អាមេរិក ជប៉ុន និងកូរ៉េខាងត្បូងព្រមព្រៀងដោះដូរព័ត៌មានសម្ងាត់រឿងនុយក្លេអ៊ែរកូរ៉េខាងជើង
ប្រភពព័ត៌មានផ្លូវការពីកូរ៉េខាងត្បូងបានប្រាប់ឲ្យដឹងនៅថ្ងៃសុក្រ ទី២៦ ធ្នូថា អាមេរិក ជប៉ុន និងកូរ៉េខាងត្បូងទើបបានព្រមព្រៀងគ្នាក្នុងការដោះដូរព័ត៌មានសម្ងាត់ស្តីពីសណុំរឿងនុយក្លេអ៊ែររបស់កូរ៉េខាងជើង។ កិច្ចព្រមព្រៀងពេលនេះបានធ្វើឡើង ចំពេលដែលកូរ៉េខាងជើងកំពុងជាប់ចោទជាចោរអ៊ីធ័រណេតលួចទិន្នន័យរបស់ក្រុមហ៊ុនហូលីថូដសូនីនៅសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:០៤
គឺនៅថ្ងៃចន្ទ ទី២៩ ធ្នូសប្តាហ៍ក្រោយដែលកិច្ចព្រមព្រៀងត្រីភាគីអាមេរិក ជប៉ុន និងកូរ៉េខាងត្បូងស្តីពីការដោះដូរព័ត៌មានសម្ងាត់រឿងនុយក្លេអ៊ែរកូរ៉េខាងជើងត្រូវចុះហត្ថលេខាជាផ្លូវការ នេះបើតាមការប្រកាសឲ្យដឹងរបស់ក្រសួងការពារជាតិកូរ៉េខាងត្បូង។ ចំណែកអ្នកនំាពាក្យរបស់ក្រសួងការពារជាតិនេះវិញបានបញ្ជាក់ថា កម្មវត្ថុសំខាន់នៃកិច្ចព្រមព្រៀងត្រីភាគីពេលនេះ គឺដើម្បីប្រឈមទប់នឹងទង្វើផ្គើនរបស់ក្រុងព្យុងយ៉ាង ព្រមទំាងជួយអាមេរិក ជប៉ុន និងកូរ៉េខាងត្បូងឲ្យឆ្លើយតបភ្លាមៗចំពោះការគំរាមកំហែងនុយក្លែអ៊ែរពីសំណាក់កូរ៉េខាងជើង។
គួរជម្រាបជូនថា សំណុំរឿងនុយក្លេអ៊ែរកូរ៉េខាងជើង ជាសំណុំរឿងមួយស្មុគស្មាញ និងដែលបានអូសបន្លាយអស់ជាច្រើនឆ្នំាមកហើយ។ អ្វីដែលសហគមន៍អន្តរជាតិ មានអាមេរិកនំាមុខកំពុងបារម្ភខ្លំាងនោះ គឺខា្លចតែរបបកុម្មុយនិស្តក្រុងព្យុងយ៉ាងដែលមានបំពាក់ដោយអាវុធបរមាណូស្រាប់នោះ អាចបន្តផលិតគ្រាប់ក្បាលនុយក្លែអ៊ែរទៅបំពាក់លើកាជ្រួចដែលជាអាវុធគំរាមកំហែងនៅក្នុងតំបន់ទំាងមូល។ ក្រុមអ្នកឯកទេសមិនមានមន្ទិលសង្ស័យចំពោះសមត្ថភាពរបស់កូរ៉េខាងជើងទេ ព្រោះក្រុងព្យុងយ៉ាងមានទំនាក់ទំនងជិតស្និតជាមួយប្រទេសអ៊ីរ៉ង់ និងប៉ាគីស្ថានដែលអាចជួយកូរ៉េខាងជើងឲ្យផលិតអាវុធប្រភេទនេះ។
យ៉ាងណាក៏ដោយ ប្រភពពីមន្រ្តីទូតឲ្យដឹងថា កិច្ចព្រមព្រៀងត្រីភាគីអាមេរិក ជប៉ុន និងកូរ៉េខាងត្បូងស្តីពីការដោះដូរព័ត៌មានសម្ងាត់រឿងនុយក្លេអ៊ែរកូរ៉េខាងជើងនោះមិនបានអនុញ្ញាតឲ្យជប៉ុន និងកូរ៉េខាងត្បូងដោះដូរព័ត៌មានតែពីរនាក់ដោយផ្ទាល់ទេ ពោលគឺត្រូវឆ្លងកាត់អាមេរិកជាមុនសិន នេះក៏ដោយសារតែប្រទេសអាស៊ីទំាងពីរធ្លាប់មានទំនាក់ទំនងតានតឹងនៅក្នុងអតីតកាល។ អ្វីជាការកត់សម្គាល់ កិច្ចព្រមព្រៀងត្រីភាគីអាមេរិក ជប៉ុន និងកូរ៉េខាងត្បូងពេលនេះបានកើតមានឡើង ចំពេលដែលអាមេរិក និងកូរ៉េខាងជើងកំពុងបន្តដំឡើងសរសៃ ក ក្នុងសំណុំរឿងក្រុមហ៊ុនហូលីវូដសូនីនៅសហរដ្ឋអាមេរិក។ ទីក្រុងវ៉ាស៊ីនតោនបានចង្អុលចំមុខក្រុងព្យុងយ៉ាងថា ជាចោរអ៊ីធ័រណេតចូលលួចទិន្នន័យរបស់ក្រុមហ៊ុនហូលីវូដសូនី បន្ទាប់ពីក្រុមហ៊ុនមួយនេះត្រៀមចាក់បញ្ចំាងខ្សែភាពយន្តមួយមានចំណងជើងថា « The Interview » ដែលរៀបរាប់ពីគម្រោងផែនការសម្លាប់មេដឹកនំាកូរ៉េខាងជើងគីម ជុនអ៊ុនពីពួក CIA អាមេរិកំាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ