សវនាការសួរចម្លើយសាក្សីជាសាធារណៈលើកទី១ នៅក្នុងដំណើរការដកតំណែងប្រធានាធិបតី
ចុះផ្សាយនៅថ្ងៃ៖
ស្តាប់ - ០៦:០៣
សំណុំរឿងនីតិវិធីទម្លាក់ប្រធានាធិបតី ដូណាល់ ត្រាំ, រដ្ឋសភាអាមេរិក ពីថ្ងៃពុធ ទី១៣វិច្ឆិកា បានបើកសវនាការសួរចម្លើយសាក្សី ជាលើកទី១ ដោយមានថតវីដេអូ បញ្ជាំងផ្សាយជាសាធារណៈទៀតផង។ សាក្សីពីររូបដែលបានចូលឆ្លើយនៅចំពោះមុខអង្គសភា គឺលោកWilliam Taylor ជាមន្ត្រីការទូតជាន់ខ្ពស់របស់អាមេរិកប្រចាំនៅអ៊ុយក្រែន និងលោក George Kent ជាអ្នកទទួលបន្ទុកកិច្ចការអ៊ុយក្រែន។ បន្ទាប់ពីធ្វើការស្បត់ស្បែថានឹងឆ្លើយតែការពិត លោកទាំងពីរនេះត្រូវសភាសាកសួរ អស់រយៈពេល៦ម៉ោង ដើម្បីឱ្យផ្តល់សក្ខីកម្ម ជុំវិញកិច្ចសន្ទនារបស់លោកប្រធានាធិបតីអាមេរិកនិងអ៊ុយក្រែន ដែលក្រុមអ្នកតំណាងរាស្ត្របក្សប្រជាធិបតេយ្យ សង្ស័យនិងចោទថា លោក ដូណាល់ ត្រាំ បានដាក់សម្ពាធទៅលើប្រមុខរដ្ឋអ៊ុយក្រែន ដើម្បីបើកការស៊ើបអង្កេតរឿងពុករលួយ ប្រឆាំងនឹងគូប្រជែងរបស់លោក និងដើម្បីបានផលប្រយោជន៍ផ្ទាល់ខ្លួន ក្នុងការឈ្នះឆ្នោតជាថ្មី នៅឆ្នាំ២០២០។
តើលោកមន្ត្រីទូតទាំងពីរបាននិយាយអ្វីខ្លះ?
ការសាកសួរសាក្សី មានច្រើនណាស់ ដល់ទៅរយៈ៦ម៉ោង។ ប៉ុន្តែ ចំណុចសំខាន់គេចាប់អារម្មណ៍ខ្លាំងជាងគេ គឺមន្ត្រីការទូតជាន់ខ្ពស់របស់អាមេរិកប្រចាំនៅអ៊ុយក្រែន លោក William Taylor បាននិទានឡើងវិញ ពីកិច្ចសន្ទនារបស់លោក ដូណាល់ ត្រាំ និងឯកអគ្គរដ្ឋទូតអាមេរិក ប្រចាំសហភាពអឺរ៉ុប Gordon Sondland កាលពីជិតចុងខែកក្កដាកន្លងទៅ។
លោក William Taylor បញ្ជាក់ថា លោក ដូណាល់ ត្រាំ សាកសួរតាមទូរសព្ទទៅលោកទូត Sondland តើលោកគិតយ៉ាងណាពីអ៊ុយក្រែន? និងសួរជុំវិញផលប្រយោជន៍នៃការស៊ើបអង្កេតរឿងពុករលួយរបស់គ្រួសាររបស់លោក Joe Biden ដែលជាដៃគូប្រជែង។ តាមចម្លើយរបស់លោក William Taylor គឺ លោកទូត Sondland ប្រាប់សហការីក្រោយនិយាយទូរសព្ទថា លោកប្រមុខរដ្ឋអាមេរិក ដូណាល់ ត្រាំ ពិតជាចាប់អារម្មណ៍ខ្លាំងណាស់ចំពោះសំណុំរឿងស៊ើបអង្កេតពុករលួយនៅអ៊ុយក្រែននេះ ហើយឱ្យបានសហការជាមួយមេធាវីផ្ទាល់ខ្លួនរបស់លោក ត្រាំ គឺលោក Giuliani។
ជារួម មន្ត្រីទូតទាំងពីរដែលត្រូវសភាសាកសួរ គឺបញ្ជាក់ស្រដៀងៗគ្នា ថានៅក្នុងការឆ្លើយឆ្លងទាក់ទងកិច្ចការទូតរវាងអាមេរិកនិងអ៊ុយក្រែន គឺធ្វើឡើងតាមរយៈផ្លូវទូត ដែលហាក់«ខុសប្លែកពីធម្មតា»។ ខុសពីប្រក្រតី ព្រោះថាចាំបាច់ត្រូវមានអ្នកជួយសម្របសម្រួលនិងទាក់ទងច្រើនកន្លាក់ ច្រើនសណ្ឋាន យ៉ាងស្មុគស្មាញ និងហាក់មានលាក់រឿងសម្ងាត់អ្វីម្យ៉ាង ដែលបង្កក្តីសង្ស័យច្រើន។ ក្តីសង្ស័យដែលក្រុមសមាជិកបក្សប្រជាធិបតេយ្យកំពុងជជីករកនោះ គឺថា ពួកគេសង្ស័យថា លោកប្រធានាធិបតីដូណាល់ ត្រាំ ដាក់សម្ពាធឱ្យប្រមុខរដ្ឋអ៊ុយក្រែន ស៊ើបអង្កេតរឿងពុករលួយរបស់គ្រួសារលោក Joe Biden ពិសេសគឺកូនប្រុសរបស់លោក Biden ឈ្មោះ Hunter ដែលកាលពី២០១៤ Hunter ជាអ្នករកស៊ីយ៉ាងធំដុំខាងថាមពល នៅក្រុងគៀវ។ ខាងក្រុមបក្សប្រឆាំងនៅអាមេរិក គេចោទប្រកាន់ថា លោក ត្រាំ ប្រើឥទ្ធិពលបង្ខំអ៊ុយក្រែន ជាថ្នូរនឹងជំនួយយោធារបស់អាមេរិក ចំនួនប្រមាណ៤ពាន់លានដុល្លារ។ ហើយជាការថៃដន្យឬយ៉ាងណា ដែលជំនួយនេះ ត្រូវកក់ស្ទះ នៅពាក់កណ្តាលខែកញ្ញាកន្លងទៅនេះ។ ត្រង់នេះ គេក៏ចោទលោកត្រាំដែរថា រំលោភអំណាច ដើម្បីផលប្រយោជន៍ផ្ទាល់ខ្លួន គឺគោលដៅដើម្បីឈ្នះឆ្នោតជាថ្មី។
ចំពោះចម្លើយសារភាពរបស់មន្ត្រីទូត តើលោកប្រធានាធិបតី ដូណាល់ ត្រាំ មានប្រតិកម្មយ៉ាងដូចម្តេច ?
ប្រធានាធិបតីអាមេរិក ដូណាល់ ត្រាំ បានមានប្រសាសន៍ប្រាប់អ្នកកាសែត នៅក្នុងជំនួបជាមួយប្រធានាធិបតីតួកគី ពីម្សិលមិញនេះ ថាលោកគ្មានចាប់អារម្មណ៍អ្វីទេ លោកបានមើលទូរទស្សន៍ស្តីពីសវនាការសួរចម្លើយនេះ តែ១នាទីតែប៉ុណ្ណោះ ដោយសារលោកជាប់រវល់ពិភាក្សាជាមួយប្រធានាធិបតី Erdogan។ មិនតែប៉ុណ្ណោះ លោក ដូណាល់ ត្រាំ វាយបកទៅវិញថា សវនាការនេះ ជាឆាករឿងកំប្លែង ហើយបំភ្លៃការពិត។
នៅក្នុងការឆ្លើយតបរបស់លោក ដូណាល់ ត្រាំ គឺលោកប្រធានាធិបតីអាមេរិក នៅតែអះអាងការពារខ្លួនដដែល ថាកិច្ចសន្ទនារបស់លោកជាមួយនិងប្រធានាធិបតីអ៊ុយក្រែន គឺការជជែកគ្នាយ៉ាងល្អ តែគេគឺក្រុមអ្នកប្រឆាំង យកទៅបំប៉ោង និងបំភ្លៃ ហើយរករឿងបង្កបញ្ហាដល់រូបលោក។ ចំពោះសាក្សីទាំងពីរនេះ លោកត្រាំយល់ថា ពួកគេមិនគួរមានសិទ្ធិទៅឆ្លើយបំភ្លឺអ្វីទេ ហើយការលើកឡើង ឬការចោទប្រកាន់អ្វីក៏ដោយ របស់ពួកគេទាំងនេះ គឺមិនសាកសមតាមផ្លូវច្បាប់ និងមិនសមនឹងកើតមានឡើងសោះ។
សប្តាហ៍ក្រោយ សភា នឹងបើកការសាកសួរ ជាលើកទី២ និងជាសាធារណៈចំពោះលោក Gordon Sondland ដែលឯកអគ្គរដ្ឋទូតអាមេរិក ប្រចាំសហភាពអឺរ៉ុប
នោះជាការទន្ទឹងរង់ចាំ យ៉ាងអន្ទះសា ជាក់ច្បាស់ណាស់! ដ្បិតលោក Gordon Sondland គឺអ្នកមានលុយច្រើន ជាឧបត្ថម្ភថវិកាយ៉ាងច្រើនសម្បើមដល់លោកត្រាំ និងម្ចាស់ជំនួយយ៉ាងធំមួយរូប សម្រាប់ដំណើរការឃោសនាបោះឆ្នោតប្រធានាធីបតី របស់លោក ត្រាំ។ លោក Gordon Sondland នេះ ត្រូវតែងតាំងជាឯកអគ្គរដ្ឋទូតអាមេរិក ប្រចាំសហភាពអឺរ៉ុប គឺនៅក្រោយពេលលោក ត្រាំ ក្លាយជាប្រមុខរដ្ឋអាមេរិក។
ដូច្នេះ លោក Sondland ជាតួអង្គមួយដ៏សំខាន់! ហើយមិនតែប៉ុណ្ណោះ រូបលោក គឺជាអ្នកបានឆ្លើយឆ្លងសន្ទនាដោយផ្ទាល់ជាមួយប្រធានាធិបតី ត្រាំ ផង និងបានដឹងឮដោយផ្ទាល់ផង ចំពោះកិច្ចសន្ទនារវាងប្រមុខរដ្ឋទាំងពីរជុំវិញសំណុំរឿងបើកការស៊ើបអង្កេតពុករលួយរបស់គ្រួសារលោក Biden នៅអ៊ុយក្រែន។ ដូច្នេះ ចម្លើយរបស់លោក Sondland នៅពេលខាងមុខ បើចេញមកស្រួល មិនស្រួល គឺនឹងធ្វើរឿងរ៉ាវកាន់តែលំបាកហើយ។ តែត្រង់ថា លំបាកកម្រិតណានោះ យើងនឹងតាមដានទាំងអស់គ្នា នៅក្នុងសវនាសួរចម្លើយ នាសប្តាហ៍ក្រោយនេះ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ