លោក ហ៊ុន សែន ឲ្យអាមេរិកផ្តាច់ជំនួយទាំងអស់មកកម្ពុជា
ប្រមុខរដ្ឋាភិបាលកម្ពុជា នៅថ្ងៃអាទិត្យនេះ បានប្រកាសស្វាគមន៍ឲ្យអាមេរិកកាត់ផ្តាច់ជំនួយទាំងអស់មកកម្ពុជា ដោយអះអាងថាពេលនោះ គឺជាការសម្លាប់ក្រុមមនុស្សដែលបម្រើនយោបាយរបស់អាមេរិក។ការថ្លែងបែបចំអករបស់លោក ហ៊ុន សែន នៅពេលនេះ គឺជាការឆ្លើយតបនឹងការដាក់ទណ្ឌកម្មជំហានទី១ របស់សហរដ្ឋអាមេរិក ដែលបានប្រកាសផ្តាច់ជំនួយមកកាន់គជប កម្ពុជា ក្រោយពីមានការរំលាយគណបក្សសង្រ្គោះជាតិ។
ចុះផ្សាយនៅថ្ងៃ៖
ស្តាប់ - ០១:៥៥
(អត្ថបទដោយ អ៊ឹង ប៊ុនថន)
នៅចំពោះមុខកម្មកររាប់ពាន់នាក់ ដែលជួបជុំគ្នានៅកោះពេជ្រ នៅថ្ងៃទី១៩ ខែវិច្ឆិកានេះ លោកនាយករដ្ឋមន្រ្តី ហ៊ុន សែន បានថ្លែងថា ប្រសិនបើអាមេរិកកាត់ជំនួយ សម្រាប់គណៈកម្មាធិការជាតិរៀបចំការបោះឆ្នោត មានន័យថា អាមេរិកមិនត្រឹមតែផ្តួលលោកមិនបាននោះទេ ប៉ុន្តែជាសម្លាប់ប្រជាធិបតេយ្យថែមទៀតផង។
លោក ហ៊ុន សែន បានអះអាងថា ការកាត់ជំនួយរបស់អាមេរិកមិនបានសម្លាប់រដ្ឋាភិបាលរបស់លោកនោះទេ តែគឺជាការសម្លាប់ក្រុមមនុស្សដែលបម្រើនយោបាយរបស់អាមេរិកតែប៉ុណ្ណោះ។
ការថ្លែងរបស់លោក ហ៊ុន សែន នៅពេលនេះ គឺជាការឆ្លើយតបនឹងការដាក់ទណ្ឌកម្មជំហានទី១ របស់សហរដ្ឋអាមេរិក ដែលបានប្រកាសផ្តាច់ជំនួយមកកាន់ គជប កម្ពុជា ក្រោយពីមានការរំលាយគណបក្សសង្រ្គោះជាតិ។
សម្រាប់អ្នកវិភាគនៅក្រៅរដ្ឋាភិបាលយល់ថា ការឆ្លើយតបបែបនេះរបស់ប្រមុខរដ្ឋាភិបាលខ្មែរគឺជាការខាតបង់ផលប្រយោជន៍កាន់ច្រើនដល់ប្រជាជនកម្ពុជា។
លោកបណ្ឌិត ឡៅ ម៉ុងហៃ អ្នកវិភាគនយោបាយ ថ្លែងថា ការថ្លែងរបស់លោក ហ៊ុន សែន គឺជាការប្រាសចាកពីកិច្ចព្រមព្រៀងទីក្រុងប៉ារីស។លោកថា បើសិនជាជំរុញឲ្យមានការផ្តាច់ជំនួយទាំងអស់មែនគឺប៉ះពាល់ធ្ងន់ធ្ងរដល់ជីវភាពកម្មកររាប់សែននាក់ដែលកំពុងធ្វើការងារតាមរោងចក្រ ខណៈដែលផលិតផលរបស់ពួកគេត្រូវបាននាំចេញទៅលក់នៅទីផ្សារអាមេរិក និងអ៊ឺរ៉ុបដោយរួចពន្ធ។
តាំងពីឆ្នាំ១៩៩៧មកកម្ពុជាបានទទួលបានការអនុគ្រោះពន្ធនាំទំនិញគ្រប់ប្រភេទលើកលែងតែអាវុធទៅកាន់ទីផ្សារអាមេរិកនិងអ៊ឺរ៉ុប។ ក្នុងឆ្នាំ២០១៦កម្ពុជាបាននាំទំនិញដោយរួចពន្ធក្នុងទឹកប្រាក់ទំហំ១៧៩លានដុល្លារ។ បើនិយាយជារួម ការនាំចេញរបស់កម្ពុជាជិត៧០ភាគរយឆ្ពោះទៅទីផ្សាររបស់សហភាពអឺរ៉ុបនិងសហរដ្ឋអាមេរិកលើទំហំទឹកប្រាក់ជាង៧ពាន់លានដុល្លារអាមេរិកក្នុងនោះទំហំនៃការនាំចេញទៅសហភាពអឺរ៉ុបមានចំនួនជាង៤.៥៥៥លានដុល្លារនៅឆ្នាំ២០១៦។ ភាគច្រើននៃការនាំចេញគឺផលិតផលសម្លៀកបំពាក់ដែលបានផ្តល់ការងារដល់កម្មករ-កម្មការិនីរោងចក្រជាង៧០០.០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ