ស្ថានទូតថៃបដិសេធទាំងស្រុងព័ត៌មានថាអាហារកំប៉ុងដែលនាំចូលពីថៃមានផ្ទុកមេរោគអេដស៍
នាថ្ងៃម្សិលមិញពោលគឺថ្ងៃទី៣១ខែធ្នូឆ្នាំ២០១៦នេះស្ថានទូតនៃប្រទេសថៃប្រចាំកម្ពុជាបានចេញសេចក្តីប្រកាសព័ត៌មានច្រានចោលទាំងស្រុងនូវព័ត៌មានដែលថាអាហារកំប៉ុងដែលនាំចូលមកពីថៃមានផ្ទុកមេរោគអេដស៏។សេចក្តីប្រកាសនេះបានធ្វើឡើងបន្ទាប់ពីមានការចែកចាយចុះឡើងនូវព័ត៌មាននេះនៅក្នុងបណ្តាញសង្គមហ្វេសបុកក្នុងរយះពេលប៉ុន្មានថ្ងៃចុងក្រោយនេះ។សូមស្តាប់សេចក្តីរាយការណ៍របស់ ព្រឿន បញ្ញារី៖
ចុះផ្សាយនៅថ្ងៃ៖ កែប្រែថ្ងៃទី៖
នាពេលថ្មីនេះមានការលេចឮព័ត៌មានជាច្រើននៅក្នុងបណ្តាញសង្គមហ្វេសប៊ុកទាក់ទិនទៅនឹងមេរោគអេដស៍ដែលមានផ្ទុកនៅក្នុងអាហារកំប៉ុងដែលបាននាំមកពីប្រទេសថៃ។ គួ រជម្រាបជូនថាការចែកចាយព័ត៌មានតៗគ្នានៅក្នុងបណ្តោញសង្គមនេះមានទម្រង់សារជាសំឡេងនិងសារជាអក្សរនៅក្នុងបរិបទភាសាខ្មែរផងនិងភាសាអង់គ្លេសផង ។
សារជារួមដែលបានផ្សាយទៅវិញទៅមកនោះមានអត្ថន័យយ៉ាងដូច្នេះ ថា៖ “ សូមបងប្អូនកុំបរិភោគអាហារកំប៉ុងដែលបាននាំចូលពីប្រទេសថៃពីព្រោះថ្មីៗនេះមានកម្មករម្នាក់ ដែលមានផ្ទុកមេរោគអេដស៍ហើយដែលបច្ចុប្បន្នកំពុងតែធ្វើការខាងផ្នែកផលិតអាហារគ្រឿងកំប៉ុងនៅក្នុងប្រទេសថៃនេះ បានមុតដៃរហូតដល់មានឈាមដែលមានផ្ទុកមេរោគអេដស៍នោះចូលទៅក្នុងទៅអាងស្តុកអាហារ។ “ ជាមួយគ្នានេះ អត្ថន័យរបស់សារទាំងនោះ ក៏បានអំពាវនាវអោយប្រជាជនទាំងអស់កុំបរិភោគអាហារកំប៉ុងទាំងអស់នោះដើម្បីចៀសវាងការឆ្លងមេរោគ។
ឆ្លើយតបទៅនឹងសារដែលគ្មានប្រភពច្បាស់លាស់ទាំងអស់ ស្ថានទូតថៃនៅទី៣១ ខែ ធ្នូ ឆ្នាំ២០១៦នេះបានច្រានចោលទាំងស្រុងទៅនឹងព័ត៌មាននេះ។ ច្រានចោល តាមរយៈការចេញសេចក្តីប្រកាសព័ត៌មានកម្រាស់២សន្លឹក ពោលគឺភាសាខ្មែរមួយ និងអង់គ្លេសមួយ។ នៅក្នុងនោះដែរ ស្ថានទូតថៃបានបញ្ជាក់យ៉ាងច្បាស់ថាសារដែលបានចែកចាយតគ្នានោះ គឺជាព័ត៌មានក្លែងក្លាយ ហើយមួយវិញទៀតរាជរដ្ឋាភិបាលក៏ដូចជាអាជ្ញាធរថៃក៏មិនបានចេញសេចក្តីថ្លែងការណ៍ណាមួយបញ្ជាក់ពីបញ្ហានេះដែរ។
ក្នុងសេចក្តីប្រកាសព័ត៌មាននេះ ស្ថានទូតថៃក៏បានបញ្ជាក់ថាការលើកឡើងដោយមិនសមហេតុផលនេះ បានធ្វើឡើងដោយជនខិលខូចមួយចំនួនដែលមានបំណង ចង់បង្ខូចក្រុមហ៊ុនដែលផលិត និងនាំចេញផលិតផលថៃ។ ហេតុនេះហើយ ស្ថានឯកអគ្គរាជទូតថៃ ក៏បានអំពាវនាវទៅដល់បងប្អូនទាំងអស់ អោយឈប់ធ្វើការចែកចាយបន្ដនូវព័ត៌មានក្លែងក្លាយមួយនេះតទៅទៀត។
សូមបញ្ជាក់ថា កន្លងមកស្ថានទូតថៃក៏បានប្រទះឃើញព័ត៌មានទាំងអស់នេះ គឺជាព័ត៌មានបំផ្លើសដែលបានផ្សាយចេញតៗគ្នានៅក្នុងប្រទេសប្រ៊ុយណេ ម៉ាឡេស៊ី ឥណ្ឌូនេស៊ី និងហ្វីលីពីនម្តងរួចមកហើយ ពោលគឺនៅក្នុងឆ្នាំ២០១៣ និង២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ