បាក់ស្ពាននៅអ៊ីតាលី ស្លាប់៣០នាក់
យ៉ាងហោចមនុស្ស៣០នាក់ បានស្លាប់ដោយសារតែការបាក់ស្ពានមួយ នៅអ៊ីតាលី ថ្ងៃទី១៤សីហា។អ្នកស្លាប់និងរងគ្រោះ គឺដោយសារតែផ្ទាំងថ្មបាក់សង្កត់។ ស្ពាននោះ គឺជាស្ពានអាកាស អាយុជាង៥០ឆ្នាំទៅហើយ។ នៅក្នុងបរិយាកាសអួរអាប់ មានភ្លៀងធ្លាក់ខ្លាំង ស្ពានចំណាស់មួយនេះ ដែលកំពុងតែត្រូវជួសជួលផង ស្រាប់បានបានក់រលំលើរថយន្តដែលកំពុងធ្វើដំណើរ ធ្លាក់លើផ្លូវដែក លើផ្ទះសម្បែង និងលើអ្នកដំណើរមួយចំនួន។
ចុះផ្សាយនៅថ្ងៃ៖ កែប្រែថ្ងៃទី៖
រោះថ្នាក់នេះ បានកើតឡើងនៅក្រុង Gênes ភាគពាយ័ព្យនៃផ្ទៃប្រទេសអ៊ីតាលី។ ស្ពាននេះ មានប្រវែងជាង១ពាន់២រយម៉ែត្រ ហើយវាបានត្រូវសម្ពោធឲ្យប្រើតាំងពីឆ្នាំ១៩៦៧មកម្ល៉េះ។
រហូតមកដល់ពេលនេះ គេនៅមិនទាន់ដឹងទេពីមូលហេតុនៃការបាក់ស្ពានឲ្យបានច្បាស់លាស់នោះទេ។ តែវិស្វករមួយចំនួនបានវាយតម្លៃថា ការរំលំបាក់នេះ អាចមកពីភាពច្រែះរបស់ស្ពាន ដែលតាមពិត ធ្លាប់បានជួសជួលម្តងហើយ កាលពីឆ្នាំ២០១៦។
សាធារណៈមតិនៅអឺរ៉ុប បានរំជួល ហើយទម្លាយចេញឃ្លាថា ហេតុការណ៍គ្រោះថ្នាក់បាក់ស្ពានដូច្នេះ មិនសមនឹងកើតមានសោះ នៅក្នុងប្រទេសជឿនលឿនស៊ីវីល័យដូចអ៊ីតាលី។ រឿងមួយដែលគេរិះគន់ផងនោះ គឺអាជ្ញាធរពុំគួរអនុញ្ញាតឲ្យមានផ្ទះសម្បែងពលរដ្ឋ នៅក្រោមស្ពាននោះទេ។
គ្រាន់តែកើតហេតុបានភ្លាមៗ ទីផ្សារភាគហ៊ុនរបស់ក្រុមហ៊ុនដែលសង់ស្ពាននោះ បានដាំក្បាលចុះអស់១០ភាគរយ មួយរំពេច។
ក្រុមសង្គ្រោះ និងអាជ្ញាធរអ៊ីតាលី កំពុងតែញាប់ដៃជើងជួយសង្គ្រោះ។ ក្រោយការដឹងហេតុការអាក្រក់ភ្លាម លោកប្រធានាធិបតីអ៊ីតាលីបានចុះទៅកន្លែងកើតហេតុដោយផ្ទាល់។ ចំណែកប្រមុខរដ្ឋបារាំង និងអធិការបតីអាល្លឺម៉ង់ ជាដើម បានសម្តែងក្តីសោកស្តាយចំពោះមរណទុក្ខរបស់ពលរដ្ឋអ៊ីតាលី។
សូមជ្រាបថា ចាប់គិតពី៥ឆ្នាំចុងក្រោយនេះ គឺពីឆ្នាំ២០១៣មក នៅអ៊ីតាលី មានស្ពាន ចំនួន១០ហើយបានរំលំបាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ