ប្រជាជនភូមា ដង្ហើយហៅឲ្យសហគមអន្តរជាតិ រួបរួមគ្នាជួយភូមាផង
យ៉ាងហោចណាស់ មានក្រុមឧទ្ទាមជនជាតិភាគតិច ចំនួន២នៅភូមា បានប្រកាសគោលជំហរ ប្រឆាំងនឹងរបបសិកភូមា និងបានព្យួរបទឈប់បាញ់ ដែលបានចុះជាមួយកងទ័ពភូមា។ ក្រោយដំណឹងនេះ ប្រជាជនភូមា បានទះដៃអបអរសាទរ អរគុណដល់ក្រុមឧទ្ទាមជនជាតិភាគតិច ដែលគាំទ្របាតុកម្មតវ៉ា របស់ពួកគេ។ បាតុកម្មដែលនៅតែបន្ត បើទោះបីជាចំនួនមនុស្សស្លាប់ បានកើនឡើងខ្លាំង ពីមួយថ្ងៃទៅមួយថ្ងៃក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ប្រជាជនភូមា បុគ្គលិកស្ថានប័នរដ្ឋ និងឯកជន បន្តធ្វើពហិកា មិនចូលធ្វើការ និងបន្តជួបជុំគ្នាដង្ហែរក្បួនទូទាំងប្រទេស ដើម្បីប្រឆាំងនឹងរបបសិកភូមា។ នៅថ្ងៃចន្ទ គេបានអំពាវនាវ ឲ្យគ្រប់គ្នាទះដៃអបអរ អរគុណចំពោះក្រុមឧទ្ទាមប្រដាប់អាវុធ ជនជាតិភាគតិចការ៉េន និងក្រុមជនជាតិហ្សាន ដែលមានសេចក្តីក្លាហាន ប្រកាសគាំទ្រចលនាបាតុកម្ម របស់ប្រជាជន។
លោក Yawd Serk មេបញ្ជាការម្នាក់នៃកងកម្លាំងរំដោះរដ្ឋហ្សាន បានប្រកាសប្រាប់អ្នកកាសែតបារាំងថា ក្រុមលោកបានសម្រេចព្យួរ កិច្ចព្រមព្រមព្រៀងឈប់បាញ់ ដែលបានចុះហត្ថលេខា ជាមួយកងទ័ពភូមាកាលពីឆ្នាំ២០០៥ ព្រោះថាកងទ័ពជាតិភូមា បានក្បត់ពាក្យសន្យា ធ្វើការបង្ហូរឈាមសម្លាប់ប្រជាពលរដ្ឋ។
សូមបញ្ជាក់ថា គិតត្រឹមថ្ងៃទី៥មេសា យោងតាមអង្គការជួយអ្នកទោសនយោបាយនៅភូមា (AAPP) គឺមានបាតុករយ៉ាងហោច ៥៦០នាក់បានស្លាប់ ដោយការបង្ក្រាបបាញ់រះ និងប្លោងគ្រាប់រ៉ូកែតរបស់កងទ័ព។ ចំនួនអ្នកស្លាប់អាចមានច្រើនជាងនេះ ដោយសារមានមនុស្សបាត់ខ្លួនជាច្រើននាក់ ក្នុងចំណោមអ្នកដែលគេចាប់ ចំនួន២៧០០នាក់។
នៅចុងសប្តាហ៍កន្លងទៅ កងទ័ពភូមា បានចេញបញ្ជាឲ្យកាត់ផ្តាច់បណ្តាញអ៊ីនធ័រណិត ទូទាំងប្រទេស ដើម្បីបំបិតកុំឲ្យបាតុករ ធ្វើការចែករំលែក សារ រូបថត និងវីដេអូ នៅតាមបណ្តាញសង្គម។ ហើយទន្ទឹមគ្នានេះ បណ្តាញព័ត៌មានផ្លូវការរបស់កងទ័ព បានផ្សព្វផ្សាយឃោសនា ចោទប្រកាន់បាតុករ ថាបានបង្កអំពើហិង្សា អន្តិសុខសង្គម។
ទោះយ៉ាងនេះក្តី នៅថ្ងៃចន្ទ ទី៥មេសា គេសង្កេតឃើញ បាតុកម្មនៅតែមានសន្ទុះខ្លាំងក្លាដដែល នៅតាមទីក្រុងនានា ដោយខ្លះដើរដង្ហែរក្បួរ ខ្លះជិះម៉ូតូដង្ហែរ។ ប្រជាជនភូមានៅតាមតំបន់ជាប់ព្រំដែនថៃ បានងាកទៅទិញលេខទូរស័ព្ទ និងកាតស៊ីមរបស់ថៃ ដើម្បីទទួលបានសេវាអ៊ីនធ័រណិត។ ជាថ្មីម្តងទៀត ប្រជាជនភូមានៅទីក្រុងម៉ាន់ដាឡេ រាប់ពាន់នាក់ បានដង្ហើយហៅឲ្យសហគមអន្តរជាតិ ត្រូវរកវិធីជួយស្រោចស្រង់ប្រជាធិបតេយ្យភូមាឲ្យបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ