ការវាយប្រហារដោយកាំបិតចាក់សម្លាប់មនុស្សពីរនាក់ នៅក្រុងឡុងឌ្រឺ ប្រទេសអង់គ្លេស
ចុះផ្សាយនៅថ្ងៃ៖
ស្តាប់ - ០៦:១៥
នៅក្រុងឡុងឌ្រឺ ប្រទេសអង់គ្លេស ថ្ងៃសុក្រ ទី២៩វិច្ឆិកា មានការវាយប្រហារដោយកំាំបិតសម្លាប់មនុស្សពីរនាក់ ហើយ៣នាក់ទៀតរងរបួស។ បុរសខ្មាន់កាំបិត ត្រូវប៉ូលីសអង់គ្លេសបាញ់ស្លាប់ ដោយសមត្ថកិច្ចសន្និដ្ឋានថា «អំពើវាយប្រហារចាក់សម្លាប់មនុស្សដោយកាំបិតរបស់ជននេះ គឺជាសកម្មភាពភេរវកម្ម»។ ក្រុងឡុងឌ្រឺ ដែលកំពុងតែកកកុញដោយព្រឹត្តិការណ៍ទិញទំនិញថោកបញ្ចុះតម្លៃ ក្នុងឱកាស Black Friday ក៏បែរជាត្រូវរកការភ័យព្រួយពីរឿងអសន្តិសុខ។ ពេលនេះ នគរបាលអង់គ្លេសនិងសមត្ថកិច្ចគ្រប់ផ្នែក កំពុងតែបង្កើនការប្រុងប្រយ័ត្នយ៉ាងខ្ពស់។
តើហេតុការណ៍ចាក់សម្លាប់មនុស្សនេះ កើតឡើងដូចម្តេច?
រឿងហេតុនេះ កើតឡើងនៅម៉ោងប្រមាណជា២រៀល ម៉ោងនៅក្រុងឡុងឌ្រឺ។ បុរសម្នាក់កាន់កាន់កំាបិតសស្ញាច់ដើរចាក់មនុស្សម្នា។ ឧប្បតិ្តហេតុនេះ កើតឡើងនៅលើស្ពាន London Bridge កណ្តាលរាជាធានីឡុងឌ្រឺ ដ៏ល្បាញល្បី ផ្តុំដោយចរាចរណ៍មនុស្សនិងទេសចរយ៉ាងកកកុញ។ ហេតុការណ៍វាយប្រហារនេះ បានបណ្តាលឱ្យមនុស្សស្លាប់ពីរនាក់ និងរបួសបីនាក់។ នៅពេលមុនប៉ូលីសអន្តរាគមន៍មកដល់ គឺមានអ្នកទេសចរណ៍ និងមគ្គុទេសចរម្នាក់ផង ខំប្រឹងប្រតាយប្រតំ ប្រឹងប្រយុទ្ធតទល់ទៅតាមលទ្ធភាព ធ្វើយ៉ាងណា ឱ្យបុរសនោះទម្លាក់កាំបិតចេញពីដៃ។ នៅពេលដែលសមត្ថកិច្ចអន្តរាគមន៍មកដល់ គឺបុរសនោះ ត្រូវគេវាយដួលនឹងដី ប៉ុន្តែរូបគេនៅតែតដៃនឹងសមត្ថកិច្ចទៅទៀត រហូតដល់ត្រូវប៉ូលីសបាញ់ស្លាប់តែម្តង ព្រោះថា ខ្នាន់កាំបិតនេះ បានពាក់អាវបំពាក់ដោយគ្រឿងផ្ទុះផង។ នេះបើតាមប៉ូលីសអង់គ្លេស។
ខ្មាន់កាំបិត ជាអតីតអ្នកទោស។ ទើបតែចេញពី ចេញពីមន្ទីរឃុំឃាំងសោះ ហេតុអ្វីអាចឆ្លៀតទៅធ្វើភេរវកម្មបានទៀត?
ខ្មាន់កាំបិតសម្លាប់មនុស្សនេះ ត្រូវប៉ូលីសទម្លាយអត្តសញ្ញាណ ថាមានឈ្មោះថា Usman Khan អាយុ២៨ឆ្នាំ មានប្រភពកំណើតកើតនៅអង់គ្លេសនេះ និងធ្លាប់រស់នៅភាគខាងលិច ក្រុងឡុងឌ្រឺ។ តាមពិតទៅ ជននេះ គឺជាអតីតអ្នកទោស ដែលរងបទចោទថា បានចូលរួមសកម្មភាពភេរវកម្ម និងត្រូវតុលាការអង់គ្លេសកាត់ទោសឱ្យជាប់គុក កាលពីឆ្នាំ២០១២។ ក្រោយទទួលទោសជាប់ឃុំ៦ឆ្នាំរួចមក រូបគេក៏ត្រូវដោះលែងឱ្យមានសេរីភាព រស់នៅក្រៅឃុំបណ្តោះអាសន្ន កាលពីឆ្នាំមុននេះ ក៏ប៉ុន្តែគឺត្រូវស្ថិតនៅក្នុងលក្ខខណ្ឌត្រួតពិនិត្យរបស់សមត្ថកិច្ច ព្រមទាំងដាក់បំពាក់ខ្សែដៃ កងដៃកងជើងអេឡិចត្រូនិច សម្រាប់ផ្តល់សញ្ញាដល់ប៉ូលីសផង។ មានបំពាក់ឧបករណ៍តាមដានត្រួតពិនិត្យដូច្នេះទៅហើយ ក៏ជននេះ ទៅតែអាចឆ្លៀតទៅធ្វើការវាយប្រហារចាក់សម្លាប់មនុស្សបានទៀត។ នេះជាចម្ងល់មួយដែលសមត្ថកិច្ចនិងសាធារណជន កំពុងតែឆ្ងល់ និងជជែករកហេតុផលដែរ។ ប៉ូលីសអង់គ្លេស បានប្រកាសថា នឹងស៊ើបអង្កេតឱ្យដឹងឫសគល់ក្នុងរឿងនេះ និងជម្រាបដំណឹងជាបន្ត។
ចម្ងល់មួយ ទៀត ដែលសមត្ថកិច្ចស៊ើបអង្កេតអង់គ្លេស ក៏កំពុងរកឫសគល់ដែរនោះ គឺនៅត្រង់ថា កាលពីថ្ងៃទី២៧វិច្ឆិកា កន្លងទៅនេះ គឺប៉ុន្មានតែជា២ថ្ងៃប៉ុណ្ណោះ មុនហេតុការណ៍វាយប្រហារចាក់សម្លាប់មនុស្សបានកើតឡើងនៅលើស្ពាន London Bridgeនេះ គឺ តុលាការអង់គ្លេស បានកាត់ទោសជនជាប់ចោទម្នាក់ ដែលបានវាយប្រហារភេរវកម្ម ដោយយកកាំបិតចាក់សម្លាប់មនុស្សដែរ ក្នុងអំឡុងបុណ្យឆ្លងឆ្នាំ កាលពីឆ្នាំមុន។ តុលាការសម្រេចឱ្យជនអ៊ីស្លាមជ្រុលនិយមនេះជាប់ទោស ដេកពន្ធនាគារ រយៈពេល១១ឆ្នាំ។ នៅក្នុងពេលនេះ ប៉ូលីសអង់គ្លេស កំពុងសង្ស័យ និងកំពុងរកមើល តើហេតុការណ៍ទាំងពីរនេះ វាអាចមានជាប់ពាក់ព័ន្ធ ឬក៏អាចជាការសងសឹកពីពួកខ្សែបណ្តាញភេរវជន ឬក៏យ៉ាងណា។
ពេលនេះ ក្រុងឡុងឌ្រឺ ត្រូវយាមកាមយ៉ាងតឹងរឹង ហើយប្រទេសអឺរ៉ុប ក៏កំពុងតែពង្រឹងសន្តិសុខខ្លាំងដែរ
គេធ្វើដូច្នេះ ព្រោះថានៅទ្វីបអឺរ៉ុបពេលនេះ កំពុងតែមានសញ្ញាណហានិភ័យ និងអសន្តិសុខច្រើន និងមានរឿងហេតុដែលគេសង្ស័យ បានកើតមានជាប់ៗគ្នាតែម្តង។
នៅយប់ថ្ងៃសុក្រឈានថ្ងៃសៅរ៍ នៅប្រទេសហូឡង់ ក៏មានហេតុការណ៍ដើរចាក់មនុស្សប្រុងសម្លាប់កើតឡើងដែរ។ នៅកណ្តាលផ្លូវ ក្នុងទីផ្សារកណ្តាលក្រុងឡាអេ បុរសម្នាក់ ក៏បានយកកាំបិតដើរចាក់មនុស្ស បណ្តាលឱ្យរស់ក្មេងៗ៣នាក់។ តែប៉ូលីសមិនទាន់បញ្ជាក់ថា ជាការវាយប្រហារភេរវនិយម ឬយ៉ាងណាទេ។
ថ្ងៃសុក្រទី២៩វិច្ឆិកា កណ្តាលក្រុងប៉ារីសប្រទេសបារាំងវិញ វ៉ាលីសមួយ ដែលផ្ទុកដោយគ្រឿងផ្ទុះផង ក៏ត្រូវសមត្ថកិច្ចឆែកឆេរឃើញ នៅស្ថានីយរថភ្លើង La Gare du Nord ហើយប៉ូលីសបារាំងបានស្រាវជ្រាវរាវរកមនុស្សម្ចាស់វ៉ាលីស និងឃាត់ខ្លួនបុរសម្នាក់។ ចំណែកនៅក្រុងម៉ុងរ៉េអាល់ ប្រទេសកាណាដាវិញ ក្នុងថ្ងៃដដែលនេះ បុរសម្នាក់ បានលួចឡានរបស់ក្រុមជួយសង្គ្រោះបន្ទាន់ យកទៅជិះ ហាក់មានចេតនាបើកសំដៅបុកគេឯង ហើយក៏ត្រូវបុកគល់ឈើ និងត្រូវប៉ូលីសចាប់ឃាត់បាន។ រឿងហេតុទាំងកើតឡើងជួនៗគ្នា ក្នុងឱកាសដែលមនុស្សម្នាកំពុងតែកកកុញដោយព្រឹត្តិការណ៍ទិញទំនិញថោកបញ្ចុះតម្លៃ ក្នុងឱកាស Black Friday។
រឿងទាំងអស់នេះ ជាក្តីព្រួយបារម្ភមួយ គឺព្រឹត្តិការណ៍បែបនេះ កើតឡើងផ្ទួនៗគ្នា គឺនៅតែប៉ុន្មានថ្ងៃសោះ ដែលអង្គការអូតង់ ត្រូវរៀបចំចំនួបប្រជុំកំពូល នៅក្នុងប្រទេសអង់គ្លេស គឺនៅថ្ងៃអង្គារនិងថ្ងៃពុធខាងមុខនេះ ជាឱកាសអបអរខួបកំណើត៧០ឆ្នាំរបស់អង្គការសម្ពន្ធអូអង់នេះផង។ នៅពេលនេះ សមត្ថកិច្ចអង់គ្លេស គ្រប់ផ្នែក កំពុងតែដើរល្បាត និងបង្កើនស្មារតីប្រុងប្រយ័ត្នខ្ពស់ខ្លាំងណាស់។ ព្រោះម្យ៉ាង ការរៀបចំបោះឆ្នោតសភាអង់គ្លេស ក៏នឹងចាប់ផ្តើមធ្វើឡើង នៅមិនដល់ពីរសប្តាហ៍ទៀតផងទេ! ដូច្នេះ ក្រុងឡុងឌ្រឺ កំពុងតែរវល់មហាញឹកណាស់ បញ្ហាអសន្តិសុខដោយប្រការណាមួយនោះ ក៏ជាក្តីបារម្ភមួយផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ