បាតុភូតអេលនីញ៉ូនឹងបណ្តាលឲ្យមានគ្រោះរាំងស្ងួតនិងទឹកជំនន់នៅចុងឆ្នាំ២០១៤
យោងតាមការព្យាករណ៍របស់អង្គការឧតុនិយមអន្តរជាតិ លទ្ធភាពដែលអាចកើតមានបាតុភូតអេលនីញ៉ូ អាចនឹងឈានឡើងដល់៨០ភាគរយ នៅចុងឆ្នាំ២០១៤នេះ។ អង្គការឧតុនិយមអន្តរជាតិបានចេញសេចក្តីថ្លែងការណ៍នេះ នៅថ្ងៃព្រហស្បតិ៍ ក្នុងពេលធ្វើសន្និសីទកាសែតមួយនៅទីស្នាក់ការរបស់ខ្លួន នៅទីក្រុងហ្សឺណែវ ប្រទេសស្វីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
កាលពីខែមេសាកន្លងទៅ អង្គការឧតុនិយមអន្តរជាតិបានចេញសេចក្តីប្រកាសមួយរួចមកហើយថា បាតុភូតអេលនីញ៉ូអាចនឹងកើតមានឡើងនៅពាក់កណ្តាលឆ្នាំនេះ។ តែពេលនេះក្រុមអ្នកជំនាញឧតុនិយមបានចេញសេចក្តីសន្និដ្ឋានមួយទៀតថា បាតុភូតអេលនីញ៉ូអាចនឹងកើតមានក្នុងកម្រិតគូរឲ្យព្រួយបារម្ភនៅចុងឆ្នាំនេះ។ អ្នកនាំពាក្យរបស់អង្គការនេះ បានបញ្ជាក់ថា មានប្រទេសមួយចំនួនបានចាប់ផ្តើមត្រៀមខ្លួនរួចទៅហើយ ពីការមកដល់នៃបាតុភូតធម្មជាតិនេះ។ ទោះជាយ៉ាងណា អ្នកជំនាញបានបន្ថែមថា គេនៅមិនទាន់អាចសន្និដ្ឋានបានថា តំបន់ណានឹងត្រូវទទួលរងការប៉ះពាល់ដោយសារបាតុភូតនេះនៅឡើយទេ ព្រោះគេនៅពុំទាន់ទទួលបាននូវទិន្ន័យបានច្បាស់លាស់។
គួរបញ្ជាក់ថា បាតុភូតអេលនីញ៉ូគឺជា បាតុភូតធម្មជាតិមួយដែលនាំឲ្យមានគ្រោះរាំងស្ងួត និងទឹកជំនន់ធ្ងន់ធ្ងរនៅតាមតំបន់មួយចំនួន។ បាតុភូតនេះបណ្តាលមកពីការឡើងកំដៅនៅក្នុងមហាសមុទ្រប៉ាស៊ីហ្វិច ដែលកំដៅនោះនឹងបង្កជាចំហាយអណ្តែតទៅលើលំហអាកាស។ ចំហាយក្តៅទាំងនោះ នឹងបណ្តាលឲ្យមានសម្ពាធសីតុណ្ហភាពក្តៅហួតហែង នៅតាមតំបន់ដែលវាឆ្លងកាត់ ហើយអាចបង្កជាខ្យល់ព្យុះ រឺភ្លៀងធ្លាក់ជាគំហុក។ ពោលគឺតំបន់ខ្លះមានភ្លៀងធ្លាក់ខ្លាំងបង្កជាទឹកជំនន់ ឯតំបន់ខ្លះទៀតជួបគ្រោះរាំងស្ងួតក្តៅហួតហែង។ បើតាមការប៉ាន់ស្មានរបស់អ្នកជំនាញ បាតុភូតនេះកើតឡើងនៅចន្លោះពី២ ទៅ ៧ឆ្នាំម្តង។ កន្លងមក បាតុភូតនេះបានកើតឡើងកាលពីចន្លោះឆ្នាំ២០០៩-២០១០។ យោងតាមសម្តីរបស់លោក ម៉ាក្ស ឌីលៃ ប្រធានផ្នែកព្យាករណ៍ឧតុនិយម បាតុភូតលើកនេះអាចនឹងមានផលប៉ះពាល់ធ្ងន់ធ្ងរដល់តំបន់ជាច្រើន។ បាតុភូតនេះក៏ជះឥទ្ធិពលផងដែរ ទៅលើការឡើងកំដៅផែនដី គួបផ្សំជាមួយការកាប់បំផ្លាញព្រៃឈើ ដែលមានទួនាទីស្រូបយកឧស្ម័នកាបូនិក ដែលជាប្រភពនៃកំណើនសីតុណ្ហភាពក្នុងបរិយាកាស។
ជាការពិតណាស់ គ្រោះរាំងស្ងួត រឺទឹកជំនន់នឹងបង្កឲ្យមានវិបត្តិសង្គមជាពិសេសនៅតាមបណ្តាប្រទេសក្រីក្រ ដែលភាគច្រើន ប្រជាពលរដ្ឋទាំងនោះពឹងផ្អែកទៅលើរបរកសិកម្ម។ គ្រោះទឹកជំនន់ រឺគ្រោះរាំងស្ងួត នឹងបំផ្លាញផលដំណាំកសិកម្ម ហើយតំលៃគ្រាប់ធុញ្ញជាតិនឹងឡើងថ្លៃ ព្រោះថាតម្រូវការនឹងកាន់តែកើនឡើងលើសពីការផលិតបាន។ មិនត្រឹមតែប៉ុណ្ណោះ ទឹកជំនន់នឹងបំផ្លាញនូវហេដ្ឋារចនាសម្ព័ន្ធ ស្ពាន ថ្នល់ជាដើម។ នេះនៅមិនរាប់ទាំងការរីករាលដាល នូវជំងឺឆ្លងផ្សេងៗទៀតដែលកើតមានឡើងនៅពេលដែលមានសីតុណ្ហភាពក្តៅហួតហែង រឺទឹកជំនន់ ដូចជាជំងឺអាសន្នរោគ រឺជំងឺគ្រុនចាញ់ជាដើម។
ស្របពេលដែលវិទ្យាសាស្រ្តមានការជឿនលឿន ការព្យាករណ៍បាតុភូតធម្មជាតិកាន់តែមានភាពច្បាស់លាស់។ ការព្យាករណ៍ទុកមុននេះនឹងអាចអនុញ្ញាត ឲ្យប្រទេសទាំងអស់ត្រៀមខ្លួនចាត់វិធានការទប់ស្កាត់ រឺបន្ធូរបន្ថយផលប៉ះពាល់ ដើម្បីជួយដល់ប្រជាពលរដ្ឋខ្លួន។ តែទោះជាយ៉ាងណា មានតែបណ្តាប្រទេសដែលមានលទ្ធភាព និងមានធនធានគ្រប់គ្រាន់តែប៉ុណ្ណោះ ដែលអាចចាត់វិធានការប្រកបដោយប្រសិទ្ធិភាព។ សម្រាប់ប្រទេសក្រីក្រ ហើយបើរដ្ឋាភិបាលខ្វះឆន្ទៈទៀតនោះ ប្រជាជនមានតែសង្ឃឹមលើមេឃតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ