តុលាការអាមេរិកកាត់ឲ្យ Apple ឈ្នះ Samsung ក្នុងជម្លោះកម្មសិទ្ធិបញ្ញា
កាលពីថ្ងៃសុក្រ ម្សិលមិញនេះ តុលាការអាមេរិកបានកាត់ឲ្យក្រុមហ៊ុន Apple របស់អាមេរិកឈ្នះក្តីលើក្រុមហ៊ុន Samsung របស់កូរ៉េខាងត្បូង ក្នុងវិវាទទាក់ទងនឹងកម្មសិទ្ធិបញ្ញា។ តុលាការបានរកឃើញថា Samsung បានលួចចម្លងម៉ូដែលទូរស័ព្ទរបស់ Apple ហើយបង្គាប់ឲ្យ Samsung បង់លុយសងជំងឺចិត្តដល់ Apple រហូតដល់ទៅជាង ១ពាន់លានដុល្លារ។ ការសម្រេចរបស់តុលាការអាមេរិកនេះបានធ្វើឡើង នៅថ្ងៃជាមួយគ្នា នឹងសេចក្តីសម្រេចរបស់តុលាការកូរ៉េខាងត្បូង ក៏ប៉ុន្តែ តុលាការកូរ៉េខាងត្បូងបានសម្រេចថា ទាំង Apple និងទាំង Samsung សុទ្ធតែមានកំហុស ដោយបានលួចចម្លងម៉ូដែលគ្នាទៅវិញទៅមក។
ចុះផ្សាយនៅថ្ងៃ៖
ស្តាប់ - ០២:៣៨
វិវាទនៅតុលាការ រវាងក្រុមហ៊ុនផលិតទូរស័ព្ទដ៏ធំទាំងពីរ គឺ Apple របស់អាមេរិក និង Samsung របស់កូរ៉េខាងត្បូង គឺជាក្តីក្តាំកម្មសិទ្ធិបញ្ញាដ៏ធំបំផុតមួយ នៅក្នុងរយៈពេលប៉ុន្មានទសវត្សរ៍កន្លងទៅនេះ។ នៅទីចុងបញ្ចប់ គឺក្រុមហ៊ុនកូរ៉េខាងត្បូងជាអ្នកចាញ់ ហើយត្រូវសងការខូចខាតដល់ក្រុមហ៊ុនអាមេរិក រហូតដល់ទៅជាង ១ពាន់លានដុល្លារ ដែលជាទឹកប្រាក់សំណងជំងឺចិត្តដ៏ច្រើនសន្ធឹកសន្ធាប់មិនធ្លាប់មានកន្លងមក។
គួរបញ្ជាក់ថា Apple បានចោទ Samsung ថាបានលួចចម្លងម៉ូដែល និងបច្ចេកវិទ្យាពី iPhone និង iPad យកទៅប្រើក្នុងទូរស័ព្ទដៃប្រភេទ Galaxy និងក្នុង Galaxy Tab។ Samsung ក៏បានចោទ Apple ថាបានលួចចម្លងបច្ចេកវិទ្យារបស់ខ្លួនដែរ។ តុលាការកូរ៉េខាងត្បូង ដែលបានចេញសេចក្តីសម្រេច កាលពីថ្ងៃសុក្រម្សិលមិញនេះដែរ បានសម្រេចថា ក្រុមហ៊ុនទាំងពីរសុទ្ធតែបានលួចចម្លងម៉ូដែល និងបច្ចេកវិទ្យាគ្នាទៅវិញទៅមក ហើយត្រូវសងជំងឺចិត្តដល់គ្នាទៅវិញទៅមក។ តុលាការអាមេរិកវិញ បានសម្រេចដាក់កំហុសតែទៅលើក្រុមហ៊ុន Samsung ម្ខាងប៉ុណ្ណោះ។
ភ្លាមៗក្រោយពីសេចក្តីសម្រេចនេះ ក្រុមហ៊ុន Samsung បានចេញសេចក្តីថ្លែងការណ៍មួយប្រកាសថា ខ្លួននឹងប្តឹងទាស់នឹងសេចក្តីសម្រេចរបស់តុលាការអាមេរិក។
នៅពេលនេះ គេនៅមិនទាន់ដឹងប្រាកដនៅឡើយទេថា តើបរាជ័យនៅក្នុងតុលាការអាមេរិកនេះ អាចនឹងធ្វើឲ្យប៉ះពាល់ដល់កេរ្តិ៍ឈ្មោះ និងការលក់ផលិតផលរបស់ Samsung ត្រឹមកម្រិតណា?
អ្នកវិភាគខ្លះយល់ថា បរាជ័យនេះអាចនឹងធ្វើឲ្យប៉ះពាល់ដល់កេរ្តិ៍ឈ្មោះរបស់ Samsung ដោយសារតែអ្នកប្រើប្រាស់ទូរស័ព្ទដៃនឹងគិតថា ទូរស័ព្ទដៃរបស់ Samsung គ្រាន់តែជាផលិតផលចម្លងពីគេ។ មានអ្នកវិភាគខ្លះទៀតយល់ផ្ទុយទៅវិញ ដោយគេគិតថា ក្តីក្តាំដ៏ធំ និងដ៏ល្បីល្បាញនៅតុលាការអាមេរិកនេះ អាចនឹងធ្វើឲ្យគេស្គាល់ម៉ាក Samsung កាន់តែច្រើនទៅវិញ។ ការលក់ផលិតផល Samsung ក៏ទំនងជាមិនទទួលរងការប៉ះពាល់អ្វីប៉ុន្មានដែរ ដោយសារតែក្តីក្តាំកម្មសិទ្ធិបញ្ញាជាមួយ Apple នេះ ភាគច្រើនទាក់ទងតែនឹងផលិតផល Samsung ម៉ូដែលចាស់ៗ។
ក្រុមហ៊ុន International Data Corporation (IDC) ដែលជាក្រុមហ៊ុនសិក្សាទីផ្សារដ៏ធំមួយជំនាញខាងវិស័យអេឡិចត្រូនិក និង Hi-Tech បានរកឃើញថា នៅចន្លោះពីខែមេសា ដល់ខែមិថុនា កន្លងទៅនេះ Samsung បានលក់ទូរស័ព្ទដៃនៅលើទីផ្សារជុំវិញពិភពលោក រហូតដល់ទៅជាង ៥០លានគ្រឿង ចំណែក Apple វិញ លក់បានតែ ២៦លានគ្រឿងតែប៉ុណ្ណោះ។ ក្រុមហ៊ុន IDC ក៏បានបញ្ជាក់ផងដែរថា នៅក្នុងទីផ្សារទូរស័ព្ទដៃពិភពលោក ដែលមានតម្លៃរហូតដល់ទៅប្រមាណជាង ២០០ពាន់លានដុល្លារ Samsung គ្រប់គ្រងចំណែកទីផ្សាររហូតដល់ទៅ ៣២,៦% ចំណែក Apple វិញ គ្រប់គ្រងបានតែ ១៦,៩% ប៉ុណ្ណោះ។
១ពាន់លានដុល្លារ ដែលតុលាការតម្រូវឲ្យ Samsung សងទៅ Apple គឺជាទឹកប្រាក់ដ៏ច្រើនសន្ធឹកសន្ធាប់មែន ក៏ប៉ុន្តែ វាមានទំហំត្រឹមតែ ១,៥% ប៉ុណ្ណោះ បើធៀបនឹងប្រាក់ចំណូលប្រចាំឆ្នាំ ដែល Samsung រកបានពីការលក់ផលិតផលទូរស័ព្ទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ