ក្រុមគ្រួសារ៖ ការអះអាងពីកូនឥតខាន់ស្លារបស់លោក ស៊ីន ស៊ីសាមុត គឺគ្មានមូលដ្ឋាន
ក្រុមគ្រួសារអធិរាជសំឡេងមាស ស៊ីន ស៊ីសាមុត នៅថ្ងៃទី៤តុលានេះ បានចេញលិខិតចំហមួយដោយបដិសេធចំពោះការអះអាងថា លោក ស៊ីន ស៊ីសាមុត មានកូនឥតខាន់ស្លា ជាមួយនឹងស្រីផ្សេងក្រៅពីភរិយាស្របច្បាប់។
ចុះផ្សាយនៅថ្ងៃ៖
ស្តាប់ - ០១:៤០
នៅក្នុងលិខិតដែលមានផ្តិតមេដៃដោយមនុស្ស៣នាក់ជាតំណាងក្រុមគ្រួសារលោក ស៊ីន ស៊ីសាមុត គឺបានចាត់ទុកការលើកឡើងថា លោក ស៊ីន ស៊ីសាមុត មានកូនឥតខាន់ស្លាផងដែរនោះ គឺមិនមែនជាលើកទី១ទេ ហើយថាបន្តវែកញ៉ែកពីករណីនេះ មានមតិខ្លះបានធ្វើឲ្យប៉ះពាល់កិត្តិយស របស់ក្រុមគ្រួសារអធិរាជសំឡេងមាសរូបនេះថែមទៀត។
នៅចំពោះមុខនេះ តំណាងក្រុមគ្រួសារអធិរាជសំឡេងមាស ស៊ីន ស៊ីសាមុត បានអំពាវនាវឲ្យមានការបញ្ចេញមតិដោយសេចក្តីថ្លៃថ្នូរ ខណៈការបកស្រាយពីកម្មសិទ្ធិបញ្ញាវិញដែលក្រុមគ្រួសារលោក ស៊ីន ស៊ីសាមុត ទទួលបាននោះ គឺទុកឲ្យមេធាវីជាអ្នកបកស្រាយតាមផ្លូវច្បាប់។
សូមបញ្ជាក់ថា ការផ្ទុះឡើងនៃការវែកញ៉ែករឿងរ៉ាវអតីតកាលរបស់លោក ស៊ីន ស៊ីសាមុត នេះបានកើតបន្ទាប់ពី លោក បឺត សំរេច ជាអតីតកីឡាប្រដាល់ និងបច្ចុប្បន្នជាអ្នកចម្រៀង បានចេញមុខអះអាងថា លោកគឺជាកូនរបស់លោក ស៊ីន ស៊ីសាមុត។ ការអះអាងបែប នេះបានធ្វើឲ្យមហាជនខ្លះជឿ ដោយសារតែលោកមានទឹកដមសំឡេងប្រហាក់ប្រហែលគ្នានឹងអធិរាជសំឡេងមាស ស៊ីន ស៊ីសាមុត។
នៅចំពោះមុខភាពស្រពិចស្រពិលនេះ មហាជនខ្លះបានទាមទារឲ្យធ្វើការពិនិត្យ DNA របស់ លោក បឺត សំរេច និងកូនៗរបស់លោក ស៊ីន ស៊ីសាមុត ដែលនៅរស់។ ប៉ុន្តែភ្លាមៗនោះ ភរិយា លោក ស៊ីន ស៊ីសាមុត គឺអ្នកស្រី ខាវ ថងញ៉ុត បានទាត់ចោលការចង់បានបែបនេះ ខណៈលោក បឺត សំរេច បានយល់ព្រមធ្វើការពិនិត្យDNA៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ