ប្រតិកម្មចម្រុះ ក្រោយលោក ត្រាំ ដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់
ប្រធានាធិបតីអាមេរិក លោក ដូណាល់ ត្រាំ បានធ្វើសេចក្ដីសម្រេចចិត្តដ៏ភ្ញាក់ផ្អើលមួយនៅថ្ងៃអង្គារម្សិលមិញ ដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់។ សម្រាប់លោក ដូណាល់ ត្រាំ គេមិនអាចទប់ស្កាត់មហិច្ឆតានុយក្លេអ៊ែរអ៊ីរ៉ង់បានទេ តាមរយៈកិច្ចព្រមព្រៀងដ៏ពុកផុយដែលមានរាល់ថ្ងៃនេះ។ គួរកត់សម្គាល់ថា ក្រោយពីលោកត្រាំប្រកាសដូច្នេះ សហគមន៍អន្ដរជាតិបានបញ្ចេញប្រតិកម្មខុសៗគ្នា ដោយខ្លះប្រកាសស្វាគមន៍ ខ្លះខឹងសម្បារ និងខ្លះចាត់ទុកថា វាជាការសម្រេចចិត្តខុស។
ចុះផ្សាយនៅថ្ងៃ៖
ស្តាប់ - ០១:៥៧
ប្រតិកម្មមុនគេចំពោះការសម្រេចចិត្តរបស់ប្រធានាធិបតីអាមេរិក គឺចេញពីលោក ហាសាន់ រ៉ូហានី ប្រធានាធិបតីអ៊ីរ៉ង់។ សម្រាប់លោក រ៉ូហានី ការដកខ្លួនរបស់អាមេរិក គឺជាការប្រកាសសង្គ្រាមផ្លូវចិត្តប្រឆាំងនឹងអ៊ីរ៉ង់។ ភ្លាមៗ ប្រធានាធិបតីអ៊ីរ៉ង់រូបនេះ បានចេញបញ្ជាទៅអង្គការថាមពលអាតូមរបស់អ៊ីរ៉ង់ ឲ្យចាត់វិធានការចាំបាច់នានាសម្រាប់ពេលអនាគត ហើយប្រសិនបើចាំបាច់ លោកថា អ៊ីរ៉ង់អាចនឹងបន្តការចម្រាញ់សារធាតុអ៊ុយរ៉ានីញ៉ូមដោយគ្មានដែនកំណត់។ និងថា បើទោះបីជាអាមេរិកដកខ្លួនចេញក៏ដោយ អ៊ីរ៉ង់និងសហគមន៍អន្ដរជាតិ នឹងបន្តរក្សាកិច្ចព្រមព្រៀងនេះឲ្យនៅដដែល។
លោក បារ៉ាក់ អូបាម៉ា អតីតប្រធានាធិបតីអាមេរិកដែលជាអ្នកខិតខំប្រឹងប្រែងបង្កើតឲ្យមានកិច្ចព្រមព្រៀងនុយក្លេអ៊ែរអ៊ីរ៉ង់ បានហៅការប្រកាសរបស់លោកដូណាល់ ត្រាំ ថាជាការសម្រេចចិត្តខុស។
ចំណែក ពីខាងសហភាពអឺរ៉ុបវិញ។ បារាំង អាឡឺម៉ង់ និងអង់គ្លេស បានសម្ដែងការសោកស្ដាយចំពោះការប្រកាសដកខ្លួនរបស់អាមេរិក។ រីឯមូស្គូ ក៏ខកចិត្តណាស់ដែរ។ សម្រាប់រុស្ស៊ី ការសម្រេចចិត្តរបស់លោក ត្រាំ ដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ នឹងបង្កអស្ថិរភាព ក៏ដូចជាទំនាស់ថ្មីៗបន្ថែមទៀត។
ពីស៊ីរីឯណោះវិញ។ ប្រមុខការទូតស៊ីរី ថ្កោលទោសចំពោះសេចក្ដីសម្រេចរបស់អាមេរិក។ ទង្វើរបស់អាមេរិកដូច្នេះ បើតាមប្រមុខការទូតស៊ីរី គឺបានបង្ហាញជាថ្មីម្ដងទៀតថា សហរដ្ឋអាមេរិក គ្មានការប្ដេជ្ញាចិត្តគោរពតាមកិច្ចព្រមព្រៀងអន្ដរជាតិឡើយ។
ដោយឡែក ប្រមុខអង្គការសហប្រជាជាតិ លោក អង់តូនីញ៉ូ ហ្គូទែស បានអំពាវនាវឲ្យប្រទេសហត្ថលេខីនៃកិច្ចព្រមព្រៀងនុយក្លេអ៊ែរអ៊ីរ៉ង់ផ្សេងទៀត គោរពឲ្យបានពេញលេញ នូវការប្ដេជ្ញាចិត្តរបស់ពួកគេ ហើយបន្តគាំទ្រដល់កិច្ចព្រមព្រៀងនេះ បើទោះបីជាអាមេរិកចាកចេញក៏ដោយ។
ជាការកត់សម្គាល់ ការសម្រេចចិត្តរបស់លោកត្រាំនៅថ្ងៃអង្គារ ដ្បិតតែមានការរិះគន់និងថ្កោលទោសច្រើនក៏ពិតមែន តែក៏បានទទួលការស្វាគមន៍ដែរ ពីអ៊ីស្រាអែល និងអារ៉ាប៊ីសាអូឌីត ដែលគាំទ្រយ៉ាងពេញទំហឹងចំពោះការសម្រេចចិត្តដ៏ក្លៀវក្លារបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ