បារាំងនិងចិន ចុះកិច្ចព្រមព្រៀងពាណិជ្ជកម្មទ្វេភាគី ទឹកប្រាក់ជាង១៥ពាន់លានអឺរ៉ូ
ចុះផ្សាយនៅថ្ងៃ៖
ដំណើរទស្សនកិច្ចផ្លូររដ្ឋរបស់ប្រធានាធិបតីបារាំងនៅស្រុកចិន បានចប់ហើយនៅថ្ងៃទី៦វិច្ឆិកា និងបានផ្តល់ផលផ្លែផ្កាច្រើនសម្បើមមិនធ្លាប់មាននៅក្នុងប្រវត្តិសាស្ត្រនៃទំនាក់ទំនងរបស់ប្រទេសទាំងពីរ។ តាមរយៈអន្តរាគមន៍របស់ប្រធានាធិបតី អេម៉ាណុអេល ម៉ាក្រុង, ប្រទេសបារាំងនិងចិន បានបោះដៃរកគ្នាយ៉ាងខ្លាំងអស្ចារ្យ ដើម្បីរកទីផ្សារបន្ថែមទៀតឱ្យសហភាពអឺរ៉ុបនិងប្រទេសបារាំងរបស់ខ្លួនឯង។ បារាំងសម្រេចចុះកិច្ចសន្យាជាង៤០ និងបានសន្យាចុះកុងត្រារកស៊ីជាមួយចិន លើវិស័យជាច្រើនប្រភេទ ដែលមានតម្លៃទឹកប្រាក់រាប់សិបលានអឺរ៉ូ។ តាមការបញ្ជាក់ពីភាគីចិន គឺកិច្ចសន្យាទ្វេភាគី មានចំនួនជា១៥ពាន់លាន ដែលចុះកុងត្រាហើយ ប៉ុន្តែ នៅច្រើនពាន់លានទៀត ដែលកំពុងចរចាចុះកុងត្រាបន្ត (អាចដល់៥០ពាន់លានអឺរូ)។ចិនវិញ ត្រូវការបារាំងនិងអឺរ៉ុប ដើម្បីពង្រីកទីផ្សាររបស់ខ្លួន ខណៈដែលមានភាពរអាក់រអួលខ្លះក្នុងការនាំផលិតផលចេញ នៅពេលដែលមានជម្លោះពាណិជ្ជកម្មជាមួយអាមេរិក។ នៅពេលនេះ ចិនទុកចិត្តបារាំងខ្លាំង ដោយក្រុងប៉េកាំង បានសម្រេចប្រកាសដាក់លក់«មូលបត្របំណុល»ជាប្រាក់អឺរ៉ូ ជាលើកទី១ នៅរដ្ឋធានីបារីស៍ ប្រទេសបារាំងតែម្តង។
លទ្ធផលច្រើនណាស់ ផ្នែកពាណិជ្ជកម្ម
ប្រធានាធិបតីបារាំង អេម៉ាណុអេល ម៉ាក្រុងបាននាំប្រធានក្រុមហ៊ុនសហគ្រាសធំៗ តាំងពីផ្នែកទឹកអប ស្រា យន្តហោះ និងថាមពល ព្រមទាំងមន្ត្រីរបស់សហភាពអឺរ៉ុបផង ទៅជាមួយលោក។ ជាលទ្ធផល ភាគីក្រុមហ៊ុននៃប្រទេសទាំងពីរ បានសម្រេចចុះកុងត្រារកស៊ី ៤០កិច្ចសន្យា ដែលមានទឹកប្រាក់វាលលានអឺរ៉ូ។ បើតាមកាសែតផ្លូវការចិន កុងត្រារកស៊ីទាំងឡាយនេះ អាចមានរង្វង់ទឹកប្រាក់ ជាង៥១ពាន់លានអឺរ៉ូ។
ប្រធានាធិបតីបារាំងទៅស្រុកចិនលើកទី២នេះ លោក ម៉ាក្រុងសប្បាយចិត្តខ្លាំងណាស់ ព្រោះគាត់បានបញ្ចុះបញ្ចូលថ្នាក់ដឹកនាំចិននិងក្រុមហ៊ុនចិនជាច្រើន។ កុងត្រាលក់ទំនិញកសិកម្មបារាំងជាច្រើនណាស់ ត្រូវបានចុះកិច្ចព្រមព្រៀងក្នុងឱកាសនេះ គឺរាប់តាំងពីស្រាក្រហមបារាំង មានច្រើនប្រភេទនិងច្រើនប្រភព, ហ្វូម៉ាសបារាំង ឬឈីស, ពិសេសសាច់ជ្រូកបារាំង ដែលមានការផលិតច្រើនបែបច្រើនយ៉ាងណាស់។ មិនតែប៉ុណ្ណោះ និងហាក់ដូចជាជំនួសមុខឱ្យសហភាពអឺរ៉ុបអ៊ីចឹង ដែលក្នុងដំណើរទស្សនកិច្ចរបស់ប្រមុខរដ្ឋបារាំង, សហភាពអឺរ៉ុបនិងចិន ក៏បានសម្រេចចុះកិច្ចព្រមព្រៀងជាមួយគ្នា ដើម្បីបញ្ជាក់ពីផលិតទំនិញសម្គាល់ភូមិសាស្ត្រ (សូចនាករភូមិសាស្ត្រការពារIGP) គឺជាបញ្ជាក់ពីទំនិញអឺរ៉ុបនៅស្រុកចិន ដល់ទៅជាង១០០មុខ ហើយប៉ុន្មានឆ្នាំក្រោយ និងនឹងត្រូវបញ្ចូលរាប់រយមុខទំនិញបន្ថែមទៀត។
មូលបត្របំណុលចិន លក់នៅប៉ារីស ចំនួន៤ពាន់លានអឺរ៉ូ
ចិនបានទុកចិត្តបារាំងខ្លាំងមែនទែន! មហាយក្សចិនបានប្រកាសយកក្រុងប៉ារីស ជាទីតាំងសម្រាប់ប្រកាសលក់មូលបត្របំណុល ជាសាច់ប្រាក់អឺរ៉ូ។ នេះជាលើកទី១នៅក្នុងប្រវត្តិសាស្ត្រ។ មូលបត្របំណុលចិន នេះ មានរង្វង់ទឹកប្រាក់៤ពាន់លានអឺរ៉ូ។
ចិនប្រកាសគាំទ្រពេញទំហឹងចំពោះកិច្ចព្រមព្រៀងស្តីពីអាកាសធាតុក្រុងប៉ារីស
សំណុំរឿងនេះ ក្តៅខ្លាំង! ខណៈដែលអាមេរិករបស់លោក ដូណាល់ ត្រាំ សម្រេចផ្តើមនីតីវិធីដកខ្លួនជាផ្លូវការចេញពីកិច្ចព្រមព្រៀងអាកាសធាតុក្រុងប៉ារីស នៅក្នុងសប្តាហ៍នេះ, ប្រទេសចិនវិញ និងជាថ្មីម្តងទៀត ចិនប្រកាសជំហរគាំទ្រយ៉ាងពេញទំហឹងកិច្ចព្រមព្រៀងអាកាសធាតុ ដែលប្រទេសបារាំងដើរតួសំខាន់ បញ្ចុះបញ្ចូលប្រទេសលើលោក ឱ្យចូលរួមគិតគូរពីផែនដី។
ជុំវិញរឿងបរិស្ថាននេះដែរ តែវាអាចចូលរឿងរកស៊ីផងដែរ! ប្រទេសបារាំងនិងចិន បានយល់ព្រមគ្នា ចរចាសម្រេចសាងសងរោងចក្រសម្អាតកាកសំណល់វិទ្យុសកម្ម នៅស្រុកចិន។ សំណុំរឿងនេះ បារាំងចិនជជែកចរចាគ្នា អស់ជាង១០ឆ្នាំមកហើយ។ ក៏ប៉ុន្តែពេលនេះ ភាគីទាំងពីរសម្រេចថា ត្រូវបញ្ចប់ការចរចា ត្រឹមខែមករា២០២០ ហើយចាប់ផ្តើមសាងសង់រោចចក្រតែម្តង។ រោងចក្រសម្អាតកាកសំណល់វិទ្យុសកម្ម នៅស្រុកចិន នឹងត្រូវសាងសង់ដោយក្រុមហ៊ុនបារាំង។ កិច្ចសន្យានេះ មានទឹកប្រាក់២០ពាន់លានអឺរ៉ូ។
ប្រទេសចិន ជាប្រទេសនាំមុខទី១លើលោក ខាងបញ្ជាទិញគ្រឿងគ្រៅសម្រាប់ដំណើរការផលិតថាមពលនុយក្លេអ៊ែរស៊ីវិល។ ចិន មានក្បាលម៉ាស៊ីនរ៉េអាក់ទ័រនុយក្លេអ៊ែរ ចំនួន៤៨ និង១០ផ្សេងទៀត កំពុងតែសាងសង់បន្ថែម។
ផ្នែកវប្បធម៌ តើរដ្ឋទាំងពីរនឹងសហការយ៉ាងណាខ្លះ?
តាំងពីថ្ងៃទី១នៃដំណើរទស្សនកិច្ចរបស់លោក ម៉ាក្រុងនៅស្រុកចិន សោភ័ណក៏ជ្រាបស្រាបដែរថា បារាំងបើកសម្ពោធមជ្ឈមណ្ឌលវប្បធម៌បារាំង George Pompidou នៅក្រុងសៀងហៃ។ នេះជាលើកទី១មួយ ដែលចិនអនុញ្ញាតឱ្យមានមជ្ឈមណ្ឌលវប្បធម៌អឺរ៉ុបយ៉ាងដូច្នេះ នៅលើទឹកដីចិន។ បារាំងរីករាយសប្បាយចិត្ត ដ្បិតថានេះក៏ជាលើកទីមួយដែរ ដែលមជ្ឈមណ្ឌលវប្បធម៌បារាំង George Pompidou បានពង្រីកសាខានៅអាស៊ី ក្នុងទឹកដីចិននេះតែម្តង។ បារាំងថែមទាំងសន្យាឱ្យចិនខ្ចីផ្ទាំងគំនូរនិងស្នាដៃសិល្បៈ ដែលតម្លៃរាប់លានអឺរ៉ូ យកទៅតាំងពិព័រណ៍ទៀតផង។ រូបគំនូរខ្លះ ក៏នឹងមានស្នាដៃរបស់វិចិត្រករលំដាប់ពិភពលោក ដូចជាគំនូររបស់ Picaso ជាដើម។
លើសពីនេះទៀត ក្នុងផ្នែកវប្បធម៌សិល្បៈទី៧របស់បារាំង, សមិទ្ធករភាពយន្តឆ្នើមៗ ផលិតករកុនបារាំងល្បីៗ ក៏បានប្រកាសបោះគោលដៅ ទៅថតកុននៅស្រុកចិនរឹងរឹតតែច្រើនថែមទៀតផងដែរ នៅឆ្នាំ២០២០។ វិមានប្រធានាធិបតីបារាំងអេលីហ្សេ ក៏បញ្ជាក់ដែរថា ចិនគឺនឹងត្រូវដាក់ជាគោលដៅអភិវឌ្ឍន៍ទេសចរណ៍វប្បធម៌ របស់បារាំង នៅឆ្នាំ២០២១។
បារាំងសម្តែងក្តីបារម្ភចំពោះសំណុំរឿងហុងកុង
នៅលើក្រដាស និងព័ត៌មានផ្លូវការ នៅមុនពេលដំណើរទស្សនកិច្ចរបស់ប្រមុខរដ្ឋបារាំង គឺវិមានប្រធានាធិបតី បង្ហើបថា លោកអេម៉ាណុយ អែលម៉ាក្រុង នឹងលើកយកសំណុំរឿងបាតុកម្មនៅហុងកុង ព្រមទាំងរឿងរំលោភបំពានសិទ្ធិជនជាតិភាគតិចអ៊ុយហ្គួរ ទៅនិយាយដោយស្មោះស្មើចំពោះមុខថ្នាក់ដឹកនាំចិន។ នៅមុនពេលដំណើរទស្សនកិច្ច លោក ម៉ាក្រុង ខ្លួនឯង ក៏បញ្ចាក់ប្រាប់អ្នកកាសែតបារាំងដែរថា នឹងរឿងទាំងនេះ ដោយត្រង់ទៅត្រង់មក ជាមួយប្រមុខរដ្ឋចិន។
ទីបំផុត លោក ម៉ាក្រុង បានប្រកាសដល់អ្នកកាសែតតែម្តង ក្នុងសន្នីសីទសារព័ត៌មាន ជុំវិញការបូកសរុបលទ្ធផលទស្សនកិច្ចរបស់លោកទៅស្រុកចិន។ ប្រធានាធិបតីបារាំង ថាលោកពិតជាបានលើកយករឿងហុងកុង ទៅនិយាយជាមួយលោក ស៊ី ជីនពីង ពិតមែន ដោយប្រមុខរដ្ឋបារាំង ស្នើសុំឱ្យភាគីចិននិងហុងកុង ចរចាគ្នា។ តាមសម្តីលោកម៉ាក្រុង, គឺលោកបានសម្តែងក្តីបារម្ភផ្ទាល់ខ្លួន ក្នុងនាមប្រទេសបារាំង និងក្នុងនាមសហភាពអឺរ៉ុប ចំពោះស្ថានការណ៍នៅហុងកុង។ លោក ម៉ាក្រុង ក៏បានទទូចនិងជំរុញឱ្យលោក ស៊ី ជីនពីង បើកការសន្ទនាជាមួយបាតុករហុងកុង ហើយចំពោះប្រមុខរដ្ឋបារាំង, ការជជែកសន្ទនាគ្នានេះ គឺជារឿងចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ