សកម្មជនការពារព្រៃឡង់ថាសកម្មភាពកាប់ឈើទ្រង់ទ្រាយធំក្នុងព្រៃឡង់ថយចុះ
បណ្តាញសហគមន៍ព្រៃឡង់ បានឲ្យដឹងថាសកម្មភាពកាប់បំផ្លាញព្រៃឈើទ្រង់ទ្រាយធំនៅក្នុង ព្រៃឡង់បានថយចុះជាងមុន។ ប៉ុន្តែសកម្មភាពកាប់ឈើទ្រង់ទ្រាយតូច នៅតែបន្តកើតឡើងដដែល ។ ចំណែករដ្ឋាភិបាលសាទរចំពោះការថយចុះករណីកាប់ឈើខុសច្បាប់ក្នុង ព្រៃឡង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
យោងតាមព្រឹត្តិបត្រចេញផ្សាយនៅចុងខែកុម្ភៈ ឆ្នាំ២០១៧នេះ បណ្តាញសហគមន៍ព្រៃឡង់បានមើលឃើញថាសកម្មភាពកាប់ឈើខុសច្បាប់នៅក្នុងព្រៃឡង់កើតមានឡើងតិចជាងមុន។ របាយការណ៍នោះ បានបង្ហាញពីសកម្មភាពនៃការអង្កេតព្រៃឡង់ ចាប់ពីខែសីហា ដល់ខែវិច្ឆកា ឆ្នាំ២០១៦ មានសកម្មភាពកាប់ឈើខុសច្បាប់ចំនួន១៥៤ករណី។ តួលេខនេះមានការថយចុះប្រៀបធៀបនឹងការរាយការណ៍ចាប់ពីខែមេសា ដល់ខែកក្កដា ឆ្នាំ២០១៦។
ចំណែកអ្នកស្រីភោគ ហុង ជាសមាជិកបណ្តាញសហគមន៍ព្រៃឡង់បានថ្លែងប្រាប់វិទ្យុបារាំងអន្តរជាតិថា ការកាប់បំផ្លាញព្រៃឡង់ទ្រ់ងទ្រាយធំបានថយចុះនៅឆ្នាំ២០១៦ ធៀបនឹងឆ្នាំ២០១៥។ ការថយចុះ គឺបន្ទាប់ពីព្រៃឡង់ត្រូវបានដាក់បញ្ចូលជាព្រៃការពារ។ ប៉ុន្តែលោកស្រីភោគ ហុងបញ្ជាក់ថាសកម្មភាពកាប់បំផ្លាញព្រៃឈើទ្រង់ទ្រាយតូចនៅតែមានដដែលប្រៀបធៀបនឹងឆ្នាំ២០១៥កន្លង ហើយអ្នកដែលកាប់បំផ្លាញព្រៃឡង់ទ្រ់ងទ្រាយតូចទាំងនោះ គឺជាអ្នកចំណាកស្រុកមកពីខេត្តដទៃ។
បើតាមអ្នកស្រីភោគ ហុង ក្នុងអំឡុងខែកុម្ភៈនេះបណ្តាញសហគមន៍ព្រៃឡង់បានធ្វើពិធីសាសនាបំបួស និងរំ ស្បង់ជីពរពណ៌ទឹកក្រូចលើដើមឈើប្រមាណ១០០ដើម ហើយបានរកឃើញថាសកម្មភាពកាប់បំផ្លាញព្រៃឈើទ្រង់ទ្រាយធំនៅកណ្តាលព្រៃឡង់បានថយចុះ។ ប៉ុន្តែអ្នកស្រីភោគ ហុង បានបញ្ជាក់ថារហូតមកដល់ខែកុម្ភៈនេះសកម្មភាពកាប់ឈើទ្រង់ទ្រាយតូចនៅតែមានដដែល។
លោកសៅ សុភាពអ្នកនាំពាក្យក្រសួងបរិស្ថានបានទទួលស្គាល់ថាសកម្មភាពកាប់បំផ្លាញព្រៃឡង់នៅតែមានក្នុងរូបភាពតូច ប៉ុន្តែសកម្មភាពកាប់បំផ្លាញទ្រង់ទ្រាយបានធ្លាក់ចុះហើយ។ លោកបន្ថែមថាក្រោយពីទទួលបានព្រៃឡង់ពីក្រសួងកសិកម្ម ក្រសួងបរិស្ថានបានបង្កើតជាដែនជម្រកសត្វព្រៃ ហើយបានដាក់មន្ត្រីឧទ្យានុរក្ស នៅតាមខេត្តទាំង៤ ដើម្បីឃ្លាំមើលការកាប់បំផ្លាញព្រៃឈើខុសច្បាប់ក្នុងតំបន់ព្រៃឡង់។
សូមបញ្ជាក់ថាព្រៃឡង់ត្រូវបានរាជរដ្ឋាភិបាលដាក់ចូលជាដែនជម្រកសត្វព្រៃនៅថ្ងៃទី៩ ខែឧសភាឆ្នាំ២០១៦ កន្លងទៅ។ ព្រៃនេះមានទំហំប្រមាណ៣,៦០០គីឡូម៉ែត្រការ៉េ ស្ថិតនៅចន្លោះខេត្ត ចំនួនបួន គឺខែត្រក្រចេះ ស្ទឹងត្រែង ព្រះវិហារ និងខែត្រកំពង់ធំ។ រយៈការសិក្សាថ្មីមួយរបស់អង្គការអភិរក្សអន្តរជាតិ និងអង្គការវីនរ៉ក់អន្តរជាតិ កាលពីឆ្នាំ២០១៥ បានឲ្យដឹងថា តំបន់ព្រៃឡង់ គឺជាទីជម្រករបស់ប្រភេទសត្វ និងរុក្ខជាតិជិត១ពាន់ប្រភេទ។ ព្រៃឡង់ គឺជាប្រភពនៃជីវិតសម្រាប់មនុស្សប្រមាណ២សែន ៥ម៉ឺននាក់ ដែលរស់នៅជុំវិញវា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ