ហេតុអ្វីបានជាវៀតណាមសុខចិត្តធ្វើជាម្ចាស់ផ្ទះរៀបចំជំនួបកំពូលរវាងលោកត្រាំ និងលោកគីម?
គម្រោងជំនួបកំពូលលើកទី២ រវាងលោកប្រធានាធិបតីអាមេរិកដូណាល់ ត្រាំ និងមេដឹកនាំកូរ៉េខាងជើងលោកគីម ជុងអ៊ុននឹងរៀបចំធ្វើនៅថ្ងៃទី២៧ និង ២៨ កុម្ភៈក្នុងប្រទេសវៀតណាម។ ព័ត៌មានមួយនេះត្រូវបានប្រកាសជាផ្លូវការដោយលោកត្រាំនាឱកាសថ្លែងសុន្ទកថាទៅកាន់ប្រជាជាតិនាថ្ងៃអង្គារ ទី៥ កុម្ភៈ។ លោកអ៊ូច ទែរត្រេ (Hugues Tertrais) សាស្រ្តាចារ្យវិទ្យាសាស្រ្តនយោបាយបារាំងម្នាក់ក្នុងទីក្រុងប៉ារីសបានមើលឃើញ ការដែលអាមេរិកជ្រើសយកវៀតណាមដើម្បីរៀបចំជំនួបកំពូលត្រាំ គីមពេលនេះជាជម្រើសនយោបាយ ព្រោះអាមេរិកសំឡឹងឃើញវៀតណាមជាសម្ព័ន្ធមិត្តប្រឆាំងចិន។
ចុះផ្សាយនៅថ្ងៃ៖
ស្តាប់ - ០១:៣១
« ការបែរងាករបស់សហរដ្ឋអាមេរិកទៅរកវៀតណាមទទួលបានជោគជ័យ ហើយវៀតណាមពិតជាយល់មិនច្រឡំទេថា ខ្លួននឹងអាចពឹងពាក់សហរដ្ឋអាមេរិកឲ្យជួយដោះស្រាយបញ្ហាជម្លោះនៅសមុទ្រចិនខាងត្បូងបាន។ ប្រទេសវៀតណាម និងប្រទេសកូរ៉េធ្លាប់មានប្រវត្តិយូរលង់ជាមួយចិន។ វៀតណាម និងកូរ៉េជាប្រទេសពីរដែលធ្លាប់ស្ថិតក្រោមឥទ្ធិពលរបស់ចិន ហើយចិនពិតជាមិនអាចបំភ្លេចបានឡើយ។
វៀតណាម និងកូរ៉េបានស្ថិតក្រោមឥទ្ធិពលរបស់ចិនយ៉ាងយូរ តែតាំងពីពេលនោះមក អ្វីៗបានប្រែប្រួលអស់ហើយ។ បន្ទាប់មកគេអាចនិយាយបានថា វៀតណាម និងកូរ៉េមានប្រវត្តិសង្រ្គាមស្រដៀងគ្នាដែលជាប់ពាក់ព័ន្ធជាមួយសហរដ្ឋអាមេរិក។ សង្រ្គាមវៀតណាមរវាងវៀតណាមខាងជើង និងវៀតណាមខាងត្បូង តែបានបិទបញ្ចប់រួមជាវៀតណាមតែមួយ។ ចំណែកសង្រ្គាមកូរ៉េក៏ជាសង្រ្គាមរវាងកូរ៉េខាងជើង និងកូរ៉េខាងត្បូង តែបានបិទបញ្ចប់ជាមួយនឹងការពុះចែកកូរ៉េជាពីរមកដល់សព្វថ្ងៃ។
ដូច្នេះខ្ញុំយល់ឃើញថា កូរ៉េខាងជើងអាចទទួលបានប្រយោជន៍ពីការរំកិលរកវៀតណាមតែនៅក្នុងករណីណាដែលកូរ៉េខាងជើងស្វែងរកការអភិវឌ្ឍន៍សេដ្ឋកិច្ច និងការបើកចំហសេដ្ឋកិច្ចជាមួយអាស៊ី និងជាមួយពិភពលោក។ ខ្ញុំមិនដឹងថា តើវៀតណាមអាចជាគំរូសម្រាប់កូរ៉េខាងជើងឬអត់ទេ តែបទពិសោធន៍របស់វៀតណាមអាចជាគំនិតមួយសម្រាប់កូរ៉េខាងជើង »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ