ប្រទេសកម្ពុជាចូលជាភាគីអនុសញ្ញាទីក្រុងប៊ែន ស្ដីពីកិច្ចការពារស្នាដៃអក្សរសាស្ត្រនិងសិល្បៈ
កម្ពុជាបានចូលជាភាគីអនុសញ្ញាទីក្រុងប៊ែន ស្ដីពីកិច្ចការពារស្នាដៃអក្សរសាស្ត្រនិងសិល្បៈ តាមរយៈការតម្កល់លិខិតុបករណ៍ទៅកាន់លោក Daren Tang អគ្គនាយកអង្គការកម្មសិទ្ធិបញ្ញាពិភពលោក កាលពីថ្ងៃទី០៩ខែធ្នូកន្លងទៅ។ នេះបើតាមការប្រកាសរបស់ក្រសួងពាណិជ្ជកម្មកម្ពុជា។ លោក ប៉ាន សូរស័ក្តិ រដ្ឋមន្ដ្រីក្រសួងពាណិជ្ជកម្ម និងជាប្រធានគណៈកម្មាធិការជាតិគ្រប់គ្រងកម្មសិទ្ធិបញ្ញា សង្កត់ធ្ងន់ថា ការចូលជាភាគីអនុសញ្ញាទីក្រុងប៊ែននេះ បង្ហាញពីការប្ដេជ្ញាចិត្តរបស់កម្ពុជា ក្នុងការចូលរួមពង្រឹងប្រព័ន្ធកម្មសិទ្ធិបញ្ញានៅកម្ពុជាឲ្យកាន់តែរឹងមាំបន្ថែមទៀត។
ចុះផ្សាយនៅថ្ងៃ៖
អនុសញ្ញាទីក្រុងប៊ែន ស្ដីពីកិច្ចការពារស្នាដៃអក្សរសាស្ត្រនិងសិល្បៈ ត្រូវបានអនុម័តដំបូងនៅឆ្នាំ១៨៨៦ និងចូលជាធរមានបន្ទាប់ពីការអនុម័តនោះមួយឆ្នាំ គឺនៅឆ្នាំ១៨៨៧។ គិតត្រឹមពេលនេះ មានប្រទេសចំនួន១៧៩ហើយ ដែលចូលជាភាគីនៃអនុសញ្ញានេះ។ តាមគោលការណ៍ ប្រទេសដែលចូលជាភាគីអនុសញ្ញាប៊ែន ត្រូវគោរពកម្មសិទ្ធិបញ្ញានៃប្រទេសជាភាគីផ្សេងទៀត ហើយទន្ទឹមគ្នានេះ ប្រទេសភាគីក៏តម្រូវឲ្យកំណត់ស្តង់ដារអប្បបរមាមួយ សម្រាប់ច្បាប់ស្ដីពីកម្មសិទ្ធិបញ្ញាផងដែរ។
លោក ប៉ាន សូរស័ក្តិ រដ្ឋមន្ដ្រីក្រសួងពាណិជ្ជកម្ម និងជាប្រធានគណៈកម្មាធិការជាតិគ្រប់គ្រងកម្មសិទ្ធិបញ្ញា សង្កត់ធ្ងន់ថា ការចូលជាភាគីអនុសញ្ញាទីក្រុងប៊ែននេះ បង្ហាញពីការប្ដេជ្ញាចិត្តរបស់កម្ពុជា ក្នុងការចូលរួមពង្រឹងប្រព័ន្ធកម្មសិទ្ធិបញ្ញានៅកម្ពុជាឲ្យកាន់តែរឹងមាំបន្ថែមទៀត។ តាមរយៈការចូលជាភាគីអនុសញ្ញានេះដែរ លោករដ្ឋមន្ដ្រី ប៉ាន សូរស័ក្តិ សង្ឃឹមថា កម្ពុជានឹងអាចទាញយកប្រយោជន៍ជាអតិបរមាពីកិច្ចការពារស្នាដៃអក្សរសាស្ត្រ និងសិល្បៈ ក៏ដូចជារួមចំណែកលើកតម្កើងវប្បធម៌របស់កម្ពុជា ក្នុងក្របខណ្ឌអន្ដរជាតិ ស្របតាមគោលការណ៍នៃអនុសញ្ញាប៊ែន។
សូមជម្រាបដែរថា បន្ទាប់ពីចូលជាភាគីនៃអនុសញ្ញាប៊ែន កម្ពុជានឹងទទួលបានសិទ្ធិប្រើប្រាស់ និងបោះពុម្ពស្នាដៃអក្សរសាស្ត្ររបស់បរទេស សម្រាប់លើកកម្ពស់ការអប់រំ ការស្រាវជ្រាវ និងការអភិវឌ្ឍនៅកម្ពុជា ឲ្យកាន់តែរីកចម្រើនទៅមុខបន្ថែមទៀត។
អ្នកធ្វើការក្នុងវិស័យអក្សរសាស្ត្រនិងសិល្បៈ បានសម្ដែងការស្វាគមន៍ចំពោះការចូលជាភាគីអនុសញ្ញាទីក្រុងប៊ែនរបស់កម្ពុជានាពេលនេះ។ អនុសញ្ញាទីក្រុងប៊ែននេះ នឹងជួយឲ្យម្ចាស់ស្នាដៃអក្សរសាស្ត្រនិងសិល្បៈនៅកម្ពុជា ទទួលបានការការពារក្នុងក្របខណ្ឌអន្ដរជាតិ ជាពិសេសទាក់ទងនឹងសិទ្ធិបេតិកភណ្ឌនិងសិទ្ធិសីលធម៌។ នេះបើតាមការពន្យល់របស់ក្រុមអ្នកធ្វើការក្នុងវិស័យអក្សរសាស្ត្រនិងសិល្បៈនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ