ម្រេចកំពត ទទួលបានការការពារកម្មសិទ្ធិបញ្ញានៅតាមប្រទេសចំនួន៣២ ជាលក្ខណៈអន្តរជាតិ
ក្រៅពីបានក្លាយជាទំនិញសម្គាល់ភូមិសាស្រ្តនៅទីផ្សារសហភាពអឺរ៉ុប ម្រេចកំពត របស់កម្ពុជា ត្រូវបានចុះបញ្ជីការពារជាលក្ខណៈអន្តរជាតិ នៅបណ្តាប្រទេសចំនួន៣២ ក្រោមច្បាប់ទីក្រុងហ្សឺណែវ ស្តីពីកិច្ចព្រមព្រៀងទីក្រុងលីស្បោនអំពីឈ្មោះប្រភពដើមទំនិញ និងម៉ាកសម្គាល់ភូមិសាស្ត្រទំនិញ។ ការទទួលបានការការពារម្រេចកំពតនៅប្រទេសទាំង៣២នេះ គឺបន្ទាប់ពីក្រសួងពាណិជ្ជកម្មកម្ពុជា បានដាក់លិខិតស្នើសុំទៅអង្គការកម្មសិទ្ធិបញ្ញា កាលពីដើមឆ្នាំ២០២០មកនេះ។
ចុះផ្សាយនៅថ្ងៃ៖
ស្តាប់ - ០១:៥៧
ម្រេចកំពត គឺជាទំនិញសម្គាល់ភូមិសាស្រ្ត ជាលក្ខណៈអន្តរជាតិ ដែលទទួលបានការចុះបញ្ជីការពារ ក្រោមច្បាប់ទីក្រុងហ្សឺណែវ ស្តីពីកិច្ចព្រមព្រៀងទីក្រុងលីស្បោន លើឈ្មោះប្រភពដើមទំនិញ និងម៉ាកសម្គាល់ភូមិសាស្ត្រទំនិញ ដោយមានការផ្តួចផ្តើមពីរដ្ឋមន្រ្តីក្រសួងពាណិជ្ជកម្ម លោកប៉ាន សូរស័ក្តិ។
ប្រទេសកម្ពុជា បានដាក់ពាក្យស្នើសុំចុះបញ្ជីការពារម៉ាកសម្គាល់ភូមិសាស្ត្រទំនិញ“ម្រេចកំពត” ជាលក្ខណៈអន្តរជាតិនេះ គឺចាប់ពីថ្ងៃទី២១ ខែតុលា ឆ្នាំ២០២០មក។ បច្ចុប្បន្ន “ម្រេចកំពត” នឹងទទួលបានកិច្ចការពារស្របច្បាប់ មិនឱ្យភាគីទីបីណាមួយប្រើប្រាស់ឈ្មោះដោយគ្មានការអនុញ្ញាត និងរំលោភបំពាននានា ចំពោះម៉ាកសម្គាល់ភូមិសាស្រ្តទំនិញ ក្នុងបណ្តាប្រទេសជាភាគីហត្ថលេខី។
តាមក្រសួងពាណិជ្ជកម្ម ទម្រាំនឹងម្រេចកំពត ក្លាយជាទំនិញសម្គាល់ភូមិសាស្រ្ត ជាលក្ខណៈអន្តរជាតិនេះ កម្ពុជាបានដាក់តម្កល់លិខិតតុបករណ៍នៃការចូលជាសមាជិក នៃច្បាប់ទីក្រុងហ្សឺណែវ ស្តីពីកិច្ចព្រមព្រៀងទីក្រុងលីស្បោន លើឈ្មោះប្រភពដើមទំនិញ និងម៉ាកសម្គាល់ភូមិសាស្ត្រទំនិញ នៅអង្គការកម្មសិទ្ធិបញ្ញាពិភពលោក (WIPO) ដោយស្របច្បាប់ ហើយបានចូលជាធរមាននៅថ្ងៃទី២៦ ខែកុម្ភៈ ឆ្នាំ២០២០។
គួររម្លឹកដែរថា ក្នុងចំណោមម៉ាកសម្គាល់ភូមិសាស្រ្តទំនិញដទៃទៀតជាច្រើន ក្រសួងពាណិជ្ជកម្មបានជ្រើសរើសយកតែ “ម្រេចកំពត”នេះ ជាម៉ាកសម្គាល់ភូមិសាស្រ្តទំនិញទី១ យកមកចុះបញ្ជីនៅក្រសួងពាណិជ្ជកម្ម កាលពីថ្ងៃទី០២ ខែមេសា ឆ្នាំ២០១០ ដោយមានបំណងកសាងនូវកេរ្តិ៍ឈ្មោះ ការធ្វើពិពិធកម្មទីផ្សារ និងទប់ស្កាត់ការក្លែងបន្លំទំនិញសម្គាល់ភូមិសាស្រ្ត “ម្រេចកំពត” នៅក្នុងតំបន់ និងអន្តរជាតិ ហើយក្រសួងពាណិជ្ជកម្មក៏បានចុះបញ្ជីការពារម៉ាកសម្គាល់ភូមិសាស្រ្តទំនិញ “ម្រេចកំពត” នៅប្រទេស ថៃ វៀតណាម និងនៅលើទីផ្សារសហភាពអឺរ៉ុបផងដែរ កាលពីឆ្នាំ២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ