អតីតភ្នាក់ងារចារកិច្ចដែលធ្លាប់លួចយកការណ៍ពីរុស្ស៊ីឲ្យអង់គ្លេស ត្រូវរងថ្នាំពុល
នៅទីក្រុងឡុងដ្រ៍ អតីតភ្នាក់ងារចារកិច្ចជនជាតិរុស្ស៊ីម្នាក់ ដែលធ្វើការឲ្យភ្នាក់ងារស៊ើបការណ៍សម្ងាត់របស់អង់គ្លេស ត្រូវប៉ូលីសសង្ស័យថា មានគេលួចបំពុល។ សាក្សីនៅកន្លែងកើតហេតុ បានប្រាប់សារព័ត៌មានក្នុងស្រុកថា ជនរងគ្រោះ ទំនងជាបានទទួលរងសារធាតុពុលកម្រិតខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
លោក សែកហ្គីយ ស្គ្រីប៉ាល់ (Serguï Skripal) អាយុប្រមាណ៦០ឆ្នាំ ជាអតីតវរសេនីយ៍យោធារុស្ស៊ី តែបានលួចធ្វើការឲ្យភ្នាក់ងារស៊ើបការណ៍សម្ងាត់របស់អង់គ្លេស។ កាលពីជាង១០ឆ្នាំមុន ភ្នាក់ងារសម្ងាត់អង់គ្លេស បានផ្តល់លុយឲ្យលោកជាង១០ម៉ឺនដុល្លារ ជាថ្នូរនឹងការប្រគល់ឲ្យអង់គ្លេស នូវបញ្ជីឈ្មោះភ្នាក់ងារសម្ងាត់រុស្ស៊ី ដែលកំពុងស៊ើបការណ៍នៅអ៊ឺរ៉ុប។ អតីតវរសេនីយ៍យោធារុស្ស៊ី រូបនេះ ត្រូវរុស្ស៊ីចាប់ខ្លួនបាន និងកាត់ទោសឲ្យជាប់គុក ចំនួន១៣ឆ្នាំ កាលពីឆ្នាំ២០០៦។ ក៏ប៉ុន្តែ ជាប់ពន្ធនាគារបាន៤ឆ្នាំ លោក សែកហ្គីយ ស្គ្រីប៉ាល់ ក៏បានត្រូវរុស្ស៊ីបញ្ជូនទៅឲ្យអង់គ្លេស នៅក្នុងក្របខណ្ឌចុះកិច្ចព្រមព្រៀងដោះដូរផ្នែកចារកិច្ច។
នៅពេលនេះ លោក សែកហ្គីយ ស្គ្រីប៉ាល់ ត្រូវគេយកព្យាបាលនៅមន្ទីរពេទ្យ ដោយអាការៈជំងឺកំពុងតែដុបដាបខ្លាំងមែនទែន។ ប៉ូលីសអង់គ្លេស បានប្រទះឃើញរូបលោកជាមួយនឹងស្រីម្នាក់ អាយុប្រហែល៣០ឆ្នាំ នៅបង់អង្គុយមួយកន្លែង ក្បែរផ្សារទំនើប ជាយក្រុងទីក្រុងឡុង។ ពេលដែលប៉ូលីសរកឃើញអ្នកទាំងពីរនោះ គឺពួកគេបានបាត់បង់ស្មារតីទៅហើយ តែក្រោយការពិនិត្យជាបឋម គឺគ្មានស្លាកស្នាមជាំឬរបួសលើរាងកាយអ្វីទេ។ ប៉ូលីសគិតថា អ្នកទាំងពីរអាចជាមនុស្សធ្លាប់ស្គាល់គ្នា។
នៅល្ងាចថ្ងៃអង្គារ៍ ទី៦មីនា រដ្ឋមន្ត្រីការបរទេសអង់គ្លេស បានបញ្ជាក់ថា បុរសដែលត្រូវថ្នាំពុលនោះ គឺជាអតីតភ្នាក់ងារចារកិច្ច អាយុ៦៦ឆ្នាំ ហើយមនុស្សស្រីវ័យ៣០ឆ្នាំនោះ គឺជាកូនស្រីរបស់គាត់។ ប្រមុខការទូតអង់គ្លេស លើកឡើងដែរថា បើការស៊ើបអង្គេត រកឃើញថា រដ្ឋឬបុគ្គលណានៅពីក្រោយអំពើនេះ គឺនឹងត្រូវទទួលការឆ្លើយតបវិញ យ៉ាងតឹងរឹង។
ហេតុការណ៍នេះ បានធ្វើឲ្យសារព័ត៌មានក្នុងស្រុកអង់គ្លេស និងសាធារណមតិ នឹកគិតទៅដល់ការបំពុលសម្លាប់ជនជាតិរុស្ស៊ីម្នាក់ទៀត គឺលោក លីត៍វីនែនកូ (Alexandre Valtérovich Litvinenko) កាលពីឆ្នាំ២០០៦ នៅទីក្រុងឡុងដ្រ៍។ លោក លីត៍វីនែនកូ ក៏ធ្លាប់បានសហការជាមួយភ្នាក់ងារស៊ើបការណ៍សម្ងាត់របស់អង់គ្លេស ដើម្បីស៊ើបអង្កេតពីទំនាក់ទំនងរបស់រុស្ស៊ីជាមួយក្រុមជនអន្ធពាល Mafias៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ