ជនសង្ស័យក្នុងភេរវកម្មនៅប៊ែរឡាំងត្រូវប៉ូលិសបាញ់ស្លាប់នៅអ៊ីតាលី
ជនសង្ស័យក្នុងការវាយប្រហារភេរវកម្មនៅប៊ែរឡាំងកាលពីថ្ងៃចន្ទ ហើយដែលប៉ូលិសអាល្លឺម៉ង់ និងអឺរ៉ុបកំពុងតាមប្រមាញ់យ៉ាងស្វិតស្វាញបំផុតនោះ ត្រូវបានប៉ូលិសបាញ់ស្លាប់ នៅក្នុងប្រទេសអ៊ីតាលី កាលពីព្រឹកព្រលឹមថ្ងៃសុក្រ។ ការបាញ់សម្លាប់ជនសង្ស័យភេរវជននេះត្រូវបានបញ្ជាក់ជាផ្លូវការ ដោយរដ្ឋមន្រ្តីក្រសួងមហាផ្ទៃអ៊ីតាលី។
ចុះផ្សាយនៅថ្ងៃ៖
ថ្លែងក្នុងសន្និសីទសារព័ត៌មានក្នុងទីក្រុងរ៉ូម នៅព្រឹកថ្ងៃសុក្រនេះ រដ្ឋមន្រ្តីក្រសួងមហាផ្ទៃអ៊ីតាលីបានឲ្យដឹងថា អានីស អាមរី បានស្លាប់នៅក្នុងការបាញ់តដៃគ្នាជាមួយប៉ូលិស នៅម៉ោងប្រមាណជា ៣ព្រឹក ម៉ោងក្នុងស្រុកអ៊ីតាលី (ត្រូវជាម៉ោង ៩ព្រឹកនៅក្នុងប្រទេសកម្ពុជា)។ នៅមុនពេលមានការបាញ់ប្រហារគ្នានេះ ប៉ូលិសអ៊ីតាលីបានឃាត់ឡានរបស់ជនសង្ស័យនៅក្បែរទីក្រុងមីឡង់ ដើម្បីត្រួតពិនិត្យ។ នៅពេលដែលប៉ូលិសទាររកក្រដាសស្នាមបញ្ជាក់ពីអត្តសញ្ញាណ ជនសង្ស័យក៏បានដកកាំភ្លើងខ្លីបាញ់ប្រហារមកលើប៉ូលិស ទើបធ្វើឲ្យប៉ូលិសក៏បាញ់តបតវិញ។
រដ្ឋមន្រ្តីក្រសួងមហាផ្ទៃអ៊ីតាលីបានបញ្ជាក់បន្ថែមថា ក្រោយពីមានការត្រួតពិនិត្យអត្តសញ្ញាណយ៉ាងម៉ត់ចត់ ប៉ូលិសអ៊ីតាលីអាចធ្វើការសន្និដ្ឋានបានយ៉ាងច្បាស់ ដោយគ្មានមន្ទិលសង្ស័យថា ជនសង្ស័យដែលស្លាប់ក្នុងការបាញ់ប្រហារជាមួយប៉ូលិសអ៊ីតាលីនៅព្រឹកមិញនេះ គឺពិតជា អានីស អាមរី ជនសង្ស័យក្នុងការវាយប្រហារភេរវកម្មនៅប៊ែរឡាំង កាលពីថ្ងៃចន្ទ។
ពីអាល្លឺម៉ង់វិញ មន្រ្តីអ្នកនាំពាក្យរបស់លោកស្រីអង់ហ្គេឡា មែរកិល បានបដិសេធមិនធ្វើអត្ថាធិប្បាយណាមួយនោះទេ ជុំវិញព័ត៌មានស្តីពីការស្លាប់របស់ អានីស អាមរី ដោយនៅរង់ចាំការបញ្ជាក់ជាលាយលក្ខណ៍អក្សរដោយផ្ទាល់ពីសំណាក់រដ្ឋាភិបាលអ៊ីតាលី។ ក៏ប៉ុន្តែ ទោះជាយ៉ាងណា អ្នកនាំពាក្យក្រសួងមហាផ្ទៃអាល្លឺម៉ង់បានប្រាប់អ្នកសារព័ត៌មានថា មានតម្រ៉ុយជាច្រើនដែលចង្អុលបង្ហាញថា ជនសង្ស័យដែលត្រូវប៉ូលិសអ៊ីតាលីបាញ់សម្លាប គឺពិតជា អានីស អាមរី ហើយថា បើសិនជាពិតជាយ៉ាងដូច្នោះមែន វាគឺជារឿងដ៏គួរឲ្យធូរចិត្តមួយ ដែលជននេះលែងជាគ្រោះថ្នាក់ដល់សុវត្ថិភាពរបស់ប្រជាជន។
គួរបញ្ជាក់ឡើងវិញថា អានីស អាមរី គឺជាជនភៀសខ្លួនមកពីទុយនីស៊ី ហើយចូលមកក្នុងទឹកដីអឺរ៉ុប កាលពីឆ្នាំ២០១១ ដោយចាប់ផ្តើមពីអ៊ីតាលី។ មិនយូរប៉ុន្មានក្រោយពីមកដល់អ៊ីតាលី អានីស អាមរី ត្រូវបានតុលាការអ៊ីតាលីកាត់ទោសដាក់ពន្ធនាគាររយៈពេល ៤ឆ្នាំ ដោយជាប់ចោទក្នុងការដុតបំផ្លាញជំរំជនភៀសខ្លួន។ ក្រោយពីត្រូវដោះលែងពីពន្ធនាគារនៅឆ្នាំ២០១៥ ទើប អានីស អាមរី ចាកចេញពីអ៊ីតាលី ហើយទៅសុំសិទ្ធិជ្រកកោនក្នុងប្រទេសអាល្លឺម៉ង់ ក៏ប៉ុន្តែ ត្រូវអាជ្ញាធរអាល្លឺម៉ង់បដិសេធ។
រដ្ឋមន្រ្តីក្រសួងមហាផ្ទៃអាល្លឺម៉ង់បានឲ្យដឹង កាលពីថ្ងៃព្រហស្បតិ៍ម្សិលមិញថា ក្រៅពីអត្តសញ្ញាណបណ្ណ ប៉ូលិសបានរកឃើញស្នាមម្រាមដៃរបស់ អានីស អាមរី នៅក្នុងរថយន្ត ដែលបើកបុកមនុស្សនៅក្នុងផ្សារនៅប៊ែរឡាំង កាលពីថ្ងៃចន្ទ ដែលជាតម្រ៉ុយបញ្ជាក់កាន់តែច្បាស់ថា អានីស អាមរី គឺជាជនដៃដល់ក្នុងការវាយប្រហារភេរវកម្មនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ