កម្ពុជា

អ្នកទទួលខុសត្រូវកាសែត The Cambodia Daily ជំនាន់ក្រោយ៣រូប ត្រូវពន្ធដារប្តឹងពីរករណីផ្សេងគ្នា

ទីបំផុតអគ្គនាយកដ្ឋានពន្ធដារនៃក្រសួងហិរញ្ញវត្ថុ កាលពីថ្ងៃទី៤កញ្ញា បានសម្រេចប្តឹងចំនួន២ផ្សេងគ្នាទៅអ្នកគ្រប់គ្រងកាសែត The Cambodia Daily។ ការដាក់ពាក្យបណ្តឹងទៅកាន់តុលាការដែលសារព័ត៌មានទើបទទួលបាននៅថ្ងៃនេះ បានធ្វើឡើងបន្ទាប់ពីកាសែត The Cambodia Daily បដិសេធការបង់ពន្ធជូនរដ្ឋជាង៦លានដុល្លារ និងមានការធ្វើអត្ថាធិប្បាយដោយអ្នកគ្រប់គ្រងកាសែតនេះ ដែលស្ថាប័នពន្ធដារយល់ថាជាការបរិហាកេរ្តិ៍។

ចុះផ្សាយនៅថ្ងៃ៖ 06/09/2017 - 08:51

ដោយ៖ ញឹម សុផល

ផ្សាយពាណិជ្ជកម្ម

នៅក្នុងលិខិតទី១ដែលផ្ញើទីកាន់ព្រះរាជអាជ្ញាអមសាលាដំបូងរាជធានីភ្នំពេញ លោក វ៉ាន់ ពុទ្ធិពល តំណាងអគ្គនាយកដ្ឋានពន្ធដារ ក្រសួងសេដ្ឋកិច្ច និងហិរញ្ញវត្ថុ បានប្តឹងជនបរទេស៣នាក់ គឺទី១លោកស្រី Deborah Krisher-Steele ទី២ លោក Douglas Eric Steele អ្នកទាំងពីរជា ជាកម្មសិទ្ធិករ និង ជាបណ្ណាធិការ នៃក្រុមហ៊ុន Bernard Krisher Jimushi Co.Ltd។ និងជនទី៣គឺលោក Bernard Krisher ជាចាងហ្វាងសារព័ត៌មាន The Cambodia Daily។ បុគ្គលទាំង៣ រងបទចោទដូចគ្នាគឺពីបទគេចវេះពន្ធ និងការប្រព្រឹត្តអំពើរាំងស្ទះដល់ការអនុវត្តបទបញ្ញត្តិស្តីពីពន្ធដារ។

យោងតាមអង្គហេតុ និងអង្គច្បាប់ អគ្គនាយកដ្ឋានពន្ធដារបានលើកឡើងថា កាសែត The Cambodia Daily ដែលបានចាប់ផ្តើមអាជីវកម្មកាលពីឆ្នាំ១៩៩៣មកនោះ មិនបានចុះបញ្ជីនិងបំពេញកាតព្វកិច្ចសារពើពន្ធ គឺជាការប្រព្រឹត្តអំពើរាំងស្ទះការអនុវត្តបទប្បញ្ញត្តិស្តីពីពន្ធដារ ដូចមានចែងក្នុងមាត្រា១២៨នៃច្បាប់ស្តីពីសារពើពន្ធ។ លើសពីនេះ ពាក្យបណ្តឹងក៏បានឲ្យដឹងដែរពីការគេចវេះពន្ធដោយមានការរៀបចំផ្ទេរផ្ទង់ បែបទិញលក់ក្រុមហ៊ុនពីលោក Bernard Krisher មកកូនរបស់គាត់គឺលោកស្រី Deborah Krisher Steele។

ដោយឡែក អគ្គនាយកដ្ឋានពន្ធដារក៏បានដាក់បណ្តឹងផ្សេងមួយទៀត ទៅកាន់តុលាការដែរនៅថ្ងៃជាមួយគ្នានោះ ដោយប្តឹងលោកស្រី Bernard Krisher Steele ជាជនជាតិអាមេរិក ពីបទបរិហាកេរ្តិ៍ជាសាធារណៈ និងស្នើឲ្យមានការផ្តន្ទាទោសតាមច្បាប់និងទាមទារសំណងជំងឺចិត្ត ខាតបង់ពេលវេលាចំនួន៨០០លានរៀល។

បណ្តឹងរបស់ស្ថាប័នពន្ធដារទី២នេះ គឺដោយសារលោកស្រី Bernard Krisher Steele បានប្រាប់តាមប្រព័ន្ធផ្សព្វផ្សាយមួយចំនួនជាសារអេឡិចត្រូនិក ដែលមានខ្លឹមសារថាអគ្គនាយកដ្ឋានពន្ធដារចោទសារព័ត៌មានរបស់លោកស្រីថាជំពាក់ថ្លៃពន្ធ៦,១លានដុល្លារនោះ គឺជាចេតនានយោបាយចង់បិទកាសែតនេះចោលតែម្តង។ មួយវិញទៀត តាមរយៈសារអេឡិចត្រូនិកដែរ លោកស្រី Steele បានធ្វើការចោទប្រកាន់ទៅលើមន្ត្រីពន្ធដារថា បានធ្វើឲ្យបែកធ្លាយនូវព័ត៌មានស្តីពីការកំណត់ពន្ធឡើងវិញ។

សូមបញ្ជាក់ថា មុននឹងឈានដល់ការប្តឹងអ្នកគ្រប់គ្រងកាសែត The Cambodia Daily នេះ អគ្គនាយកដ្ឋានពន្ធដារកាលពីខែកន្លងទៅ បានសរសេរលិខិតទៅកាន់កាសែតThe Cambodia Daily ដើម្បីឲ្យកាសែតនេះបំពេញកាតព្វកិច្ចបង់ពន្ធជូនរដ្ឋ ដែលបានខកខានអស់រយៈពេលជាង២០ឆ្នាំមកហើយ និងទុកឱសានវាទដល់ត្រឹមថ្ងៃទី៤ខែកញ្ញា។ ក៏ប៉ុន្តែអ្នកគ្រប់គ្រងកាសែតThe Cambodia Daily បន្តដែលជាកូនស្រីស្ថាបនិកលោក Bernard Krisher ថ្លែងបដិសេធការទទួលខុសត្រូវលើពន្ធដារពីអតីតកាល ដោយលោកស្រី ទទួលខុសត្រូវចាប់ពីខែមេសាឆ្នាំ២០១៧មកប៉ុណ្ណោះ ជាពេលវេលាដែលកាសែតនេះត្រូវបានគ្រប់គ្រងបន្តពីលោកស្រី បន្ទាប់ពីការលក់ ទិញក្រុមហ៊ុននេះរវាងឱពុកនិងកូន៕