ប្រធានាធិបតីចិនជួបក្រុមធុរជនអាមេរិកដើម្បីបង្កើនទំនុកចិត្តនិងទាក់ទាញអ្នកវិនិយោគទុនបរទេស
នៅរដ្ឋធានីប៉េកាំង ប្រធានាធិបតីចិន ស៊ី ជីនពីង បានជួបបណ្តាក្រុមហ៊ុនសហគ្រិនអាមេរិកគ្រាក់ៗ ដើម្បីទាក់ទាញធុរជនអាមេរិកនិងអ្នកវិនិយោគទុនបរទេស។ ជំនួបនេះរៀបចំឡើង១ថ្ងៃបន្ទាប់ពីការបិទបញ្ចប់ទៅនៃវេទិកាធុរកិច្ចចិន។ ក្នុងវេទិកាធុរកិច្ច នាយករដ្ឋមន្ត្រីចិន លី ឈាំង ក៏បានប្រកាសអំពីបំណងលុបចោលរនាំងឧបសគ្គក្នុងវិស័យមួយចំនួនដែលរារាំងនិងរឹតត្បិតចំពោះក្រុមហ៊ុនវិនិយោគទុនបរទេស។
ចុះផ្សាយនៅថ្ងៃ៖
ស្តាប់ - ០៣:៣២
ប្រធានាធិបតីចិន ស៊ី ជីនពីង បានជួបសំណេះសំណាលព្រឹកថ្ងៃពុធ ជាមួយតំណាងសហគមន៍ធុរជនអាមេរិក នៅវិមានប្រជាជនចិន។ នេះបើតាមទូរទស្សន៍រដ្ឋចិនស៊ីស៊ីធីវី ដោយគ្មានបញ្ជាក់លម្អិតថា អ្នកវិនិយោគទុនអាមេរិករូបណាខ្លះចូលរួមក្នុងជំនួបទេ។ បើតាមរូបភាពដែលទីភ្នាក់ងារបារាំងអាអេហ្វប៉េពិនិត្យមើល គេឃើញថា ក្នុងចំណោមសហគ្រិនអាមេរិកសំខាន់ៗ ក៏មានដែរ លោក គ្រីស្ទីយ៉ាណូ អេម៉ុន អគ្គនាយក Qualcomm ក្រុមហ៊ុនអាមេរិកជំនាញខាងផលិតគ្រឿងបរិក្ខារអេឡិចត្រូនិច មូលដ្ឋាននៅកាលីហ្វ័រញ៉ា ហើយនិងលោក ស្ទេហ្វាន ស្ហ្វារហ្ស៍ម៉ាន់ អគ្គនាយកក្រុមហ៊ុនវិនិយោគទុន Blackstone មូលដ្ឋាននៅក្រុងញូវយ៉ក។
ការទទួលជួបអ្នកនិវិយោគទុនអាមេរិកពីសំណាក់ថ្នាក់ដឹកនាំកំពូលចិន ជាការកម្តៅទំនុកចិត្ត ពីព្រោះថា ជាច្រើនខែមកហើយដែលឈ្មួញបរទេសថ្លែងក្តីបារម្ភនិងត្អូញត្អែរកង្វល់ពីមុខជំនួយរបស់ខ្លួននៅចិន ដោយសារតែឧបសគ្គនានាខាងផ្លូវច្បាប់ ហើយនិងការប្រកួតប្រជែងមិនស្មោះត្រង់។ រដ្ឋអំណាចចិនឲ្យតម្លៃនិងផ្តល់ឱកាសច្រើនដល់ក្រុមហ៊ុនក្នុងស្រុកនិងក្រុមហ៊ុនសាធារណៈរបស់រដ្ឋចិន ហើយនិងធ្វើទុក្ខបុកម្នេញចំពោះក្រុមហ៊ុនបរទេស។ ការធ្វើទុក្ខបុកម្នេញច្រើនរូបភាព រាប់ចាប់តាំងពីការលួចកម្មសិទ្ធិបញ្ញា ជាដើម។ មិនតែប៉ុណ្ណោះ នៅមានការចុះត្រួតពិនិត្យឆែកឆេរនិងចាប់សហគ្រិនបរទេសសួរចម្លើយ ក្រោមអំណាចច្បាប់ប្រឆាំងអំពើភេរវកម្ម ដែលទើបនឹងចូលជាធរមាននៅខែកក្កដាឆ្នាំមុន ក្រោយពីវិសោធនកម្មរួច។ ច្បាប់នេះ ត្រូវ ឈ្មួញបរទេស រិះគន់ថា រដ្ឋអំណាចចិនបកស្រាយស្រេចនឹងអំពើចិត្ត។ លោកស្រី ជីណា ម៉ែរី រ៉ៃមុនដូ រដ្ឋមន្ត្រីពាណិជ្ជកម្មអាមេរិក ក្នុងដំណើរទៅប៉េកាំង ខែសីហាឆ្នាំទៅមិញ ក៏បានលើកឡើងពីបរិយាកាសដ៏លំបាកក្នុងវិស័យធុរកិច្ចចិន ហើយនិងព្រមានពីហានិភ័យធ្ងន់ចំពោះការវិនិយោគទុននៅស្រុកចិន។
ជំនួបរបស់លោក ស៊ី ជីនពីង និងធុរជនអាមេរិក នៅពេលនេះ រៀបចំឡើង១ថ្ងៃបន្ទាប់ពីការបិទបញ្ចប់ទៅនៃវេទិកាធុរកិច្ចចិន។ ក្នុងវេទិកាធុរកិច្ច នាយករដ្ឋមន្ត្រីចិន លី ឈាំង ក៏បញ្ជាក់ក្តីរំពឹងជាថ្មី ថាកំណើនសេដ្ឋកិច្ចឆ្នាំនេះ រង្វង់៥%។ ដើម្បីទាក់ទាញអ្នកវិនិយោគទុនបរទេស និងជួយទ្រទ្រង់កំណើនសេដ្ឋកិច្ចជាតិ, លោក លី ឈាំង ប្រកាសថារដ្ឋអំណាចក្រុងប៉េកាំងនឹងលុបចោលឧបសគ្គរារាំងមួយចំនួនចំពោះក្រុមហ៊ុនបរទេស ពិសេសវិស័យបច្ចេកវិទ្យាព័ត៌មានវិទ្យា ធនាគារ និងធនារ៉ាប់រង។ អគ្គនាយកក្រុមហ៊ុន Apple លោក ធីម ខុក ដែលចូលរួមវេទិកាធុរកិច្ចចិនទើបចប់ថ្មីៗដើមសប្តាហ៍នេះ បានថ្លែងប្រាប់អ្នកកាសែតថា ក្រុមហ៊ុន Apple នឹងបន្តវិនិយោគបន្ថែមទៀតនៅចិន។
ចិនប្រឈមមុខនឹងកំណើនសន្ទុះសេដ្ឋកិច្ចទាប ហើយនយោបាយភូមិសាស្ត្រ ក៏ប្រទះបញ្ហាភាពតានតឹងជាច្រើននៅក្នុងតំបន់និងអន្តរជាតិ។ អាស្រ័យហេតុដូច្នេះហើយ ទើបថ្នាក់ដឹកនាំចិន កំពុងស្វែងរកទំនុកចិត្តពី សហគ្រិនអ្នកវិនិយោគទុនបរទេស ដើម្បីរំពឹងធានាដល់ការរក្សាកំណើនសេដ្ឋកិច្ច។ ដ្បិត ទិដ្ឋន័យផ្លូវការ បង្ហាញថា ការវិនិយោទុនបរទេសនៅស្រុកចិន បានធ្លាក់ចុះខ្លាំង បើធៀបនឹងរយៈ៣ទសវត្សរ៍ចុងក្រោយ។ ជាក់ស្តែង ក្នុងឆ្នាំ២០២៣ ការវិនិយោគទុនបរទេសនៅចិន ធ្លាក់ចុះ ៨% ហើយបន្តចុះទៀត ដល់១១,៧% ក្នុងខែមករា ដើមឆ្នាំ២០២៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ