ព្រឹទ្ធសភាអាមេរិកអនុម័តថវិកាដោយគ្មានខ្ទង់ចំណាយមកកម្ពុជា
ព្រឹទ្ធសភាសហរដ្ឋអាមេរិក បានអនុម័តសំណើថវិកាចំណាយចំនួន ១,៣ ពាន់ពាន់លានដុល្លារ ប៉ុន្តែមិនមានឃើញរាប់បញ្ចូលអំពីជំនួយមកកាន់កម្ពុជានោះទេ ខណៈដែលមិនទាន់មានការដោះលែងអ្នកទោសនយោបាយ និងអនុញ្ញាតឲ្យគណបក្សប្រឆាំងដំណើរការឡើងវិញនោះ។ ប៉ុន្តែមន្ត្រីគណបក្សកាន់អំណាចអះអាងថា អាមេរិកមិនមែនកាត់ជំនួយតែមករដ្ឋាភិបាលកម្ពុជាម្នាក់ឯងនោះទេ គឺអាមេរិកកាត់ទាំងជំនួយទៅអង្គការសហប្រជាជាតិផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ការអនុម័តសំណើថវិកាដោយព្រឹទ្ធសភាអាមេរិក កាលពីថ្ងៃសុក្រ ហើយទើបតែមានការផ្សព្វផ្សាយតាមកាសែតព្រោងព្រាតនៅចន្ទនេះ គឺមិនមានជំនួយសម្រាប់ផ្តល់ដល់រដ្ឋាភិបាលកម្ពុជានោះទេ លុះត្រាតែក្រសួងការបរទេសសហរដ្ឋអាមេរិករាយការណ៍ថាកម្ពុជា «កំពុងចាត់វិធានការឱ្យមានប្រសិទ្ធភាព» ដើម្បីគោរពសិទ្ធិមនុស្ស និងលទ្ធិប្រជាធិបតេយ្យ។
ត្បិត ប្រធានាធិបតីអាមេរិកលោក ដូណាល់ត្រាំ មិនទាន់បានចុះហត្ថលេខាលើការអនុម័តសំណើថវិកានេះក៏ដោយ តែត្រូវបានគេដឹងថា ជំនួយរបស់សហរដ្ឋអាមេរិកអាចផ្តល់ឲ្យកម្ពុជា បាន លុះត្រាតែរដ្ឋាភិបាលកម្ពុជា បើកចំហនូវសិទ្ធិស៊ីវិល និងឲ្យគណបក្សសង្គ្រោះជាតិដំណើរការឡើងវិញ ក៏ដូចជាប្រព័ន្ធផ្សព្វផ្សាយ និងអង្គការសង្គមស៊ីវិល ហើយលុបចោលបំរាមហាមធ្វើនយោបាយរបស់មន្រ្តីបក្សប្រឆាំង១១៨រូប។
ទោះបីជាយ៉ាងណាក៏ដោយ ការផ្តល់ជំនួយរបស់អាមេរិកនឹងនៅតែបន្តសម្រាប់ កម្មវិធីប្រជាធិបតេយ្យ នៅក្នុងការស្រាវជ្រាវ និងការអប់រំជុំវិញរឿងរ៉ាវក្នុងរបបខ្មែរក្រហម ប៉ុន្តែមិនរាប់បញ្ចូលសាលាក្តីខ្មែរក្រហមទេ។
លោក សុខ ឥសាន អ្នកនាំពាក្យគណបក្សកាន់អំណាចមិនបានភ្ញាក់ផ្អើលចំពោះការផ្តាច់ជំនួយរបស់អាមេរិកមកកម្ពុជានោះទេ។ មិនភ្ញាក់ផ្អើលដោយលោកដឹងពីជំហបែបនេះរបស់អាមេរិកតាំងពីច្រើនខែមកហើយ។
បើតាមលោក សុខ ឥសាន អាមេរិកមិនកាត់ផ្តាច់ជំនួយតែមកកម្ពុជាដោយសារតែរំលាយគណបក្សសង្រ្គោះជាតិនោះទេ គឺអាមេរិកបានកាត់បន្ថយជំនួយ រាប់ទាំងទៅកាន់អង្គការសហប្រជាជាតិផងដែរ។
យោងតាម USAID សម្រាប់ឆ្នាំ២០១៧នេះ ជំនួយអាមេរិកមកកម្ពុជាមានតម្លៃ ៥៩លានដុល្លារគឺថយចុះជាងឆ្នាំ២០១៦ ដែលមានចំនួន ៦៧លានដុល្លារ ខណៈនៅឆ្នាំ២០១៥ ជំនួយមានចំនួន ៦៥លានដុល្លារ គឺកើនជាងកាលពីឆ្នាំ២០១៤ ដែលមានតម្លៃតែ៨០លានដុល្លារ នៅគ្រាកម្ពុជាជាប់គាំងនយោបាយនោះ។
សូមបញ្ជាក់ថា ព្រឹទ្ធសភាអាមេរិកបានអនុម័តកញ្ចប់ថវិកាចំណាយ ១,៣ ពាន់ពាន់លានដុល្លារ កាលពីថ្ងៃសុក្រ បន្ទាប់ពីអត្ថបទដែលមានចំនួន ២,២៣២ ទំព័រត្រូវបានបញ្ចេញទៅឱ្យសមាជិកសភា ខណៈមេដឹកនាំគណបក្សសាធារណរដ្ឋបានប្រញាប់ប្រញាល់ដើម្បីបញ្ចៀសការជាប់គាំងរដ្ឋាភិបាលក្នុងរយៈពេលជាច្រើនខែ។ នេះបើតាមកាសែត Online ឈ្មោះ The Guardian៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ