កម្ពុជា សម្ពោធខ្សែកាបអុបទិកក្រោមបាតសមុទ្រ ម៉ាឡេស៊ី កម្ពុជា ថៃ ប្រវែង ១៣០០គីឡូម៉ែត្រ លើកដំបូង
ស្ថានីយមិត្តភាពខ្សែកាបអុបទិកក្រោមបាតសមុទ្រ ម៉ាឡេស៊ី កម្ពុជា ថៃ ត្រូវបានដាក់ឲ្យដំណើរការហើយនៅថ្ងៃពុធនេះ។ ខ្សែកាប្លិ៍អុបទិកក្រោមបាតសមុទ្រ ម៉ាឡេស៊ី-កម្ពុជា-ថៃ ត្រូវបានរដ្ឋាភិបាលកម្ពុជា រំពឹងថា នឹងផ្តល់ឲ្យ កម្ពុជា នូវបណ្តាញអ៊ីនធើណិតល្បឿនលឿនជាងមុន តម្លៃប្រសើរជាងមុន វិសាលភាពធំទូលាយ និងមានសុវត្ថិភាព នៃលំហូរទិន្នន័យឌីជីថល ទាំងសេវាទូរស័ព្ទ អ៊ីនធើណិត និងឯកជនភាព ទៅកាន់ពិភពលោក។
ចុះផ្សាយនៅថ្ងៃ៖
ស្តាប់ - ០២:៣៦
ខ្សែកាបអុបទិកក្រោមបាតសមុទ្រភ្ជាប់ ប្រទេស ម៉ាឡេស៊ី កម្ពុជា ថៃ ប្រវែង ១៣០០គីឡូម៉ែត្រ ហើយមានសមត្ថភាពបញ្ជូនទិន្នន័យបានរហូតដល់ 30 Tbps ជាលើកដំបូងនៅកម្ពុជា បានដាក់ឲ្យប្រើប្រាស់ហើយ នៅថ្ងៃទី ១៥ ខែមីនានេះ។
រដ្ឋមន្រ្តីក្រសួងប្រៃសនីយ៍ និងទូរគមនាគមន៍ លោក ត្រាំ អ៊ីវតឹក បានថ្លែងថានេះ គឺសក្ខីកម្មមួយបង្ហាញពីភាពជាដៃគូយូរអង្វែងរបស់ប្រតិបត្តិករទូរគមនាគមន៍ នៃប្រទេសសមាជិកអាស៊ានទាំងបី ម៉ាឡេស៊ី កម្ពុជា ថៃ ដោយផ្តោតលើ សមត្ថភាពបញ្ជូន-ទទួល លំហូរទិន្នន័យឌីជីថល ក្នុងល្បឿនលឿន និងធំទូលាយ។ ខណៈនៅជុំវិញពិភពលោក មានខ្សែកាបអុបទិកក្រោមបាតសមុទ្រ សរុបជាង ៩០០ពាន់គីឡូម៉ែត្រ ការស្ថាបនាខ្សែកាបអុបទិកក្រោមបាតសមុទ្រ ម៉ាឡេស៊ី កម្ពុជា ថៃ នេះ ក៏ជាផ្នែកមួយ នៃគោលនយោបាយអ៊ីនធើណិតល្បឿនលឿនរបស់កម្ពុជា ដែលបច្ចុប្បន្នកំពុងបន្តពង្រីកសមត្ថភាពនៃការប្រើប្រាស់អ៊ីនធើណិតល្បឿនលឿន និងការប្រើប្រាស់ហេដ្ឋារចនាសម្ព័ន្ធរួម ឲ្យទៅដល់ តំបន់សក្តានុពលសេដ្ឋកិច្ច ទេសចរ និងតំបន់ដាច់ស្រយាលគ្មានសេវាទូរគមនាគមន៍គ្រប់គ្រាន់។ រដ្ឋមន្រ្តីក្រសួងប្រៃសនីយ៍ បានបន្ថែមថា កម្ពុជា ក៏មានបណ្តាញអុបទិកលើគោក ប្រមាណ ៣០.០០០ គីឡូម៉ែត្រ ដែលកំពុងពង្រីកបន្ត ទៅក្នុងរាជធានីខេត្តទូទាំងប្រទេស និងមានគោលដៅ ភ្ជាប់ទៅដល់គ្រប់ឃុំ ត្រឹមឆ្នាំ ២០១៨នេះ។
អគ្គនាយកក្រុមហ៊ុន អ៊ីហ្ស៉ីខម តំណាងភាគីកម្ពុជា លោក ផូល ប្លែន ហ័រហ្គែន ចាត់ទុកថា សមិទ្ធិផលនេះ គឺជាការប្រែក្លាយក្តីស្រមៃទៅជាការពិតមួយ របស់កម្ពុជា ក្នុងការពង្រីកសមត្ថភាពបញ្ជូនទិន្នន័យមួយដែលមានសុវត្ថិភាព និងអ៊ីនធើណិតល្បឿនលឿនជាងមុន ភ្ជាប់ទៅកាន់ពិភពលោក។
លោកស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ រំពឹងថា ពលរដ្ឋកម្ពុជា អាចនឹងទទួលបានអ៊ីនធើណិតប្រើប្រាស់កាន់តែលឿន តម្លៃកាន់តែប្រសើរជាងមុន និងមានសុវត្ថិភាពខ្ពស់។
គួរជម្រាបថា ស្ថានីយខ្សែកាបអុបទិកក្រោមបាតសមុទ្រ ម៉ាឡេស៊ី កម្ពុជា ថៃ នេះ កសាងឡើង ក្រោមកិច្ចព្រមព្រៀងសហការយោគយល់គ្នារវាង ក្រុមហ៊ុន Telcotech ជា បុត្រសម្ព័ន្ធ របស់ ក្រុមហ៊ុន EZECOM រួមនឹងក្រុមហ៊ុន Telekom Malaysia Berhad របស់ ម៉ាឡេស៊ី និងក្រុមហ៊ុន Symphony Communication Public Company Limited របស់ថៃ។ ក្រុមហ៊ុន Huawei Marine Networks Co. Ltd ជាក្រុមហ៊ុនទទួលការកិច្ចសន្យាផ្គត់ផ្គង់សេវា និងភ្ជាប់ខ្សែកាបអុបទិកក្រោមបាតសមុទ្របីប្រទេសលើកនេះ។ កាលពីអំឡុងខែឧសភា ២០១៥ ក្រុមហ៊ុនផ្តល់សេវាអ៊ីនធើណិត EZECOM បានចុះកិច្ចព្រមព្រៀងមួយ ដើម្បីកសាង ខ្សែកាបអុបទិកក្រោមបាតសមុត្រប្រវែង ១៣០០គីឡូម៉ែត្រ ក្នុងតម្លៃជាង ៨០លានដុល្លារ ដោយភ្ជាប់ខេត្ត Cherating ក្នុងប្រទេសម៉ាឡេស៊ី ជាមួយនឹង ខេត្ត Rayong លើទឹកដីថៃ មុនពេលភ្ជាប់សាខា ទៅខេត្តព្រះសីហនុ ប្រទេសកម្ពុជា។ ខ្សែកាបនេះ ក៏មានលទ្ធភាពអាចភ្ជាប់បណ្តាញទំនាក់ទំនងតាមផ្លូវខ្សែកាបក្រោមបាតសមុទ្រ ចម្ងាយ ២០.០០០គីឡូម៉ែត្រ ដែលភ្ជាប់ពីអាស៊ី ទៅអាមេរិក ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ