ជំនួយមនុស្សធម៌ បានបញ្ជូនដល់តំបន់ហ្គូតា ប្រទេសស៊ីរីហើយ
ក្បួនរថយន្ត ដឹកជំនួយមនុស្សធម៌ របស់អង្គការសហប្រជាជាតិ បានចូលទៅដល់ភាគខាងកើតតំបន់ហ្គូតាហើយ នៅថ្ងៃចន្ទនេះ។ នេះជាលើកទី១ហើយ ដែលជនួយទាំងនោះអាចដឹកចូលតំបន់ ដែលមានផ្ទុះការវាយប្រហារ រវាងរដ្ឋាភិបាលស៊ីរី និង ក្រុមឧទា្ទម ចាប់តាំងពីការវាយប្រយុទ្ឋកើតមានឡើង កាលពីខែមុនមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
អង្គការសហប្រជាជាតិ បានឲ្យដឹងថា ក្បួនដឹកជំនួយមនុស្សធម៌របស់ខ្លួនចំនួន ៤៦ គ្រឿងបានចូលដល់តំបន់ហ្គូតាហើយ បន្ទាប់ពីកងទ័ពរបស់រដ្ឋាភិបាលស៊ីរី បានវាយដណ្តើម យកទឹកដីភាគខាងកើតនៃតំបន់ហ្គូតាចំនួន ១ភាគ៣ ពីក្រុមឧទ្ទាម។
តាមពិតទៅ ជំនួយនេះ អាចដឹកតាមច្រកមនុស្សធម៌ទៅដល់ស៊ីរីបាន ក៏ព្រោះតែប្រទេសលោកខាងលិច ក៏ដូចជាអង្គការសហប្រជាជាតិ បានដាក់ការគាបសង្កត់ជាខ្លាំងទៅលើរដ្ឋាភិបាលស៊ីរី និង រុស្សីដែលជាសម្ព័ន្ឋមិត្ត។ មិនតែប៉ុណ្ណោះ កាលពីថ្ងៃអាទិត្យម្សិលមិញនេះ អង្គការសហប្រជាជាតិ ថែមទាំងបានចេញសេចក្តីថ្លែងការណ៍មួយ រិះគន់រដ្ឋាភិបាលទីក្រុងម៉ូស្គូ ដែលមិនអើពើនឹងការអំពាវនាវរបស់ខ្លួន ឲ្យមានបទឈប់បាញ់នៅតំបន់ហ្គូតាទៀតផង។
គួរបញ្ជាក់ថា ប៉ុន្មានឆ្នាំចុងក្រោយនេះ ប្រជាជនស៊ីរីរស់នៅក្នុងតំបន់ហ្គូតាប្រមាណជា ៤ សែននាក់ ប្រកបរបរចិញ្ចឹមជីវិត តាមរយៈការរត់ពន្ឋទំនិញផ្សេងៗ ការធ្វើចម្ការ និងការទទួលជំនួយមនុស្សធម៌ដ៏តិចតួច។
ការិយាល័យ អង្គការសហប្រជាជាតិ សម្រាប់ការសម្របសម្រួលកិច្ចការមនុស្សធម៌ បានឲ្យដឹងថា ក្រុមការងាររបស់ខ្លួន បានប្រគល់ អាហារូបត្ថម្ភ ថ្នាំសង្កូវ ព្រមទាំងចំណីអាហារដល់ ប្រជាជនរងគ្រោះស៊ីរីចំនួន ២៧,៥០០ នាក់។
អង្គការសហប្រជាជាតិបានសម្រេចថា នឹងបញ្ជូនជំនួយបន្ថែមទៀត ឲ្យដល់ដៃជនស៊ីវិលស៊ីរី សរុបចំនួន ៧ ម៉ឺននាក់ ដែលកំពុងតែត្រូវការជំនួយយ៉ាងខ្លាំង នៅក្នុងតំបន់ហ្គូតា។
គួរជម្រាបជូនថា មានជនស៊ីវិលស៊ីរីសរុប ជាង ៧០០ នាក់ហើយ បានស្លាប់ ដោយសារតែកងទ័ពរដ្ឋាភិបាលស៊ីរី បើកប្រតិបត្តិការវាយប្រហារទាំងតាមផ្លូវអាកាស ការបាញ់កាំភ្លើងធន់ធ្ងន់ នៅហ្គូតា ចាប់តាំងពីពាក់កណ្តាលខែកុម្ភៈមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ