អ៊ីរ៉ង់ស្នើឲ្យមានកិច្ចប្រជុំ ៥បូក១ ដើម្បីនិយាយពីរឿងអាមេរិកបន្តដាក់ទ័ណ្ឌកម្មលើខ្លួន
នៅថ្ងៃសៅរ៍ ទី១៧ ធ្នូ ប្រទេសអ៊ីរ៉ង់បានស្នើជាផ្លូវការឲ្យមានកិច្ចប្រជុំនៃក្រុមប្រទេស ៥បូក១ គឺអាមេរិក រុស្ស៊ី ចិន បារាំង អង់គ្លេស និងអាល្លឺម៉ង់ដើម្បីជជែករឿងអាមេរិកបន្តដាក់ទ័ណ្ឌកម្មថ្មីលើអ៊ីរ៉ង់។ ទ័ណ្ឌកម្មដែលទីក្រុងតេហេរ៉ង់បានបរិហារជាការរំលោភបំពានលើកិច្ចព្រមព្រៀងនុយក្លេអែរចុះហត្ថលេខាកាលពីខែកក្កដា ឆ្នាំ ២០១៥ និងដែលអាមេរិកក៏ជាប្រទេសហត្ថលេខីមួយដែរ។
ចុះផ្សាយនៅថ្ងៃ៖
ស្តាប់ - ០២:២១
សំណើរបស់ប្រទេសអ៊ីរ៉ង់ត្រូវបានធ្វើឡើងតាមរយៈលិខិតមួយរបស់លោកប្រមុខការទូតម៉ូហាម៉ាត ហ្សាវ៉ា ហ្សារ្វីផ្ញើទៅកាន់លោកស្រីប្រមុខការទូតអឺរ៉ុប Federica Mogherini។ នៅក្នុងលិខិតនោះ លោកហ្សារី្វបានអំពាវនាវឲ្យមានកិច្ចប្រជុំនៃគណៈកម្មការរួមគ្រោងដោយកិច្ចព្រមព្រៀងនុយក្លេអ៊ែរដើម្បីនិយាយអំពីទង្វើថ្មីរបស់អាមេរិកដែលបានបន្តទ័ណ្ឌកម្មប្រឆាំងអ៊ីរ៉ង់។ ការផ្ញើលិខិតផ្ទាល់ទៅកាន់លោកស្រី Fererica ក៏ដោយសារលោកស្រីមានតួនាទីជាអាជ្ញាកណ្តាលនៅក្នុងទំនាក់ទំនងរវាងអ៊ីរ៉ង់ និងក្រុមប្រទេស ៥បូក១។
ប្រតិកម្មបរិហារអាមេរិករបស់អ៊ីរ៉ង់ពេលនេះបានធ្វើឡើង ២ថ្ងៃបន្ទាប់ពីលោកប្រធានាធិបតីអាមេរិកអូបាម៉ាបានអនុញ្ញាតឲ្យមានការពន្យាររយៈពេល ១០ឆ្នាំបន្ថែមនូវទ័ណ្ឌកម្មលើអ៊ីរ៉ង់ដែលព្រឹទ្ធសភាអាមេរិកបានបោះឆ្នោតគាំទ្រដោយសម្លេងភាគច្រើននាដើមខែធ្នូនេះ។ ថ្នាក់ដឹកនាំជាន់ខ្ពស់អ៊ីរ៉ង់ ពិសេសប្រមុខសាសនាអ៊ីស្លាមអាលី ខាមេណី និងលោកប្រធានាធិបតីរ៉ូហានីបានបរិហារលើការពន្យារទ័ណ្ឌកម្មនោះ និងចោទអាមេរិកពីបទរំលោភលើកិច្ចព្រមព្រៀងនុយក្លេអ៊ែរចុះហត្ថលេខាក្នុងខែកក្កដា ឆ្នាំ ២០១៥ និងដែលអាមេរិកក៏ជាប្រទេសហត្ថលេខីមួយដែរ។
សូមជម្រាបជូនថា កិច្ចព្រមព្រៀងនុយក្លេអ៊ែរចុះហត្ថលេខារវាងអ៊ីរ៉ង់ និងសហគមន៍អន្តរជាតិដែលចូលជាធរមានក្នុងខែមករា ឆ្នាំ ២០១៦ នេះបានអនុញ្ញាតឲ្យមានការលើកទ័ណ្ឌកម្មមួយភាគចេញពីអ៊ីរ៉ង់។ អង្គការសហប្រជាជាតិបានទទួលស្គាល់ថា អ៊ីរ៉ង់ពិតជាបានអនុវត្តតាមកិច្ចព្រមព្រៀងដែលតម្រូវឲ្យកាត់បន្ថយកម្មវិធីនុយក្លេអ៊ែរ។ តែទីក្រុងតេហេរ៉ង់បានចោទអាមេរិកពីបទបន្តយកជើងរាទឹកមិនឲ្យអ៊ីរ៉ង់មានទំនាក់ទំនងសេដ្ឋកិច្ចប្រក្រតីឡើងវិញជាមួយអាមេរិកក៏ដូចប្រទេសផ្សេងក្នុងលោក។
ទីក្រុងវ៉ាស៊ីនតោនបានអះអាងថា ទ័ណ្ឌកម្មប្រឆាំងអ៊ីរ៉ង់ក្នុងសំណុំរឿងនុយក្លេអ៊ែរត្រូវបានអាមេរិកព្យួរដូចមានចែងក្នុងកិច្ចព្រមព្រៀងនុយក្លេអ៊ែរមែន តែទ័ណ្ឌកម្មដែលអាមេរិកបានពន្យារបន្ថែមពេលនេះ គឺជាទ័ណ្ឌកម្មទាក់ទងនឹងការរំលោភសិទ្ធិមនុស្ស ការគាំទ្រភេរវនិយម និងកម្មវិធីមីស៊ីលរបស់អ៊ីរ៉ង់។ ទីក្រុងតេហេរ៉ង់បានទទួលស្គាល់ថា ទ័ណ្ឌកម្មអាមេរិកប្រឆាំងអ៊ីរ៉ង់ក្នុងវិស័យការពារ ធនាគារ និងថាមពលពេលនេះបានធ្វើឲ្យអ៊ីរ៉ង់ទទួលបានប្រយោជន៍សេដ្ឋកិច្ចតិចជាងការរំពឹងទុកពីកិច្ចព្រមព្រៀងនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ