សិង្ហបុរី៖ ច្បាប់ប្រឆាំងនឹងព័ត៌មានក្លែងក្លាយចូលជាធរមាន
ថ្ងៃទី២តុលា ច្បាប់ប្រឆាំងនឹងព័ត៌មានក្លែងក្លាយរបស់សិង្ហបុរី ចូលជាធរមាន ដែលបង្កជាក្តីបារម្ភជាខ្លាំង ចំពោះអ្នកការពារសិទ្ធិបញ្ចេញមតិ និងក្រុមហ៊ុនបច្ចេកវិជ្ជាព័ត៌មាន។ ក្រុមហ៊ុនធំៗរកស៊ីខាងព័ត៌មានវិជ្ជា ក៏កំពុងព្រួយ ដ្បិតអាជ្ញាធរសិង្ហបុរី មានសិទ្ធិពោរពាសពេក ក្នុងការវាយតម្លៃព័ត៌មានណាថាមិនពិត និងក្លែងក្លាយ ហើយមានសិទ្ធិផាក់ពិន័យរហូតដល់រាប់សិបម៉ឺនដុល្លារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ចំពោះការរាល់ផ្សព្វផ្សាយតាមបណ្តាញទំនាក់ទំនងសង្គម, ច្បាប់ប្រឆាំងនឹងព័ត៌មានក្លែងក្លាយ គឺបានចែងផ្តល់សិទ្ធិអំណាចឱ្យ អាជ្ញាធរសិង្ហបុរី «ព្រមាន» តែបើរដ្ឋអំណាចយល់ថា ការផ្សាយនោះ ខុស ឬក្លែងក្លាយ គឺអាចសម្រេច«លុបចោល»។ ធ្ងន់ធ្ងរជាងនេះទៅទៀត បើចំពោះបុគ្គលឯកជន អាចប្រឈមមុខនឹងការជាប់ពន្ធនាគារ រហូតដល់១០ឆ្នាំ។ ចំពោះក្រុមហ៊ុនឯកជន អាចត្រូវប្រឈមមុខនឹងការផាក់ពិន័យ រហូតដល់ ៧២ម៉ឺនដុល្លារអាមេរិក។
ក្រុមហ៊ុនខាងបច្ចេកវិជ្ជាធំៗ ដូចជា Google, Facebook, Twitter ដែលមានមូលដ្ឋានប្រចាំនៅទ្វីបអាស៊ី ក្នុងប្រទេសសិង្ហបុរីនេះ បានសម្តែងក្តីព្រួយបារម្ភ តែត្រូវរដ្ឋាភិបាលទុកពេលវេលាឱ្យខ្លះបន្ថែមទៀត ដើម្បីរកមធ្យោបាយព្យាយាមសម្របសម្រួលខ្លួនទៅតាមនឹងបញ្ញត្តិចែងរបស់ច្បាប់ថ្មី ប្រសិនបើចង់រកស៊ីនៅសិង្ហបុរីតទៅទៀត។
សិង្ហបុរី ដ្បិតតែជាកូនប្រទេសតូចមួយ មានប្រជាជនជិត៦លាននាក់ មានសេដ្ឋកិច្ចជឿនលឿនខ្លាំងជាងគេនៅអាស៊ីអាគ្នេយ៍ តែមិនសូវមានសិទ្ធិសេរីភាពខាងបញ្ចេញមតិប៉ុន្មានឡើយ។ សិង្ហបុរី ជាប់លេខខ្សោយណាស់ខាងសេរីភាពសារព័ត៌មាន ពោលគឺជាប់ចំណាត់ថ្នាក់លេខ១៥១ ក្នុងចំណោមប្រទេស១៨១លើលោក។ នេះបើតាមអង្គការអ្នកកាសែតគ្មានព្រំដែន។
ក្រៅពីធ្វើឱ្យអ្នកការពារសិទ្ធមនុស្សព្រួយភ័យ ច្បាប់នេះថ្មី ក៏អាចនឹងបង្កការខ្លាចរអារទៅដល់ស្ថាប័នព័ត៌មានអន្តរជាតិ ដែលមានមូលដ្ឋាននៅសិង្ហបុរីផងដែរ។ រដ្ឋមន្ត្រីក្រសួងទូរគមនាគមន៍និងព័ត៌មាន លោក S. Iswaran បានអះអាងថា ច្បាប់នេះ គ្មានបំណងរឹតត្បិតសេរីភាពបញ្ចេញមតិនោះទេ។ ក៏ប៉ុន្តែ អ្នកនយោបាយប្រឆាំង យល់ថា ការចូលជាធរមាននៃច្បាប់ថ្មីនេះ គឺមានគោលបំណងបំបិទខ្ទប់សំឡេងអ្នកតវ៉ាប្រឆាំង ហើយរឹងរឹតតែបង្កគ្រោះព្រួយភ័យកាន់តែច្រើន នៅពេលដែលការបោះឆ្នោតជាតិ កាន់ជិតខិតចូលមកដល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ