ធនាគារពិភពលោក៖សេដ្ឋកិច្ចកម្ពុជាប្រឹងឈានទៅមុខទោះជួបឧបសគ្គចំពោះមុខ
សេដ្ឋកិច្ចកម្ពុជាប្រឹងឈានទៅមុខទោះត្រូវប្រឈមបញ្ហាក្នុងស្រុកនិងក្រៅក៏ដោយ។ នេះជាការព្យាករណ៍របស់ធនាគារពិភពលោកប្រចាំនៅប្រទេសកម្ពុជានៅថ្ងៃទី២២ខែវិច្ឆិកាឆ្នាំ២០២៣។
ចុះផ្សាយនៅថ្ងៃ៖
បញ្ហាប្រឈមក្នុងស្រុកត្រូវបានធនាគារពិភពលោកមើលឃើញថា បើទោះជាមានការវិនិយោគច្រើនទៅលើហេដ្ឋារចនាសម្ព័ន្ធសាធារណៈកន្លងមកក្ដី តែផ្នែកដឹកជញ្ជូននិងប្រព័ន្ធឡូហ្ស៊ីស្ទិកដែលមានសមត្ថភាពនៅមានកម្រិតនិងការផ្គត់ផ្គង់ថាមពលដែលពិបាកទុកចិត្តបាននៅតែបន្តជាបន្ទុកខ្ពស់លើចំណាយថ្លៃដើមរបស់ធុរកិច្ចនិងអ្នកប្រើប្រាស់ទូទៅ។ ចំណែកបញ្ហាប្រឈមពីខាងក្រៅវាស្ដែងឡើងតាមរយៈការច្របាច់បញ្ចូលគ្នារវាងការរាតត្បាតជំងឺសកល សង្គ្រាមរវាងរុស្ស៊ីនិងអ៊ុយក្រែន និងអត្រាការប្រាក់ខ្ពស់លើទីផ្សារអន្តរជាតិត្រូវបានគេរំពឹងថា នៅតែជាឧបសគ្គដល់កំណើនសេដ្ឋកិច្ចកម្ពុជា។
ចំពោះវិស័យទេសចរណ៍វិញ បើទោះបីជាមានភ្ញៀវទេសចរអន្តរជាតិចូលប្រទេសវិញជាហូរហែរក៏ដោយប្រាក់ចំណូលនៅតាមគោលដៅទេសចរណ៍សំខាន់ៗមួយចំនួននៅតែមានចំនួនទាបជាងមុនការផ្ទុះជំងឺកូវីដ១៩។ ក្នុងពេលជាមួយគ្នានេះការវិនិយោគលើផលិតផលទំនិញរួមមានៈសម្លៀកបំពាក់និងការនាំចេញទំនិញសម្រេចបានធ្លាក់ចុះហើយជាលទ្ធផលការងារនៅផ្នែកឧស្សាហកម្មផលិតកម្មបានធ្លាក់ចុះ៥ភាគរយ។
បញ្ហាទាំងនេះបានធ្វើឲ្យកំណើនសេដ្ឋកិច្ចកម្ពុជាក្នុងឆ្នាំ២០២៣ ថយមកនៅ៥,៤ភាគរយដែលពីដំបូងឡើយធនាគារពិភពលោកព្យាករណ៍ថា នឹងមានកំណើន៥,៥ភាគរយ និង៥,៨ភាគរយក្នុងឆ្នាំ២០២៤ និង៦,១ភាគរយក្នុងឆ្នាំ២០២៥ ជាមួយនឹងការរំពឹងទុកអំពីការកើនឡើងនូវការវិនិយោគហេដ្ឋារចនាសម្ព័ន្ធ និងអំពីអត្ថប្រយោជន៍ដែលកើតចេញពីកិច្ចព្រមព្រៀងពាណិជ្ជកម្មនានាដែលកម្ពុជាមានជាមួយបណ្ដាប្រទេសក្នុងតំបន់។
ធនាគារពិភពលោកបានព្រមានថា កំណើនសេដ្ឋកិច្ចកម្ពុជាអាចនៅតែរងផលប៉ះពាល់បន្ថែមទៀតដោយសារការចុះខ្សោយនៃតម្រូវការពិភពលោកឬស្បៀងអាហារថ្លៃឡើងវិញសម្រាបពេលខាងមុខ ខណៈបញ្ហាក្នុងស្រុកប្រឈមការកើនឡើងនៃបំណុលគ្រួសារនិងឥណទានក្នុងស្រុកលើវិស័យអចលនទ្រព្យនៅតែជាហានិភ័យដដែល។
លោកស្រី ម៉ារីយ៉ាម សាលីម នាយកគ្រប់គ្រងនៃធនាគារពិភពលោកប្រចាំនៅកម្ពុជាលើកឡើងនៅក្នុងសេចក្ដីប្រកាសព័ត៌មាននៅថ្ងៃទី២២ខែវិច្ឆិកាឆ្នាំ២០២៣ថា ដើម្បីរក្សាបានកំណើនសេដ្ឋកិច្ច កម្ពុជាចាំបាច់ត្រូវជួយវិស័យឯកជនឲ្យបំពេញមុខងារជាក្បាលម៉ាស៊ីន ហើយត្រូវធ្វើសកម្មភាពភ្លាមៗក្នុងការកែលម្អវិស័យសាធារណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ