អតីតមេដឹកនាំខ្មែរក្រហម នួន ជា និងខៀវ សំផន អបអរសាទរបុណ្យចូលឆ្នាំថ្មីក្នុងពន្ធនាគា
ខណៈដែលប្រជាពលរដ្ឋខ្មែរនៅទូទាំងប្រទេស កំពុងចូលរួមអបអរសាទរបុណ្យចូលឆ្នាំថ្មីប្រពៃណីជាតិនោះ អតីតមេដឹកនាំខ្មែរក្រហម លោក នួន ជា និងលោក ខៀវ សំផន ក៍ត្រូវបានអនុញ្ញាតឱ្យចូលរួមអបអរសាទរពិធីបុណ្យចូលឆ្នាំថ្មី នៅក្នុងពន្ធនាគាផងដែរ។ កាលពីថ្ងៃសុក្រម្សិលម៉ិញ ក្រុមគ្រួសារជនជាប់ចោទទាំងពីរ និងមន្ត្រីអនុរក្សពន្ធនាគារបានរៀបចំពិធីសូត្រមន្តដល់ជនជាប់ចោទទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ពិធីសូត្រមន្តដល់ជនជាប់ចោទទាំងពីរ គឺលោក នួន ជា និងលោក ខៀវ សំផន ត្រូវបានក្រុមគ្រួសាររបស់ជនជាប់ចោទនិងមន្ត្រីអនុរក្សពន្ធនាគា រៀបចំធ្វើឡើងនៅក្នុងមន្ទីរឃុំឃាំងបណ្តោះអាសន្នរបស់សាលាក្តីខ្មែរក្រហម ស្ថិតក្រោមការគ្រប់គ្រងរបស់អគ្គនាយកដ្ឋានពន្ធនាគានៃក្រសួងមហាផ្ទៃ កាលពីថ្ងៃសុក្រទី១០មេសា។ នេះបើតាមការបញ្ជាក់ពីលោក នេត្យ ភត្រា អ្នកនាំ ពាក្យសាលាក្តីខ្មែរក្រហម។ ពិធីសូត្រមន្ត គឺធ្វើឡើង ទៅតាមការស្នើសុំរបស់ជនជាប់ចោទ ដើម្បីជាការអបអរសាទរបុណ្យចូលឆ្នាំថ្មី។
បើតាមលោក នេត្យ ភត្រា សាលាក្តីខ្មែរក្រហមតែងតែអនុញ្ញាតឱ្យជនជាប់ចោទទាំងអស់នៅក្នុងពន្ធនាគារ ប្រារព្ធពិធីតាមបែបសាសនាក្នុងមួយឆ្នាំពីរដង គឺបុណ្យភ្ជុំបិណ្ឌម្តង និងបុណ្យចូលឆ្នាំថ្មីម្តង។ បើតាមលោក នេត្យ ភត្រា ដដែល បើទោះបីជាជនជាប់ចោទទាំងពីរស្ថិតនៅក្រោមការឃុំខ្លួនក្តី ក៍ប៉ុន្តែសិទ្ធិសាសនារបស់ពួកគេមិនត្រូវបានហាមឃាតនោះទេ។
សូមបញ្ជាក់ថា ជនជាប់ចោទ នួន ជា និង លោក ខៀវ សំផន គឺជាអ្នកគោរពតាមព្រះពុទ្ធសាសនា ខណៈដែលលោក កាំង ហ្គេវអ៊ាវ ហៅឌុច អតីតមេគុកទួលស្លែងគោរពតាមគ្រឹស្ទសាសនា ។
នួន ជា បងធំទី២នៃរបបខ្មែរក្រហម បច្ចុប្បន្នមានអាយុ៨៨ឆ្នាំ ត្រូវបានសាលាក្តីខ្មែរក្រហមចាប់ឃុំខ្លួនកាលពីខែកញ្ញាឆ្នាំ ២០០៧ ក្រោមបទចោទប្រកាន់ ឧក្រិដ្ឋកម្មប្រឆាំងនឹងមនុស្សជាតិ , ឧក្រិដ្ឋកម្មប្រល័យពូជសាសន៍, ការរំលោភបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវឆ្នាំ១៩៤៩ និងអំពើមនុស្សឃាត ៖ ការធ្វើទារុណកម្ម និងការធ្វើទុក្ខបុកម្នេញខាងផ្នែកសាសនា ដូច មានចែងក្នុងក្រមព្រហ្មទណ្ឌកម្ពុជាឆ្នាំ១៩៥៦។
ចំណែកលោក ខៀវ សំផន អតីតប្រមុខរដ្ឋនៃរបបខ្មែរក្រហម បច្ចុប្បន្នអាយុ៨៤ឆ្នាំ ត្រូវបានសាលាក្តីខ្មែរក្រហមចាប់ខ្លួន កាលពីខែវិច្ឆិការឆ្នាំ២០០៧ ក្រោមបទចោទ ឧក្រិដ្ឋកម្មប្រឆាំងនឹងមនុស្សជាតិ, ឧក្រិដ្ឋកម្មប្រល័យពូជសាសន៍ , ការរំលោភបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវឆ្នាំ១៩៤៩ និង អំពើមនុស្សឃាត។
សូមបញ្ជាក់ថា ក្រោយពីសំរាកក្នុងពិធីបុណ្យចូលឆ្នាំថ្មីនេះ សាលាក្តីខ្មែរក្រហមនឹងបន្តបើកសវនាការលើសំណុំរឿង002/02បន្តទៀតនៅថ្ងៃទី២១មេសាខាងមុខនេះ ដោយបន្តការស្តាប់សក្ខីកម្ម និងការសំអាងហេតុផ្សេងៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ