រដ្ឋាភិបាលលីប៊ីចោទថាបារាំងរំលោភអធិបតេយ្យភាពលីប៊ី
ក្រោយរដ្ឋាភិបាលបារាំង បានប្រកាសពីការស្លាប់របស់ទាហានបារាំង៣នាក់ ក្នុងទឹកដីលីប៊ី ថ្ងៃពុធ២០កក្កដា ម្សិលមិញ រដ្ឋាភិបាលលីប៊ី បានសំដែងការខឹងសម្បារដោយចោទថា បារាំងរំលោភលើអធិបតេយ្យភាព លីប៊ី។ ម្សិលមិញដែរ នៅតាមក្រុងច្រើនកន្លែងនៅលីប៊ី មនុស្សរាប់រយនាក់បាននាំគ្នាបាតុកម្មប្រឆាំងនឹងវត្តមានយោធាបារាំង ក្នុងស្រុក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
ថ្ងៃពុធម្សិលមិញ ប្រធានាធិបតីបារាំងបានប្រកាសពីការស្លាប់របស់ទាហានបារាំង៣នាក់ ក្នុងគ្រោះថ្នាក់ឧទ្ធម្ភាគចក្រ នៅលីប៊ី។ រដ្ឋាភិបាលលីប៊ីដែលប្រទេសខាងលិចទទួលស្គាល់ បានប្រតិកម្មចោទទៅបារាំងវិញថា បានរំលោភបូរណភាពដែនដីលីប៊ី ព្រោះបារាំងមិនបានសហការ រឺជូនដំណឹងជាមុនដល់អាជ្ញាធរលីប៊ី ពីសកម្មភាពយោធាខ្លួន។
ការប្រកាសរបស់អជ្ញាធរបារាំងពីមរណភាពទាហានបារាំង បានគូសបញ្ជាក់ជាលើកដំបូងថា បារាំងមានវត្តមានយោធានៅលីប៊ី។ កន្លងមក បារាំងមិនដែលបញ្ជាក់វត្តមានកងទ័ពពិសេសខ្លួន នៅលីប៊ីទេ។ ក្រោយការប្រកាសរបស់អាជ្ញាធរបារាំង ប្រជាជនលីប៊ីរាប់រយនាក់បាននាំគ្នាបាតុកម្ម ប្រឆាំងវត្តមានយោធាបារាំង ក្នុងស្រុក។ ក្រុមបាតុករបានទាមទារអោយប្រទេសលោកខាងលិចឈប់លូកដៃចូលក្នុងនយោបាយលីប៊ី។ លោកសាឌីក អាល់ហ្ការីយ៉ានី ជាអ្នកមានឥទ្ធិពលខ្លាំង នៅលីប៊ី មកពីចលនាភាតរអ៊ីស្លាម បានសុំអោយរដ្ឋាភិបាលចុះពីអំណាច និងសុំអោយលីប៊ីធ្វើសង្គ្រាមប្រឆាំងបារាំង។
តាំងពីរបបលោកខាដាហ្វ៊ីដួលរំលំ ក្នុងឆ្នាំ២០១១មក លីប៊ីធ្លាក់ក្នុងអស្ថិរភាពសន្តិសុខធ្ងន់ធ្ងរ។ រដ្ឋាភិបាលផ្លូវការដែលប្រទេសលោកខាងលិចទទួលស្គាល់ និងរដ្ឋាភិបាលមិនផ្លូវការដឹកនាំដោយលោកខាលីហ្វា ហាហ្វតា នៅភាគខាងកើតប្រទេស កំពុងឈ្លោះដណ្តើមអំណាចគ្នា។ ក្រុមភេរវជនរដ្ឋអ៊ីស្លាមវិញក៏ក៏កំពុងធ្វើសកម្មភាពក្នុងស្រុកដែរ។ អង្គការសហប្រជាជាតិបារម្ភថា បើក្រុមរដ្ឋអ៊ីស្លាមត្រូវទាហានលីប៊ីកំចាត់បាន ក្រុមនេះអាចនឹងបំបែកសកម្មជនខ្លួនជាក្រុមតូចៗ រាយប៉ាយគ្រប់ទិសទី នៅលីប៊ី និងអាហ្វ្រិកខាងជើង។
នៅលីប៊ី យន្តហោះទ័ពបារាំងធ្វើសកម្មភាពស៊ើបទីតាំងក្រុមរដ្ឋអ៊ីស្លាម។ អាមេរិកក៏មានទ័ពពិសេស ធ្វើសកម្មភាពចារកិច្ចដែរ។ សារព័ត៌មានផ្សេងៗក៏ធ្លាប់លើកឡើងពីវត្តមានទាហានពិសេសអង់គ្លេសនៅលីប៊ីដែរ។ ប្រជាជនលីប៊ីប្រឆាំងដាច់ខាតនឹងអន្តរាគមន៍បរទេសក្នុងស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ