មហាសន្និបាតអង្គការសហប្រជាជាតិ បើកសម្ភោធជាមួយនឹងរឿងឈឺក្បាលច្រើនសំណុំ
ចុះផ្សាយនៅថ្ងៃ៖
ស្តាប់ - ០៨:៤៣
នៅថ្ងៃចន្ទ ទី១៨ កញ្ញានេះ អង្គការសហប្រជាជាតិ នឹងចាប់ផ្តើមបើកមហាសន្និបាតប្រចាំឆ្នាំរបស់ខ្លួន។ សម្រាប់លោក អគ្គលេខាធិការអង្គការសហប្រជាជាតិថ្មី អង់តូនីញ៉ូ ហ្គុតទែហ្ស ក៏ដូចជាលោក ប្រធានាធិបតីអាមេរិក ដូណាល់ ត្រាំ និងលោកប្រធានាធិបតីបារាំង អេម៉ានុយអែល ម៉ាក្រា មហាសន្និបាតនៃអង្គការកំពូលនេះ គឺជាលើកទីមួយហើយ សម្រាប់ថ្នាក់ដឹកនាំទាំង៣។ មានសំណុំរឿងស្មុគស្មាញជាច្រើន ដែលកំពុងរងចាំការពិភាក្សាគ្នា និងបង្ហាញគោលជំហរ មានដូចជាវិបត្តិនៅដើមបូព៌ា វិបត្តិនុយក្លេអ៊ែរកូរ៉េខាងត្បូង និងចុងក្រោយបំផុត គឺគំរោងធ្វើកំណែទម្រង់នៃអង្គការសហប្រជាជាតិ ផ្ទាល់តែម្តង។
លើកទីមួយសម្រាប់លោកហ្គុតទែហ្ស លោកម៉ាក្រុង និងលោកត្រាំ
មហាសន្និបាតនៃអង្គការសហប្រជាជាតិលើកនេះ គឺជាបទពិសោធន៍លើកទីមួយហើយ សម្រាប់មេដឹកនាំធំៗបីរូប គឺលោកអគ្គលេខាធិការអង្គការសហប្រជាជាតិផ្ទាល់ លោកដូណាល់ ត្រាំ និងលោកអេម៉ានុយអែល ម៉ាក្រុង។ ថ្នាក់ដឹកនាំថ្មីទាំងបីរូបនេះ ត្រូវតែធ្វើយ៉ាងណា យកឱកាសនេះ ដើម្បីបង្ហាញពីគោលជំហរ ព្រមទាំងអូសទាញប្រទេសសមាជិក អង្គការសហប្រជាជាតិទាំងអស់ ឲ្យគាំទ្រនូវគោលគំនិតទស្សនវិស័យរួមរបស់ខ្លួន ដើម្បីស្ថិរភាពពិភពលោកទាំងមូល។
លោកអេម៉ានុយអែល ម៉ាក្រុង ក្នុងនាមប្រធានាធិបតីបារាំង មិនមែនតំណាងតែបារាំងមួយទេចាប់ពីពេលនេះទៅ គឺតំណាងឲ្យសហភាពអឺរ៉ុបទាំងមូលតែម្តង។ ព្រោះថាក្នុងពេលដ៏ខ្លីខាងមុខ បន្ទាប់ពីអង់គ្លេសចេញពីសហភាពអឺរ៉ុបជាស្ថាពរ នោះគឺនៅសល់តែបារាំងមួយគត់ ដែលជាសមាជិកអឺរ៉ុប ហើយមានកៅអី និងសិទ្ធិវេតូ ក្នុងក្រុមប្រឹក្សាសន្តិសុខ។ នេះគឺជាការទទួលខុសត្រូវខ្ពស់ណាស់ សម្រាប់បារាំង។ ជាងនេះទៅទៀត លោកម៉ាក្រុង ក៏មានបំណង ធ្វើឲ្យបារាំង មានទួនាទីធំដុំឡើងវិញ នៅក្នុងសំណុំរឿងអន្តរជាតិទាំងឡាយ មិនត្រូវស្ងាត់ស្ងៀម ចាំស្តាប់តែគេអូសទាញ ដូចប៉ុន្មានឆ្នាំមុនទេ។
សម្រាប់លោកអង់តូនីញ៉ូ ហ្គុតទែហ្សវិញ គឺថាឱកាសនេះ វាហួសពីសំខាន់ទៅទៀត ក្នុងនាមលោកជាអគ្គលេខាធិការអង្គការកំពូលនេះ។ លោកត្រូវតែយកឱកាសនេះ ដើម្បីបង្ហាញពីភាពជាអ្នកដឹកនាំរបស់លោក ព្រមទាំងត្រីវិស័យក្នុងការដឹកនាំអង្គការនេះ ឲ្យកាន់តែមានប្រសិទ្ធិភាពខ្ពស់។ លោក ហ្គុតទែហ្ស ហួសពីដឹងទៅទៀត ថា អង្គការសហប្រជាជាតិ ត្រូវគេរិះគន់ច្រើនណាស់ ហើយអ្នកដែលចេញមុខស្រែករិះគន់ខ្លាំងៗជាងគេនោះ គឺលោកដូណាល់ ត្រាំ តែម្តង។
លោកដូណាល់ ត្រាំរិះគន់មកលើអង្គការសហប្រជាជាតិ មិនដែលតមមាត់ទេ តាំងតែពីក្នុងកំឡុងពេលឃោសនាបោះឆ្នោតម្លេះ។ គាត់ធ្លាប់បាននិយាយថា នៅអង្គការសហប្រជាជាតិជាកន្លែងស្រណុក ដេកស្រួល ស៊ីស្រួលណាស់ គ្មានធ្វើអ្វីឲ្យបានជាកើតការទេ។ ឥឡូវពេល ពេលនេះ លោកដូណាល់ ត្រាំ ត្រូវប្រឈមមុខ និងមហាសន្និបាទតនៃអង្គការ ដែលខ្លួនធ្លាប់បាននិយាយរិះគន់។
ចំពោះដំណើរការទូទៅ នៃមហាសន្និបាទនេះវិញ គឺថា ចាប់ពីថ្ងៃអង្គការស្អែកទៅ ទើបប្រទេសសមាជិកទាំង១៩៤ប្រទេស នឹងធ្វើសេចក្តីថ្លែងការម្តងម្នាក់ៗ ក្នុងរយៈពេល១សប្តាហ៍។ ហើយចុងក្រោយ នឹងមានការធ្វើសេចក្តីថ្លែងការរួម នៃអង្គមហាសន្និបាតទាំងមូលតែម្តង។ ក្រៅពីនេះ គឺមានជំនួបទ្វេរភាគី រវាងថ្នាក់ដឹកនាំនានា ដើម្បីនិយាយគ្នាពីសំណុំរឿងផ្សេងៗ។ តែនៅថ្ងៃចាប់ផ្តើម គឺថ្ងៃចន្ទនេះតែម្តង វេលាម៉ោង២រសៀល នឹងមានពិធីមួយ ដែលលោកដូណាល់ត្រាំ ប្រធានាធិបតីអាមេរិក ធ្វើជាអធិបតី។ លោកដូណាល់ ត្រាំ និងត្រូវថ្លែងសារបើកកម្មវិធី បន្ទាប់មកលោកស្រីទូតអាមេរិក ប្រចាំអង្គការសហប្រជាជាតិ មុននឹងបិទបញ្ចប់ដោយសន្ទរកថារបស់លោក អង់តូនីញ៉ូ ហ្គុតទែហ្ស។
កាត់បន្ថយថវិកាចំណាយ របស់អង្គការសហប្រជាជាតិ
លោកដូណាល់ ត្រាំ ដែលធ្លាប់តែរិះគន់អង្គការសហប្រជាជាតិនោះ មានគំរោងថានឹងស្នើផែនការកំណែទម្រង់មួយ ទៅអង្គការនេះ នៅក្នុងឱកាសមហាសន្និបាតនេះ។ រដ្ឋាភិបាលលោកដូណាល់ ត្រាំ អះអាងថា គម្រោងគេ គឺការកាត់បន្ថយថវិកាចំណាយ ឲ្យបានច្រើន។ លោកត្រាំ ចង់ឲ្យអង្គការសហប្រជាជាតិ ធ្វើការឲ្យរហ័ស មានប្រសិទ្ធិភាព តែត្រូវតែចំណាយប្រាក់តិចបំផុត។ ផែនការលោកដូណាល់ ត្រាំ គឺនឹងកាត់បន្ថយថវិកាចំណាយ នៅក្នុងបេសកម្មរក្សាសន្តិភាព របស់អង្គការសហប្រជាជាតិ ព្រមទាំងកាត់បន្ថយថវិកាចំណាយក្នុងដំណើរការទូទៅនៃអង្គការនេះ។
ផែនការកំណែទម្រង់ដែលសំដៅតែក្នុងបញ្ហាថវិកានេះ ត្រូវបានគេរិះគន់ច្រើនណាស់ ជាពិសេសពីសំណាក់បារាំង។ ទីមួយបើគ្មានប្រាក់ គឺគេនឹងបង្ខំចិត្ត កាត់បន្ថយចំនួនបេសកកម្ម ។ ទីពីរ បេសកកម្មនឹង លែងមានប្រសិទ្ធិភាព ឆ្លើយតបទៅនឹងស្ថានភាពជាក់ស្តែង ដោយសារតែគ្មានប្រាក់ចំណាយគ្រប់គ្រាន់។ ជាក់ស្តែង បេសកកម្មរបស់ឧត្តមស្នងការ ទទួលបន្ទុកជនភៀសខ្លួន នឹងលែងអាចដំណើរបានទៀតហើយ បើសិនជាគេកាត់ថវិការួម ដល់ទៅពាក់កណ្តាល។ ជារួម គឺលោកត្រាំ គិតធ្វើយ៉ាងណា ចំណាយប្រាក់ឲ្យតិច ដោយមិនខ្វល់ថាចាំបាច់ឬមិនចាំបាច់ទេ។ ចំណុចនេះគឺវាផ្ទុយពីគោលការណ៍គ្រិះនៃអង្គការកំពូលនេះ ដែលផ្តោតចំបង លើការរក្សាសន្តិភាព មិនមិនលើចំនួនទឹកប្រាក់ដែលត្រូវចំណាយទេ។
ចំណែកលោក អង់តូនីញ៉ូ ហ្គុតទែហ្សវិញ មានគំរោងធ្វើកំណែទម្រង់ដែរ តែផ្តោតសំខាន់ ទៅលើការចំណាយ ក្នុងដំណើរការទូទៅ នៃអង្គការនេះ មិនមែន ទៅលើការចំណាយ ក្នុងបេសកកម្មរក្សាសន្តិភាពទេ។ និយាយរួម គឺសន្សំសំចៃ ចាយលុយឲ្យត្រូវ តែមិនត្រូវធ្វើឲ្យខូចដល់ប្រសិទ្ធិភាព នៃបេសកកម្មរក្សាសន្តិភាពឡើយ។ ហើយបើតាមការឲ្យដឹង លោកហ្គុតទែហ្ស ក៏មានបំណងចង់ឲ្យ ថវិកាចំណាយក្នុងដំណើរការទូទៅ ត្រូវសម្រេចអនុម័ត១ឆ្នាំម្តង មិនមែន២ឆ្នាំម្តងដូចបច្ចុប្បន្ននេះទេ។ ហើយគំរោងចំណាយ ត្រូវតែចុះក្នុងឯកសារតែមួយ មិនមែនរាយប៉ាយ ច្រើនឯកសារដូចរាល់ថ្ងៃនេះ ដែលបង្កជាការស្មុញស្មាញដល់ការគ្រប់គ្រងខ្ទង់ចំណាយ។
តែយ៉ាងណា មន្ត្រីមួយចំនួន បានលើកឡើងថា គំរោងកំណែទម្រង់ របស់លោក ហ្គុតទែហ្ស មិនខុសគ្នាណាប៉ុន្មាន ពីគំរោងរបស់លោកដូណាល់ ត្រាំទេ។ យ៉ាងណាមិញ លោកស្រី នីគី ហាកឡី អគ្គរដ្ឋទូតអាមេរិកប្រចាំអង្គការសហប្រជាជាតិបាននិយាយថា មានប្រទេសច្រើនណាស់ ដែលបានចុះហត្ថលេខា គាំទ្រគំរោងរបស់រដ្ឋាភិបាលអាមេរិក។ គេកំពុងតែរងចាំ តាមដានអំពីគោលជំហររបស់រុស្ស៊ី និងគោលជំហររបស់ចិន ទាក់ទិនទៅនឹងផែនការកំណែទម្រង់ទាំងពីរនេះ។
ស៊ីរី កូរ៉េខាងជើង អ៊ីរ៉ង់ អាកាសធាតុ…សុទ្ធតែបញ្ហា!
ផ្តើមដំបូងនិយាយពីគោលជំហររួមរបស់បារាំង គឺលោកម៉ាក្រុង មានចេតនាយកឱកាសនេះ ដើម្បីផ្សព្វផ្សាយពីទស្សនវិស័យរបស់បារាំង ដែលចង់ឃើញពិភពលោកយើង រួមគ្នាការពារលើកស្ទួយ “ទ្រព្យសម្បត្តិរួមរបស់មនុស្សជាតិ”។ ទ្រព្យសម្បតិ្តរួមរបស់មនុស្សជាតិ ដែលបារាំងចង់សំដៅនោះ គឺលទ្ធិប្រជាធិបតេយ្យ សិទ្ធិសេរីភាព ព្រមទាំងការថែរក្សាការពារភពផែនដី ធនធានបរិស្ថានធម្មជាតិនេះតែម្តង។ មានប្រទេសជាជ្រើន ដែលគាំទ្រ ការផ្តួចផ្តើមរបស់បារាំង ហើយគេសង្ឃឹមថា លោកប្រធានាធិបតីវ័យក្មេងរបស់បារាំង អាចនឹងបញ្ចុះបញ្ជូលលោកដូណាល់ ត្រាំបានទៅចុះ។
ទាក់ទិននឹងសំណុំរឿងនុយក្លេអ៊ែរអ៊ីរ៉ង់ លោកដូណាល់ត្រាំ និងលោកម៉ាក្រុង នឹងជួបមួយទល់នឹងមួយ ជាមួយលោកហាសាន់ រ៉ូហានី ប្រធានាធិបតីអ៊ីរ៉ង់។ បារាំង និងអាមេរិក មានជំហរខុសគ្នា ជុំវិញសំណុំរឿងអ៊ីរ៉ង់នេះ។ លោកត្រាំ នៅតែរឹងទទឹង មិនចង់ដកទណ្ឌកម្មចេញពីអ៊ីរ៉ង់ទេ ដោយចោទអ៊ីរ៉ង់ថា មិនបានគោរពកិច្ចព្រមព្រៀងនុយក្លេអ៊ែរ។ តែចំណែកបារាំង ក៏ដូចជាប្រទេស៤ផ្សេងទៀត ដែលជាភាគីហត្ថលេខីនៃកិច្ចព្រមព្រៀងនេះ គឺបន្តជំរុញលើកទឹកចិត្តអ៊ីរ៉ង់ ខុសពីលោកត្រាំ ដែលបន្តគំរាម។
ដោយឡែកសំរាប់សំណុំរឿងនុយក្លេអ៊ែរកូរ៉េខាងជើង គឺគេនឹងឈរលើការដាក់ទណ្ឌកម្មដដែល។ កាលពីសប្តាហ៍មុន អាមេរិក បានស្នើឲ្យបិទ មិនឲ្យនាំចូលទាំងស្រុង នូវប្រេងឥទ្ធនៈ និងឧស្ម័នធម្មជាតិ ទៅឲ្យកូរ៉េខាងជើង។ តែចុងក្រោយ ក្រុមប្រឹក្សាសន្តិសុខ បានសម្រេច កាត់បន្ថយការនាំចូល ដោយមិនបិទទាំងស្រុងទេ។ ហើយបើតាមការគ្រោងទុក ក្រុមប្រឹក្សាសន្តិសុខ នឹងជួបប្រជុំគ្នាម្តងទៀត នៅថ្ងៃព្រហស្បតិ៍ខាងមុខនេះ។
ចុងក្រោយបង្អស់ គឺសំណុំរឿងស៊ីរី ដែលសំខាន់ នឹងបន្ទាន់បំផុត។ ៦ឆ្នាំហើយដែលសង្រ្គាមបានផ្ទុះឡើង ហើយដែលអង្គការសហប្រជាជាតិ មិនអាចធ្វើអ្វីបានទាំងអស់ ក្រៅពីឱបដៃមើលទាំងអស់សង្ឃឹម។ តាមការឲ្យដឹង ផែនការថ្មី គឺគេនឹងបង្កើតក្រុមការងារពិសេសមួយ ដោយមានការចូលរួម ពីប្រទេសមហាអំណាចទាំង៥។ រដ្ឋមន្ត្រីក្រសួងការបរទេសនៃប្រទេសទាំង៥នេះ នឹងបើកការប្រជុំនៅថ្ងៃពុធ។
មន្ត្រីទូតបារាំងមួយចំនួន បានលើកឡើងថា ក្រុមការងារពិសេសនេះ នឹងអនុញ្ញាតឲ្យគេអាចដោះដូរយោបល់ ហើយឈានទៅនិយាយគ្នានៅហ្សឺណែវ អំពីគម្រោងផែនការសន្តិសភាព ដំណោះស្រាយនយោបាយ សម្រាប់ស៊ីរី។ តាមពិតទៅ គំនិតដំបូងនោះ គឺគេបាន សំណូមពរ ឲ្យរាប់បញ្ជូលទាំងប្រទេសមួយចំនួននៅជាប់ស៊ីរី ទៅក្នុងក្រុមការងារនេះផង ដូចជាតួកគី ហ្សកដានី អារ៉ាប៊ីសាអូឌីត និងអ៊ីរ៉ង់ជាដើម។ ក៏ប៉ុន្តែអាមេរិក បានប្រឆាំងដាច់ខាតនឹង គម្រោងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ