ក្រសួងសុខាភិបាល ហាមឃាត់ ការលក់ និងផ្សព្វផ្សាយផលិតផលឱសថពុំបានចុះបញ្ជិកា
ក្រសួងសុខាភិបាល កាលពីថ្ងៃទី២១-២២ ខែមិថុនា បានហាមឃាត់ការនាំចូល លក់ ចែកចាយ និងផ្សព្វផ្សាយតាមបណ្តាញសង្គមហ្វេសប៊ុកនូវផលិតផលឱសថពុំបានចុះបញ្ជិកា និងគ្មានច្បាប់អនុញ្ញាតពីក្រសួងសុខាភិបាល។ ការប្រកាសរបស់ក្រសួងសុខាភិបាលធ្វើឡើង បន្ទាប់ពីមានការផ្សព្វផ្សាយលក់ផលិតផលសុខភាពនៅលើបណ្តាញសង្គម។
ចុះផ្សាយនៅថ្ងៃ៖
ជាបន្តបន្ទាប់នាខែមិថុនានេះ ក្រសួងសុខាភិបាលបានចេញសេចក្តីប្រកាស ទប់ស្កាត់ ការផ្សព្វផ្សាយផលិតផលឱសថ ដែលមិនបានចុះបញ្ជិកា។ ក្រសួងសុខភិបាលបញ្ជាក់តាមសេចក្តីប្រកាសរបស់ខ្លួនថា ការហាមឃាត់នេះ គឺដើម្បីជៀសវាងការខាតបង់ប្រាក់កាស និងប៉ះពាល់ដល់សុខភាព ឬអាចឈានដល់ការបាត់បង់អាយុជីវិតរបស់អ្នកប្រើប្រាស់ទៀតផង។
បើតាមក្រសួងសុខាភិបាល ឱសថ ដែលបានហាមឃាត់ទាំងនោះ គឺជាប្រភេទឱសថព្យាបាលជំងឺសន្លាក់, ឱសថសម្រកទម្ងន់ឈ្មោះ Caroline Capsule, Caroline Coffee , ឱសថព្យាបាលព្យាបាលជំងឺសន្លាក់ឈ្មោះ OSTO, ឱសថព្យាបាលជំងឺមហារីកគ្រប់ប្រភេទ, ឱសថព្យាបាលជំងឺលើឈាម, និងឱសថសម្រាប់បង្កើនតណ្ហាផ្លូវភេទបុរសជាដើម។
ក្រសួងសុខាភិបាលឲ្យដឹងថា ឱសថទាំងនោះពុំបានត្រួតពិនិត្យ និងពុំបានចុះបញ្ជិកា ហើយផ្សព្វផ្សាយតាមរយៈគណនីឈ្មោះ “សុខភាពបៃតង” និង “SPIRULIINA 100%” ដោយគ្មានច្បាប់អនុញ្ញាតពីក្រសួងសុខាភិបាល ដូច្នេះតម្រូវឲ្យម្ចាស់អាជីវកម្មបញ្ឈប់ការនាំចូល ផ្សព្វផ្សាយ និង លក់ ឬចែកចាយ។ ក្រសួងសុខាភិបាលកម្ពុជាអះអាងថាខ្លួននឹងមានវិធានការផ្លូវច្បាប់លើម្ចាស់គណនីខាងលើនេះ។
លោក សន ជ័យ ជាប្រធានអង្គការសម្ព័ន្ធគណនេយ្យភាពសង្គមកម្ពុជា បានថ្លែងថា ក្រសួងសុខាភិបាលត្រូវផ្សព្វផ្សាយពីប្រភេទផលិតផលទាំងនោះ ឲ្យប្រជាពលរដ្ឋបានដឹង ហើយធ្វើយ៉ាងណាឲ្យអ្នកប្រព្រឹត្តិល្មើសត្រូវតែប្រឈមុខនឹងផ្លូវច្បាប់។ ប៉ុន្តែលោកលើកឡើងថា ទិដ្ឋភាពច្បាប់នៅកម្ពុជាមានមិនគ្រប់គ្រាប់ ហេតុដូច្នេះធ្វើឲ្យក្រុមល្មើសឆ្លៀតឱកាសលក់ដូរផលិតផលល្មើសច្បាប់ទាំងនោះ។
លោក សន ជ័យ បន្ថែមថា ការយល់ដឹងរបស់ប្រជាពលរដ្ឋកម្ពុជានៅមានកម្រិត ដែលមិនដឹងថាផលិតផលណាក្រសួងអនុញ្ញាត ហើយផលិតផលណា ដែលក្រសួងមិនអនុញ្ញាត ដូច្នេះក្រសួងត្រូវតែសកម្មជាងមុន និងត្រូវមានប្រតិកម្មភ្លាមៗចំពោះការលក់ផលិតផលទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ