រដ្ឋសភានីតិកាលទី៦ ត្រូវបានបង្កើតឡើងជាផ្លូវការដោយមាន លោក ហេង សំរិន ជាប្រធាន
រដ្ឋសភានីតិកាលទី៦ ត្រូវបានបង្កើតឡើងជាផ្លូវការហើយ នៅថ្ងៃព្រហស្បតិ៍នេះ តាមរយៈការបោះឆ្នោតជាកញ្ចប់។ ក្នុងនោះ លោក ហេង សំរិន ត្រូវបានជ្រើសតាំងជាប្រធាន ឲ្យបន្តដឹកនាំរដ្ឋសភានីតិកាលទី៦ អមដោយអនុប្រធានពីររូប គឺលោក ងួន ញ៉ិល ជាអនុប្រធានទី១ និងលោកស្រី ឃួន សុដារី ជាអនុប្រធានទី២។ ក្រៅពីក្បាលម៉ាស៊ីនដឹកនាំរដ្ឋសភា សម័យប្រជុំពេញអង្គក៏បានបោះឆ្នោតអនុម័តលើសមាសភាពគណៈកម្មការជំនាញទាំង១០នៃរដ្ឋសភាផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ខុសពីនីតិកាលទី៥ ដែលរដ្ឋសភាមានក្បាលម៉ាស៊ីនដឹកនាំមកពីពហុគណបក្ស នៅនីតិកាលថ្មីនេះ ទាំងក្បាលម៉ាស៊ីនដឹកនាំរដ្ឋសភា និងថ្នាក់ដឹកនាំនៃគណៈកម្មការជំនាញរដ្ឋសភា មានសមាសភាពមកពីគណបក្សប្រជាជនកម្ពុជាតែមួយគត់ ខណៈគណបក្សនេះ ឈ្នះការបោះឆ្នោត កាន់កាប់ទាំង១២៥អាសនៈនៅក្នុងរដ្ឋសភា។
តាមរយៈការបោះឆ្នោតជាកញ្ចប់នាថ្ងៃព្រហស្បតិ៍ ទី០៦កញ្ញានេះ លោក ហេង សំរិន ត្រូវបានជ្រើសតាំងជាប្រធាន ឲ្យបន្តដឹកនាំរដ្ឋសភា។ ចំណែកលោក ងួន ញ៉ិល ដែលធ្លាប់ជាអនុប្រធានទី២នៃរដ្ឋសភាកាលពីអាណត្តិមុន ក្លាយជាអនុប្រធានទី១នៃរដ្ឋសភានៅក្នុងអាណត្តិនេះ ខណៈលោកស្រី ឃួន ដារី ជាអនុប្រធានទី២។
នៅក្នុងចំណោមគណៈកម្មការជំនាញវិញ គេឃើញមានការផ្លាស់ប្ដូរប្រធានថ្មី នៅក្នុងគណៈកម្មការជំនាញចំនួន៥។ គណៈកម្មការជំនាញដែលមានថ្នាក់ដឹកនាំថ្មីនោះ មានជាអាថិ៍៖ គណៈកម្មការទី១ មានលោកប៉ា សុជាតិវង្ស ជាប្រធាន, គណៈកម្មការទី៣ មានលោក ជា វ៉ាន់ដេត ជាប្រធាន, គណៈកម្មការទី៧ លោក ហ៊ុន ម៉ានី ក្លាយជាប្រធាន, គណៈកម្មការទី៨ ដឹកនាំដោយលោកស្រី ឡោក ខេង, និងគណៈកម្មការទី១០ មានលោក ប៉ែន ស៊ីមន ជាប្រធាន។ ដោយឡែក គណៈកម្មការ៥ផ្សេងទៀត បន្តដឹកនាំដោយប្រធានពីអាណត្តិមុនដដែល ដូចជា៖ គណៈកម្មការទី២ លោក ជាម យៀប, គណៈកម្មការទី៤ លោក ហ៊ុន ណេង, គណៈកម្មការទី៥ លោក ឈាង វុន, គណៈកម្មការទី៦ លោក ប៉ែន បញ្ញា និងគណៈកម្មការទី៩ លោកស្រី និន សាផុន។
ជាការកត់សម្គាល់ បន្ទាប់ពីប្រកាសរចនាសម្ព័ន្ធថ្មីនៃរដ្ឋសភានីតិកាលទី៦រួច លោក ហេង សំរិន ប្រធានរដ្ឋសភា បានប្ដេជ្ញាជាឱឡារិកថា នឹងខិតខំគ្រប់សកម្មភាព បំពេញភារកិច្ចលើកកម្ពស់តួនាទីពិតប្រកដរបស់រដ្ឋសភា ដោយឈរលើមូលដ្ឋានរដ្ឋធម្មនុញ្ញ បទបញ្ជាផ្ទៃក្នុងរដ្ឋសភា និងគោលការណ៍ច្បាប់នានា។ តួនាទីរបស់រដ្ឋសភា មានជាអាថិ៍ កិច្ចការកសាងច្បាប់ ការងារត្រួតពិនិត្យ ការអនុវត្តច្បាប់ និងការពារផលប្រយោជន៍ម្ចាស់ឆ្នោតជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ