នៅរ៉ាខា កងទ័ពសម្ព័ន្ធមិត្តបានធ្វើប្រតិបត្តិការទំលាក់គ្រាប់បែក ដើម្បីជួយកងកម្លាំងប្រជាធិបតេយ្យស៊ីរី និងកងកម្លាំងកួដ ឲ្យរុលទៅមុខ។ រហូតមកដល់ពេល តំបន់រ៉ាខា ត្រូវបានរំដោះ ពីដៃក្រុមជីហាតអង្គការរដ្ឋអ៊ីស្លាម បានប្រមាណជា៦០%ហើយ។
ក្នុងឆ្នាំ២០១៤ គ្រាប់បែករបស់កងទ័ពសម្ព័ន្ធមិត្ត បានសម្លាប់ប្រជាជនស៊ីវិល ប្រមាណ៦២៤នាក់។ តែតួលេខនេះ ត្រូវបានអង្គការក្រៅរដ្ឋាភិបាលខ្លះ លើកឡើងថា នៅទាបជាងចំនួនជាក់ស្តែងទៀតផង។ កងទ័ពសម្ព័ន្ធមិត្ត ដែលដឹកនាំដោយកងទ័ពអាមេរិក ធ្លាប់បានអះអាងថា គេនឹងខឹតខំធ្វើគ្រប់យ៉ាង ដើម្បីបញ្ចៀស កុំឲ្យមានប្រជាជនស្លូតត្រង់ រងគ្រោះ នៅក្នុងការទម្លាក់គ្រាប់បែក។ តែយ៉ាងណាក៏ដោយ វាជារឿង ដែលពិបាកធ្វើបំផុត ព្រោះថា ក្រុមជីហាតអង្គការរដ្ឋអ៊ីស្លាម បានយកប្រជាជនស្លូតត្រង់ធ្វើជាខែល។
បើតាមការប៉ាន់ស្មាន របស់ក្រុមការងារសង្កេតការ នៃអង្គការសហប្រជាជាតិ បច្ចុប្បន្ននេះ នៅរ៉ាខា មានប្រជាជនស៊ីវីល ដែលត្រូវក្រុមជីហាតអង្គការរដ្ឋអ៊ីស្លាម បង្ឃាំងជាចំណាប់ខ្មាំង មានប្រមាណជា ២៥០០០នាក់។ ប្រធានក្រុមការងារមនុស្សធម៌នៃអង្គការសហប្រជាជាតិ លើកឡើងថា ប្រជាជនស៊ីវីល ដែលជាប់ក្នុងដៃរបស់ពួកជីហាតនៅរ៉ាខា គឺពួកគេស្ថិតក្នុងគ្រោះថ្នាក់បំផុត។ តែយ៉ាងណា ការបាត់បង់ជីវិតមនុស្ស គឺជារឿងដែលចៀសមិនផុតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ