rfi

កំពុងផ្សាយ
  • ផ្សាយផ្ទាល់
  • នាទីព័ត៌មាន
  • RFI ជាភាសាបារាំង
ទស្សនៈព្រឹត្តិការណ៍ពិភពលោក
rss itunes

ប្រទេស​ដែលប្រព័ន្ធ​សុខាភិបាល​មាន​ និង​គ្មាន​ប្រសិទ្ធភាព​បំផុត​

ដោយ ឆន ឌីណា

ដើម្បី​​វាស់​វែង​ប្រសិទ្ធភាព​​នៃ​​ប្រព័ន្ធ​សុខាភិបាល​របស់​​​ប្រទេស​​មួយ ​គេ​អាច​​ប្រើ​ប្រាស់​​​ សន្ទស្សន៍​ប្រសិទ្ធភាពនៃ​​ការ​ថែទាំ​​សុខភាព​​ Bloomberg ​ដែល​ធ្វើ​ការ​​ប្រៀប​ធៀប​ អាយុកាល​រស់នៅ​ជា​មធ្យម​​របស់​មនុស្ស​ម្នាក់​ ធៀបជាមួយនឹង​​ ការ​ចំណាយ​​លើ​ការ​ថែទាំ​សុខភាព។ ​ហេតុអ្វី​ប្រព័ន្ធសុខាភិបាល​នៃប្រទេស​តូចមួយ ​តួយ៉ាង​​សិង្ហបុរី​ មាន​ប្រសិទ្ធភាព​ខ្ពស់​ខ្លាំង​​ ធៀបនឹងបណ្តាប្រទេសជឿនលឿន​ធំៗ​ផ្សេង​ទៀត?

យោង​តាម “សន្ទស្សន៍ប្រសិទ្ធភាពនៃការថែទាំសុខភាព Bloomberg” ឬ​ជា​ភាសា​អង់គ្លេស “Bloomberg Health-Efficiency Index” ដែល​បាន​ចេញ​ផ្សាយ​ កាល​ពី​ចុង​ឆ្នាំ​២០១៨នេះ ហុង​កុងនិង​សិង្ហបុរី ស្ថិត​នៅ​​ចំណាត់​ថ្នាក់​កំពូល ក្នុង​ចំណោម​ប្រទេស​ដែល​មាន​ប្រសិទ្ធភាព​ប្រព័ន្ធសុខាភិបាល​ខ្ពស់​បំផុត។

ដើម្បី​វាស់​វែង​ប្រសិទ្ធ​ភាព​​ជារួម សន្ទស្សន៍​នេះ​ប្រៀប​ធៀប អាយុ​កាល​រស់​នៅ​ជា​មធ្យម​​របស់​មនុស្ស​ម្នាក់ ធៀប​ជាមួយនឹង​ ការ​ចំណាយជាក់​ស្ដែង​លើ​ការ​ថែទាំ​សុខភាព និង​​ការ​ចំណាយសរុបជាមធ្យម ធៀប​នឹង​ ​ចំណូល​ជាតិ​សរុប​ប្រចាំ​ឆ្នាំ របស់​ប្រទេស​មួយ។ ជាឧទាហរណ៍ នៅ​ឆ្នាំ​២០១៨ សិង្ហបុរី​មាន​​​ចំណាត់​ថ្នាក់​លេខ​២ តាម​ពីក្រោយ ហុងកុង ដោយ​បាន​ចំណាយ​សម្រាប់​មនុស្ស​ម្នាក់ ជាមធ្យម​ ត្រឹម​តែប្រមាណ ២២៨០ដុល្លារ​អាមេរិក ឬ​ស្មើ​ប្រហែល ៤,៣​ភាគរយ ​នៃ​ចំណូល​ជាតិ​សរុប​ប្រចាំ​ឆ្នាំ ខណៈ​អាយុ​សង្ឃឹម​រស់​របស់​ពលរដ្ឋ​សិង្ហបុរីមាន​រហូត​ដល់ ៨២,៧​ឆ្នាំ ឯណោះ។

ផ្ទុយ​ទៅវិញ សហរដ្ឋអាមេរិក ស្ថិត​នៅ​លេខ​រៀង​ទី៥៤ ដោយ​ត្រូវ​ចំណាយថវិកា​​យ៉ាង​ច្រើន​ ​រហូតដ​ល់​ជិត ​មួយ​ម៉ឺន​ដុល្លារអាមេរិក (៩,៥៣៦ ដុល្លារអាមេរិក) ឬ​ស្មើ​ជាង ១៦,៨​ភាគរយ នៃ​ចំណូល​ជាតិ​សរុប ប៉ុន្តែ​អាយុ​សង្ឃឹម​រស់​ របស់​មនុស្ស​ម្នាក់ មាន​​ត្រឹម ៧៨,៧​ឆ្នាំ​ ប៉ុណ្ណោះ។

ក្នុង​ចំណោមបណ្តា​​ប្រទេស​ ដែល​មាន​ចំណាត់​ថ្នាក់​កំពូល​ទាំង​១០ ប្រាំ​​ប្រទេស​មក​ពី​តំបន់​​អាស៊ី រួម​មាន ហុង​កុង សិង្ហបុរី កូរ៉េខាង​ត្បូង ជប៉ុន និង​តៃវ៉ាន់។ ពីរ​ប្រទេស​មក​ពីតំបន់​អឺរ៉ុប រួមមាន អេស្ប៉ាញ និង​អ៊ីតាលី រីឯ ​បី​ប្រទេស​ផ្សេង​ទៀត មក​ពី​តំបន់​ផ្សេងៗ​ រួមមាន អ៊ីស្រាអែល អូស្រ្ដាលី និង​ អេមីរ៉ាត​អារ៉ាប់​រួម។

បារាំង​ស្ថិត​នៅ​ចំណាត់​ថ្នាក់​លេខ​១៦ ដោយ​ចំណាយ​ជា​មធ្យម​សម្រាប់​មនុស្ស​​ម្នាក់ ៤០២៦​​ដុល្លារអាមេរិក ឬ​ស្មើនឹង​ ១១,១​ភាគរយ​នៃ​ចំណូល​ជាតិ​សរុប ខណៈ​អាយុកាល​សង្ឃឹម​រស់​នៃ​ប្រជាជន​បារាំង​មាន​ដល់ ៨២,៣ ឆ្នាំ។

ហេតុ​អ្វី​​ប្រព័ន្ធ​សុខាភិបាល​នៃ​ប្រទេស​តូច​មួយ​ តួយ៉ាង​សិង្ហបុរី មាន​ប្រសិទ្ធភាព​ខ្ពស់​ម្ល៉េះ​ ធៀប​នឹង​បណ្តា​ប្រទេស​ជឿន​លឿន​ធំ​ៗ​ផ្សេង​ទៀត?

យោង​​តាម ​របាយការណ៍របស់សាលាគោលនយោបាយសាធារណៈ​លីក្វាន់​យូ នៃ​សាកល​​​វិទ្យា​ល័យ​ជាតិ​សិង្ហបុរី អាច​មាន​ហេតុ​ផល​ចម្បង​បី។

ហេតុ​ផល​ទីមួយ ពាក់​ព័ន្ធ​នឹង​សមតុល្យរវាង វិស័យ​សាធារណៈ និងឯកជន។ ខុសពី​ប្រព័ន្ធ​សុខា​ភិបាល​នៅ​បណ្តាភាគច្រើន​នៅ​អឺរ៉ុប ដែល​អ្នក​ជម្ងឺ​មិន​ចាំបាច់​បង់​ប្រាក់ សម្រាប់​​សេវាកម្ម​សុខភាព​ ក៏ប៉ុន្តែ​ពួកគេ​ត្រូវ​បង់​ពន្ធ​ខ្ពស់ នៅ​សិង្ហបុរីឯណោះវិញ ប្រព័ន្ធ​សុខាភិបាល​​ត្រូវ​រ៉ាប់រង​ ទាំង​ដោយ ក្រសួង​សុខាភិបាល​របស់​រដ្ឋាភិបាល និង​ថែម​ទាំង​ ពី​ប្រជាជនខ្លួន​ឯង និង​វិស័យ​ឯកជន ផង​ដែរ។ ទោះ​ជាយ៉ាង​ណា  គេអង្កេត​ឃើញ​មាន ​កំណែ​​ទម្រង់​ចម្បង​ៗ​ធ្វើ​ឡើងផងដែរ ​ជា​បន្ត​បន្ទាប់ ហើយ​វា​​ប្រែប្រួល​ អាស្រ័យ​ទៅតាម​​បរិបទ​នៃ​ដំណើរ​វិវ​ឌ្ឍ​ន៍​របស់​​សង្គម និង​ពិភពលោក​ទាំង​មូល។​​

ហេតុ​ផល​ទីពីរ ពាក់​ព័ន្ធនឹង ហិរញ្ញប្បទាន​ប្រកប​ដោយចីរភាព។ ដើម្បី​ធានា​បាន​ចីរភាព​នៃ​ប្រព័ន្ធ​ហិរញ្ញវត្ថុ​ក្នុង​វិស័យ​​សុខា​ភិបាល  រដា្ឋ​ភិបាល​បាន​អនុវត្តវិធីសាស្រ្ដ​ចម្រុះ ដូចជា វិធានការ​បង់​ពន្ធ​សម្រាប់​សេវា​​សុខភាព​សាធារណៈទូទៅ ការធានា​រ៉ាប់រង​ដល់​ពលរដ្ឋ​ក្រីក្រ ឬផែនការ​សន្សំ​ឯកជនសម្រាប់​ករណី​ថែទាំ​សុខភាព​ធ្ងន់ធ្ងរ ជាដើម។

និយាយ​ជារួម គឺការ​ថែទាំ​សុខភាព ត្រូវ​ពឹង​ផ្អែក​ពីម្ខាង​ដោយ​អន្តារគមន៍​របស់រដ្ឋ និង​ម្ខាង​ទៀត​ដោយ​ពលរដ្ឋ​ខ្លួនឯង។ វិធាន​ការ​ទាំង​នេះ​ធ្វើ​ឡើង​ដើម្បី បង្កភាព​ងាយ​ស្រួល​ ដល់​ការ​ថែទាំ​សុខភាព ជាពិសេស​សម្រាប់​ពលរដ្ឋក្រីក្រ និង​ដើម្បី​បង្ការ​ផ្នែក​សីលធម៌ ​កុំ​ឱ្យ​មាន​អ្ន​ក​ដែល​ព្យាយាម​កេង​ចំណេញ​ប្រើប្រាស់​សេវាថែទាំ ដោយ​មិន​ខ្វល់​ខ្វាយ​ថែទាំ​សុខភាព​​ខ្លួនឯង។

ហេតុ​ផល​ចុងក្រោយ​ ពាក់​ព័ន្ធនឹង ការ​ចាត់វិធាន​ការយ៉ាង​ខ្លាំង​ខ្លាលើ​បទបញ្ញត្តិនានា។ ទោះបីជា​មាន​ការ​លើកទឹកចិត្ត​ដល់​ការ​ប្រកួតប្រជែង​ នៅក្នុង​ទីផ្សា​សេរីក៏ដោយ ក៏​រដ្ឋាភិបាល​​​បាន​អន្តរាគមន៍​ដោយ​ធ្វើ​ការ​វិនិយោគ​លើ​តំបន់​ណា ដែល​បរាជ័យ​របស់​ទីផ្សារ​ បាន​រុញ​ច្រាន​ឱ្យ​តម្លៃ​នៃ​ការ​ថែទាំ​សុខភាព​មាន​តម្លៃ​ថ្លៃ​ជ្រុល សម្រាប់​ប្រជាពលរដ្ឋ​។ ដោយ​សារ​វិស័យសាធារណៈរបស់​សិង្ហបុរី​គ្រប​ដណ្តប់​ដោយ​ស្ថាប័ន​រដ្ឋ គេ​ក៏​ឃើញ​មាន​ផង​ដែរថា មាន​ការ​យក​ចិត្ត​ទុក​ដាក់​តិចតួច​ណាស់​ ដែល​ផល​ប្រយោជន៍​វិស័យ​ឯកជន​ត្រូវ​បាន​ការពារ៕

ហេតុអ្វី អាមេរិក​ចង់ទិញ​ដែនដី​ហ្ក្រូអេឡិន ពីដាណឺម៉ាក ?

ហេតុអ្វី​​អាមេរិក​ខ្វល់ខ្វាយ​ខ្លាំងម្ល៉េះពី​ជម្លោះ​រវាង​ជប៉ុន​និង​កូរ៉េខាងត្បូង​?

សករាជថ្មីមួយបានបើកឡើងហើយនៅស៊ូដង់ តែផ្លូវដែលត្រូវដើរឆ្ពោះទៅកាន់ប្រជាធិបតេយ្យពិតប្រាកដនៅវែងឆ្ងាយ

សេដ្ឋកិច្ច​វិនិយោគបារាំងអំឡុងពីរឆ្នាំក្រោមលោកម៉ាក្រុង

លោកត្រាំ និង បស្ចិមលោកជាទូទៅ នាំគ្នាអធិប្បាយ អំពី ការផ្ទុះនៅរុស្ស៊ី ពេលសាកល្បងមីស៊ីលធុនថ្មី

តើអ្វី​ជា​វិបត្តិ​បន្ទាប់​របស់​ហុងកុង​ នៅពេល​ដែល​ការប្រឆាំង​តវ៉ា​កាន់តែ​រីករាល​ដាលខ្លាំង​?

ចិន៖ ចូលរៀនសកលវិទ្យាល័យបរទេសល្បីៗ ទោះដោយវិធីណាក៏ដោយ

តើទីផ្សារប្រេងឆៅក្នុងលោកកំពុងស្ថិតមាត់ជ្រោះនៃវិបត្តិឬ?

ទីក្រុងល្អបំផុតសម្រាប់តុល្យភាពការងារនិងជីវិត

លោក ពូទីន​ ធ្វើសេច​ក្តីថ្លែង​ការណ៍​ពិសេស​ បន្ទាប់ពី​ស.រ.អា. ​បាន​ដក​ខ្លួន​ចេញ​ពី​សន្ធិសញ្ញា​ INF

ប្រទេស​ប៉ាពូ​អាស៊ី​ ស្នើ​ចិន​ឲ្យ​ជួយ​ដោះស្រាយ​បំណុល​សាធារណៈ​

ប្រាក់យ័នចិនធ្លាក់ថ្លៃអាចជាកត្តាថ្មីមួយទៀតជំរុញសង្រ្គាមពាណិជ្ជកម្មរវាងចិន និងសហរដ្ឋអាមេរិកឲ្យធ្លាក់ដុនដាបកាន់តែខ្លាំង

និស្សិតចិននៅបរទេស និងការអភិវឌ្ឍប្រទេស

មេប្រឆាំងរុស្ស៊ី ត្រូវគេ​បំពុល នៅក្នុង​ពន្ធនាគារ

ហេតុអ្វី​ការហោះកាត់​នៃ​អាចម៍ផ្កាយ ​Astroid 2019 OK ​ជារឿង​គួរឲ្យ​បារម្ភ ?

សន្និសីទី​អង្គការ ILO ស្តីពី​ការងារ និង​សុខុមាលភាព​នៅ​សតវត្សរ៍ទី២១

អង់គ្លេស ៖ លោកស្រីតេរ៉េហ្សា មេ បញ្ចប់​​តំណែង​​ដោយ​​បន្សល់​​ទុក​នូវ​​ស្នាដៃ​ដ៏​ស្តួចស្តើង

ហេតុអ្វី​ណាសា​មិនអាច​បញ្ជូន​មនុស្ស​ឲ្យ​ត្រឡប់​ទៅ​ចុះចត​លើ​ព្រះចន្ទ​ជិត​៥០ឆ្នាំ​កន្លងទៅនេះ?

ខួប​៧៥ឆ្នាំ៖ ធនាគារពិភពលោក និង​ស្ថាប័ន​រូបិយវត្ថុអន្តរជាតិ ជួប​ឧបសគ្គ​ថ្មី​និងច្រើន​បន្ថែមទៀត​

ចិនមានអ្វីៗគ្រប់យ៉ាងដើម្បីក្លាយខ្លួនជាមហាអំណាចផុតលេខ