អ៊ីរ៉ង់៖ លោកដូណាល់ ត្រាំ សម្រេចរក្សាកិច្ចព្រមព្រៀងនុយក្លេអ៊ែរ តែនឹងបន្ថែមទណ្ឌកម្មផ្សេងទៀត
លោកដូណាល់ ត្រាំ ធ្លាប់បានប្រកាសថា នៅពេលលោកឡើងជាប្រធានាធិបតី លោកនឹងហែកចោល កិច្ចព្រមព្រៀងកម្មវិធីនុយក្លេអ៊ែរអ៊ីរ៉ង់ ដែលលោកអូបាម៉ា បានសម្រេចបាន ជាមួយប្រទេសមហាអំណាចផ្សេងទៀត។ ប៉ុន្តែ នៅថ្ងៃទី១៧ កក្កដា ម្សិលមិញ លោក ដូណាល់ ត្រាំ ទើបបានសម្រេច ថារដ្ឋាភិបាលលោក នឹងរក្សាទុក នូវកិច្ចព្រមព្រៀងគ្រប់គ្រងកម្មវិធីនុយក្លេអ៊ែរអ៊ីរ៉ង់ដដែល ក៏ប៉ុន្តែសហរដ្ឋអាមេរិក នឹងបន្ត បន្ថែមទណ្ឌកម្មសេដ្ឋកិច្ចផ្សេងទៀត ទៅលើអ៊ីរ៉ង់ ដោយសារតែអ៊ីរ៉ង់ បានបន្តអភិវឌ្ឍន៍កាំជ្រួចបាលីស្ទីក។
ចុះផ្សាយនៅថ្ងៃ៖ កែប្រែថ្ងៃទី៖
សហរដ្ឋអាមេរិក នឹងរក្សាទុក នូវកិច្ចព្រមព្រៀងស្តីពីការគ្រប់គ្រងកម្មវិធីនុយក្លេអ៊ែរអ៊ីរ៉ង់ តែ រដ្ឋាភិបាលអាមេរិក នឹងដាក់ទណ្ឌកម្មសេដ្ឋកិច្ចលើអ៊ីរ៉ង់ ទាក់ទិនទៅនឹងកម្មវិធីអភិវឌ្ឍន៍កាំជ្រួចបាលីស្ទីក ព្រមទាំងសកម្មភាពដែលអ៊ីរ៉ង់បង្កអស្ថិរភាពតំបន់។ នេះគឺការសម្រេចរបស់លោកដូណាល់ ត្រាំ។
លោក ចាវ៉ាត់ ហ្សារីហ្វ រដ្ឋមន្ត្រីក្រសួងការបរទេសអ៊ីរ៉ង់ ដែលមានវត្តមាននៅអង្គការសហប្រជាជាតិ ក្រុងញូយ៉ក បានប្រតិកម្មថា គោលបំណងដាក់ទណ្ឌកម្មបន្ថែមមកលើអ៊ីរ៉ង់ ពីសំណាក់ រដ្ឋាភិបាលលោកដូណាល់ ត្រាំ នេះ គឺវាជាសញ្ញាបញ្ច្រសទិសគ្នា ទៅនឹងអ្វីដែលអាមេរិកបានសន្យានៅក្នុងកិច្ចព្រមព្រៀង ថានឹងទណ្ឌកម្មបន្តិចម្តងៗ។
គួររំលឹកថា កិច្ចព្រមព្រៀងកម្មវីធីនុយក្លេអ៊ែរ អ៊ីរ៉ង់ ត្រូវបានចុះហត្ថលេខា ដោយអ៊ីរ៉ង់ សហរដ្ឋអាមេរិក រុស្ស៊ី បារាំង ចិន អង់គ្លេស និងអាល្លឺម៉ង់ នៅទីក្រុងវីយែន ថ្ងៃទី១៤កក្កដា ២០១៥។ កិច្ចព្រមព្រៀងនេះ បានឆ្លងកាត់ការចរចា ដោយតឹងតែងបំផុត អស់រយៈពេល៣ឆ្នាំ នឹងបន្ទាប់ពីឆ្លងកាត់សង្រ្គាមការទូត ស្ទើរតែឈានទៅដល់សង្រ្គាមអាវុធ អស់រយៈពេលជិត២០ឆ្នាំ រវាងសហរដ្ឋអាមេរិក និងអ៊ីរ៉ង់។ លោកចន ឃែរី អតីតរដ្ឋមន្ត្រីក្រសួងការបរទេសអាមេរិក និងជាអ្នកបានចូលរួមយ៉ាងសកម្ម ដើម្បីសម្រេចកិច្ចព្រមព្រៀងនេះ បានលើកឡើងថា កិច្ចព្រមព្រៀងកម្មវិធីនុយក្លេអ៊ែរអ៊ីរ៉ង់ គឺជាជោគជ័យមួយដ៏ធំ ព្រោះវាបានលប់បំបាត់ នូវការគំរាមកំញើញជាប្រចាំ ដែលមានច្រើនទសវត្សមកហើយ រវាងអ៊ីរ៉ង់ និងសហរដ្ឋអាមេរិក។
យោងតាមកិច្ចព្រមព្រៀងនេះ អ៊ីរ៉ង់សុខចិត្តបោះបង់ចោលមហិច្ឆិតានុយក្លេអ៊ែរ ជាថ្នូរជាមួយនឹងការដកទណ្ឌកម្មសេដ្ឋកិច្ច និងការបើកច្រកពាណិជ្ជកម្ម។ បន្ទាប់ពីបានចូលជាធរមាននៅ ថ្ងៃទី១៦ មករា ២០១៦ ភ្នាក់ងារថាមពលនុយក្លេអ៊ែរអន្តរជាតិ AIEA ដែលមានតួនាទីត្រួតពិនិត្យការគោរពទូទៅ បានអបអរ ចំពោះការដែលអ៊ីរ៉ង់ បានគោរពកាតព្វកិច្ច បានត្រឹមត្រូវ ក្នុងរយៈពេល៦ខែកន្លងមកនេះ។
តាមការវិភាគ លោកដូណាល់ ត្រាំ បានសម្រេចរក្សាទុកកិច្ចព្រមព្រៀងនេះ ដោយសារលោកមិនចង់បែរខ្នង ដាក់ប្រទេសមហាអំណាចហត្ថលេខីផ្សេងទៀត នៃកិច្ចព្រមព្រៀងនេះ។ តែយ៉ាងណា រដ្ឋាភិបាលលោកត្រាំ នៅតែព្យាយាម បង្កើនភាពតានតឹង ផ្នែកការទូតជាមួយអ៊ីរ៉ង់ដដែល តាមរយៈការចោទប្រកាន់ រិះគន់ទៅលើអ៊ីរ៉ង់ ថាបានបំពាក់បំប៉ន ចលនាភេរវកម្ម និងបានបង្កបញ្ហានៅក្នុងតំបន់ដើមបូព៌ា។ មិនត្រឹមតែប៉ុណ្ណោះ ខុសពីលោកអូបាម៉ា ដែលខំធ្វើឲ្យអាមេរិកនៅកណ្តាល មិនកាន់ជើងខាងណានោះ លោកដូណាល់ ត្រាំបានងៀកទៅចាប់ដៃជាមួយអារ៉ាប៊ីសាអូឌីត ដែលជាសត្រូវសួរពូជរបស់អ៊ីរ៉ង់។ ដោយឡែក កាលពីសប្តាហ៍មុន តុលាការអ៊ីរ៉ង់ បានកាត់ទោសជនជាតិអាមេរិកម្នាក់ ឲ្យជាប់គុក១០ឆ្នាំ ពីបទធ្វើសកម្មភាពចារកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ