ប្រធានាធិបតីហ្វីលីពីនប្រកាសចង់រើសទាហានបន្ថែមពីរម៉ឺននាក់
ប្រឈមមុខនឹងការគំរាមកំហែងសន្តិសុខពីសំណាក់ពួកជីហាតអ៊ីស្លាម ស្និទ្ធនឹងអង្គការរដ្ឋអ៊ីស្លាម លោកប្រធានាធិបតីហ្វីលីពីន ឌុយទែរតេ បានស្នើសុំទៅសភា ឱ្យអនុម័ត ជ្រើសរើសទាហាន២នាក់បន្ថែមទៀត។ នេះបើការជូនដំណឹងរបស់អ្នកនាំពាក្យប្រធានាធិបតី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
នៅថ្ងៃទី ២៣ឧសភា ២០១៧ ពួកអ៊ីស្លាមជ្រុលនិយម បានលើកទង់ជាតិពណ៌ខ្មៅរបស់អង្គការរដ្ឋអ៊ីស្លាម នៅតាមសង្កាត់មួយចំនួននៃក្រុងម៉ារ៉ាវី និងបន្តកាន់កាប់រហូតមកទល់ពេលនេះ។ ក្នុងរយៈពេលជាងពីរខែ ការប្រយុទ្ធប្រឆាំងនឹងពួកប្រដាប់អាវុធអ៊ីស្លាមជ្រុលនិយមដែលប្រកាសភ្ជាប់ខ្លួននឹងអង្គការរដ្ឋអ៊ីស្លាម បានបង្កឱ្យបាត់បង់ជីវិតមនុស្សអស់ជាង៧០០នាក់។ នេះបើតាមតួលេខផ្លូវការ។ ម៉ារ៉ាវី បានក្លាយជាសមរភូមិដ៏ធំ ស្រូបកម្លាំងទាហានអស់យ៉ាងច្រើន រហូតធ្វើឱ្យតំបន់ខ្លះខ្វះកម្លាំងការពារ។
ហេតុដូច្នេះហើយបានជាប្រធានាធិបតីសម្រេចចិត្តស្នើសុំការយល់ព្រមពីសភា ជ្រើសរើសទាហានបន្ថែម ចំនួន ២ម៉ឺននាក់ ស្របតាមក្របខណ្ឌនៃនយោបាយការពារសន្តិសុខជាតិ និងការពារចំណែកមួយនៃទឹកដីដែលរងការគំរាមកំហែងសុវត្ថិភាពយ៉ាងខ្លាំង ។ បើតាមសេចក្តីថ្លែងការណ៍របស់អ្នកនាំពាក្យ ដើម្បីមានលំនឹងប្រយុទ្ធនិងប្រសិទ្ធិភាពជាអតិបរិមា ហ្វីលីពីនត្រូវពង្រាយកម្លាំងទ័ពបន្ថែមនៅក្រុងម៉ារ៉ាវីផង និងនៅតាមចំណុចផ្សេងៗទៀតនៃកោះមីនដាណាវផង។ ប
បច្ចុប្បន្ននេះ កងទ័ពហ្វីលីពីនដែលមានកម្លាំងសរុបប្រមាណជិត១៦៥០០០នាក់ ត្រូវប្រឈមទប់ទល់នឹងការគំរាមកំហែងរបស់ពួកជីហាតនៃអង្គការរដ្ឋអ៊ីស្លាម នៅមីនដាណាវផង ពួកឧទ្ទាមកុម្មុយនិស្តរាយប៉ាយនៅស្ទើរផ្ទៃប្រទេសផង និងត្រូវការពង្រាយកម្លាំងការពារដែនដីនៅសមុទ្ទចិនខាងត្បូង ត្រង់តំបន់ជាប់ជម្លោះជាមួយប៉េកាំងទៀត។ មិនតែប៉ុណ្ណោះ យោធាហ្វីលីពីន ជាប់ឈ្មោះជាយោធាដ៏ក្រីក្រ មានបំពាក់សម្ភារៈបរិក្ខាតិចតួចស្តួងស្តើងជាងគេបំផុតមួយប្រចាំតំបន់ ដោយមានយន្តហោះចម្បាំងតែប្រមាណ១០គ្រឿង ទាហានជើងទឹកមាននាវាចាស់ៗ មួយភាគធំជារបស់ជជុះ។
កាលពីសប្តាហ៍មុន នៅពេលចុះទៅបំពេញទស្សនកិច្ចនៅក្រុងម៉ារ៉ាវី លោកឌុយទែរតេ ក៏បានស្នើសុំផងដែរ ពីសភាឱ្យជួយផ្តល់ហិរញ្ញវត្ថុសម្រាប់ផ្គត់ផ្គង់ទាហានបន្ថែម ប៉ុន្តែ ពុំមានប្រភពណាបញ្ជាក់អំពីចំនួនទឹកប្រាក់ចាំបាច់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ