ជនជាតិហ្វីលីពីនរាប់រយនាក់ធ្វើបាតុកម្មប្រឆាំងលោកដូណាល់ ត្រាំ នៅទីក្រុងម៉ានីល
ថ្ងៃសុក្រ២០មករានេះ ប្រជាជនហ្វីលីពីនរាប់រយនាក់បាននាំគ្នាបាតុកម្មនៅពីមុខស្ថានទូតអាមេរិក នៅទីក្រុងម៉ានីល ក្នុងទិសដៅប្រឆាំងនឹងលោកដូណាល់ ត្រាំ។ ពួកគេបានចោទលោកត្រាំ ថារើសអើងពូជសាសន៍ មើលងាយស្ត្រីភេទ រឺក៏ស្អប់ជនបរទេសជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២០
នៅមុខស្ថានទូតសហរដ្ឋអាមេរិក ប្រចាំនៅក្រុងម៉ានីល មនុស្សប្រមាណ៣០០នាក់ បានជុំគ្នា ធ្វើបាតុកម្មប្រឆាំងប្រធានាធិបតី ដូណាល់ ត្រាំ។ ពួកគេលើកបដា សរសេរពាក្យថា “ ត្រាំ សំរាម !”។ ក្រុមបាតុករថែមទាំងបាននាំគ្នាបោះចោលរូបថតលោត្រាំ ក្នុងធុងសំរាមទៀតផង។
ក្រុមបាតុករបានចោទលោកត្រាំថា មាក់ងាយស្ត្រីភេទ ប្រកាន់ពូជសាសន៍ ស្អប់ជនបរទេស។ ទាក់ទងរឿងចោទថាលោកត្រាំស្អប់ជនបរទេស បាតុករមួយចំនួនបានសំដែងការបារម្ភចំពោះជនរួមជាតិហ្វីលីពីន ដែលកំពុងរស់នៅសហរដ្ឋអាមេរិក ដែលអាចនឹងរងគ្រោះពីការរើសអើងពូជសាសន៍។ ក្រៅពីតវ៉ាប្រឆាំងនឹងលោកត្រាំ ក្រុមបាតុករបានដុតទង់ជាតិអាមេរិក និងបានទាមទារអោយកងទ័ពអាមេរិកចាកចេញពីទឹកដីហ្វីលីពីនផងដែរ។
ហ្វីលីពីនធ្លាប់ស្ថិតក្រោមអាណានិគមរបស់អាមេរិក។ ប្រទេសទាំង២មានទំនាក់ទំនងល្អនឹងគ្នាផ្នែកវប្បធម៌និងសេដ្ឋកិច្ច។ ហ្វីលីពីននិងអាមេរិកភ្ជាប់ទំនាក់ទំនងការពារជាតិនឹងគ្នាតាមរយៈសន្ធិសញ្ញាការពារជាតិរួមគ្នាមួយ។ ច្រើនឆ្នាំមកនេះ អាមេរិកបានចូលរួមក្នុងកិច្ចការយោធាជាច្រើនជាមួយហ្វីលីពីន។ តាំងពីលោកឌុយទែរតេ ចូលកាន់អំណាចនៅហ្វីលីពីនមក ទំនាក់ទំនងរវាងប្រទេសទាំង២មិនសូវល្អដូចមុនទេ ដោយសារតែលោកឌុយទែរតេមានទំនោរទៅរកចិន និងរុស្ស៊ី។
ក្រុមបាតុករដែលប្រឆាំងលោកត្រាំ នៅមុខស្ថានទូតអាមេរិក នៅក្រុងម៉ានីល ថ្ងៃសុក្រនេះ ជាក្រុមឆ្វេងនិយមហ្វីលីពីន។ ចលនាឆ្វេងនិយមជាច្រើននៅហ្វីលីពីន មាននយោបាយប្រឆាំងនឹងបែបផែនមូលធនរបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ