ចិនមិនឈឺក្បាលចំពោះចំណាត់ការរបស់អាមេរិកលើ Huawei
រដ្ឋបាលអាមេរិក តាមរយៈក្រសួងពាណិជ្ជកម្ម បានសម្រេចនៅដើមសប្តាហ៍នេះ ព្យួរការអនុវត្តទណ្ឌកម្ម និងទុកពេលចំនួន៣ខែទៀត ឲ្យក្រុមហ៊ុនទូរសព្ទដៃចិន Huawei និងក្រុមហ៊ុនអាមេរិកដែលរកស៊ីជាមួយ Huawei។ ក៏ប៉ុន្តែ ក្រុមហ៊ុន Huawei ប្រតិកម្មបកវិញថា លើកពេលឬមិនលើកពេល គឺវាគ្មានខុសគ្នាអ្វីទេ ព្រោះអាមេរិកជាអ្នករកស៊ីមិនត្រឹមត្រូវ មិនគោរពគោលការទីផ្សារសេរី។
ចុះផ្សាយនៅថ្ងៃ៖ កែប្រែថ្ងៃទី៖
ក្រសួងពាណិជ្ជកម្មអាមេរិកសម្រេចពន្យារពេលឱ្យក្រុមហ៊ុន Huawei ចំនួនបីខែទៀត រហូតដល់ថ្ងៃទី១៩ ខែវិច្ឆិកា គឺដើម្បីទុកពេលឱ្យក្រុមហ៊ុនអាមេរិក ដែលរកស៊ីជាមួយក្រុមហ៊ុនចិននេះ រកដៃគូរកស៊ីថ្មី ហើយក៏ទុកពេលឱ្យអតិថិជនអាមេរិក រកទូរសព្ទរបស់ក្រុមហ៊ុនផ្សេងដើម្បីប្រើប្រាស់ដែរ។
បើតាមរដ្ឋមន្ត្រីពាណិជ្ជកម្មអាមេរិក, ក្រុមហ៊ុនអាមេរិកត្រូវការពេលច្រើនគួរសមដែរ ដើម្បីរកដៃគូថ្មី។ ក៏ប៉ុន្តែ នៅក្នុងដំណាក់កាលពន្យារពេលអនុវត្តទណ្ឌកម្មនេះ ក្រុមហ៊ុនចិន Huawei គឺនៅតែឋិតនៅក្នុងបញ្ជីខ្មៅដដែល ហើយមិនតែប៉ុណ្ណោះ អាមេរិកបានបញ្ចូលឈ្មោះមនុស្សនិងក្រុមហ៊ុន ចំនួនជិត៥០ថែមទៀត ដែលរកស៊ីជាមួយ Huawei ទៅក្នុងបញ្ជីខ្មៅ ជាមួយគ្នាផងដែរ។
ក្នុងសេចក្តីថ្លែងការណ៍របស់ខ្លួន ក្រុមហ៊ុនចិន Huawei បានវាយបកសងទៅអាមេរិកវិញថា បើទោះបីជាអាមេរិកចង់លើកពេល ឬមិនលើកពេល គឺវាគ្មានខុសគ្នាអ្វីទេ ព្រោះអាមេរិកជាអ្នករកស៊ីមិនត្រឹមត្រូវ មិនគោរពគោលការណ៍ទីផ្សារសេរី ស្រេចទៅហើយនោះ។ បន្ថែមពីនេះ អ្នកនាំពាក្យក្រសួងការបរទេសចិន ក៏សង្កត់ធ្ងន់ថា អាមេរិករកស៊ីដោយមានការរើសអើងចំពោះក្រុមហ៊ុនឯកជនដែលចេញពីប្រទេសផ្សេងៗគ្នា និងថា អាមេរិកសំអាងលើការចោទប្រកាន់ដែលគ្មានហេតុផល គ្មានមូលដ្ឋានជាក់ច្បាស់។
កាលពីឆ្នាំ២០១៨ ក្រុមហ៊ុនចិននេះ បានទិញគ្រឿងបរិក្ខារពីក្រុមហ៊ុនអាមេរិក ក្នុងរង្វង់ទឹកប្រាក់ ១១ពាន់លានដុល្លារ។
សូមបញ្ជាក់ថា រដ្ឋបាលក្រុងវ៉ាស៊ីនតោន បញ្ជាឱ្យក្រុមហ៊ុនអាមេរិកទាំងឡាយឈប់រកស៊ីជាមួយ ក្រុមហ៊ុនចិន Huawei ពីព្រោះអាមេរិកយល់ថា Huawei ជាគ្រោះថ្នាក់ដល់សន្តិសុខជាតិ។
ប្រឈមមុខនឹងជម្លោះពាណិជ្ជកម្មនេះ ក្រុមហ៊ុនចិន Huawei បានស្រាវជ្រាវប្រព័ន្ធប្រតិបត្តិការថ្មី ដើម្បីមកជំនួសប្រព័ន្ធ Android របស់ Google ដោយសារតែក្រុមហ៊ុន Huawei ជាប់ទណ្ឌកម្មរបស់អាមេរិក មិនអាចបន្តចាប់ដៃសហការ ជាមួយ Google តទៅទៀត។ កាលពីថ្ងៃសុក្រ ទី៩សីហា ដើមខែនេះ Huawei បានប្រកាសពីដំណើរការរបស់ប្រព័ន្ធប្រតិបត្តិការថ្មីរបស់ខ្លួន ឈ្មោះថា Harmony OS ។ ក៏ប៉ុន្តែ អ្នកជំនាញ ជឿថា ប្រព័ន្ធប្រតិបត្តិការ Harmony OS របស់ Huawei នេះ នៅខ្សោយនិងខ្វះខាតច្រើនឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ