ទស្សនកិច្ចលោកឃែររី នៅអារ៉ាប៊ី សាអូឌីត
នៅក្រុងចេតដា ភាគខាងលិចអារ៉ាប៊ីសាអូឌីត ថ្ងៃព្រហស្បតិ៍២៥សីហានេះ ប្រមុខការទូតអាមេរិក ចន ឃែររី បានជួបថ្នាក់ដឹកនាំអារ៉ាប់ អង់គ្លេស ក៏ដូចជាមន្ត្រីអង្គការសហប្រជាជាតិ ពិភាក្សាពីវិបត្តិជម្លោះនៅយេម៉ែន ស៊ីរី និងលីប៊ី។ បន្ទាប់ពីអារ៉ាប៊ីសាអូឌីត ថ្ងៃសុក្រនេះ លោកឃែររីនឹងបន្តដំណើរឆ្ពោះទៅជួបប្រមុខការទូតរុស្ស៊ី ស៊ែរហ្កី ឡាវ្រូវ នៅក្រុងហ្សឺណែវ ពិភាក្សាពីកិច្ចសហប្រតិបត្តិការយោធានៅស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ថ្ងៃព្រហស្បតិ៍នេះ ប្រមុខការទូតអាមេរិក បានជួបពិភាក្សាជាមួយព្រះមហាក្សត្រ សាល់ម៉ាន់ និងព្រះអង្គម្ចាស់ស្នងរាជ ម៉ូហាមេត ព្រមទាំងថ្នាក់ដឹកនាំប្រទេសតំបន់ឈូងសមុទ្រពែរស៍ផ្សេងទៀតដែរ ពិភាក្សាពិជម្លោះយេម៉ែន ស៊ីរី និងលីប៊ី។ ទិសដៅនៃជំនួបទាំងនេះ គឺស្វែងរកការសម្រុះសម្រួលដើម្បី ឈានដល់ដំណោះស្រាយនយោបាយ។
ជំនួបជាមួយថ្នាក់ដឹកនាំអារ៉ាប៊ីសាអូឌីតផ្តោតលើទំនាក់ទំនងទ្វេភាគី ការប្រយុទ្ធប្រឆាំងភេរវកម្ម និងបញ្ហានៅលីប៊ី។ អាមេរិកគ្រោងបន្តគាំទ្ររដ្ឋាភិបាលរួបរួមជាតិលីប៊ី ស្វែងរកដំណោះស្រាយនយោបាយ និងដាក់សម្ពាធលើក្រុមភេរវជនរដ្ឋអ៊ីស្លាម។ តាំងពីរបបលោកខាដាហ្វ៊ីដួលរលំនៅឆ្នាំ២០១១ លីប៊ីធ្លាក់ក្នុងជម្លោះប្រដាប់អាវុធ ដណ្តើមអំណាចគ្នា ធ្វើអោយក្រុមរដ្ឋអ៊ីស្លាមឆ្លៀតឱកាសដាក់ឥទ្ធិពលខ្លួននៅទីនោះ។
ក្នុងជម្លោះដណ្តើមអំណាចគ្នាជិត១ឆ្នាំកន្លះ នៅយេម៉ែនវិញ យើងដឹងថា កិច្ចពិភាក្សាសន្តិភាពយេម៉ែនថ្ងៃ៦សីហា នៅកូវ៉ែត បានជួបបរាជ័យ។ លោកឃែររីចង់អោយភាគីជម្លោះពិភាក្សាគ្នាឡើងវិញ ហើយចង់អោយមានស្បៀងជំនួយមនុស្សធម៌សម្រាប់ប្រជាជនយេម៉ែន។ នៅយេម៉ែន អារ៉ាប៊ីសាអូឌីត ដឹកនាំសម្ព័ន្ធអារ៉ាប់ កំទេចក្រុមឧទ្ទាមហ៊ូទី ដែលគាំទ្រអតីតប្រធានាធិបតីអាប់ដាឡា សាឡេ។ ប្រតិបត្តិការបានសម្លាប់មនុស្សសន្ធឹកសន្ធាប់ ធ្វើអោយក្រុងរីយ៉ាតរងការរិះគន់យ៉ាងខ្លាំងពីក្រុមសិទ្ធិមនុស្ស។
ថ្ងៃសុក្រនេះ លោកឃែររីនឹងជួបរដ្ឋមន្ត្រីការបរទេសរុស្ស៊ី លោកឡាវ្រូវ ដើម្បីរកការសម្រុះសម្រួលគ្នា ចំពោះកិច្ចសហប្រតិបត្តិការយោធា និងការចែករំលែកព័ត៌មាន នៅស៊ិរី។ អាមេរិកនិងរុស្ស៊ីអាចព្រមព្រៀងគ្នាថា ពេលទាហានអាមេរិកនិងរុស្ស៊ីសហការគ្នាវាយក្រុមជីហាត យន្តហោះយោធាស៊ីរីមិនត្រូវមានវត្តមានក្នុងដែនអាកាសដាច់ខាត។
ទាក់ទងស៊ីរី អង្គការសហប្រជាជាតិផ្តល់ព័ត៌មានថា រុស្ស៊ីបានយល់ព្រមអោយមានបទឈប់បាញ់៤៨ម៉ោង ដើម្បីអោយអង្គការសហប្រជាជាតិអាចដឹកស្បៀងជំនួយទៅអោយប្រជាជននៅអាឡិប។
ទស្សនកិច្ចរបស់លោកឃែររី នៅអារ៉ាប៊ីសាអូឌីត ធ្វើឡើងក្រោយមានហេតុការណ៍ប៉ះទង្គិចកប៉ាល់យោធាជាមួយអ៊ីរ៉ង់ នៅច្រកឆ្នេរ Ormuz។ កាលពីថ្ងៃអង្គារ កប៉ាល់យោធាអ៊ីរ៉ង់៤គ្រឿង បានបើកយ៉ាងលឿន ចូលទៅក្បែរនាវាពិឃាតអាមេរិកមួយគ្រឿងនៅច្រកឆ្នេរនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ