អ៊ីតាលី

ពិព័រណ៍សកលបើកយុទ្ធនាការប្រឆាំងនឹងភាពខ្ជះខ្ជាយចំណីអាហារ

ទន្ទឹមនឹងការផ្តោតចំណាប់ខ្លាំងទៅលើការរក្សាសន្តិសុខចំណីអាហារ ពិព័រណ៍សកលមីឡង់ ក៏ជាឱកាសមួយនៃការទាញចំណាប់មនុស្សលោកទូទៅឱ្យបានយល់អំពីភាពខ្ជះខ្ជាយ។ ក្រៅអំពីការផ្តើមគំនិតដោយប្រទេសម្ចាស់ផ្ទះអ៊ីតាលី បារាំងនិងស្វីស ផ្ទះពិព័រណ៍តូចមួយនៅក្នុងចំណោមផ្ទះជាច្រើន ដែលប្រទេសឬអង្គការនីមួយៗបានសម្អិតសម្អាង ស្របតាមប្រធានបទធំរបស់ពិព័រណ៍ មានសរសេរអក្សរលម្អធំៗ អំពីចំនួនតួលេខនៃការខ្ជះខ្ជាយអាហារនៅលើពិភពលោក។

ចុះផ្សាយនៅថ្ងៃ៖ 07/10/2015 - 15:33

ដោយ៖ អៀង សុខម៉ិញ

ផ្សាយពាណិជ្ជកម្ម

២៨%នៃផ្ទៃដីកសិកម្ម នៅលើពិភពលោក ជាការដាំដុះផលិតចំណីអាហារសម្រាប់ចាក់ចោល ឬបាត់បង់ដោយភាពខ្ជះខ្ជាយ ! នេះជាអ្វីដែលគេអាចអាននៅលើជញ្ជាំងខាងមុខនៃផ្ទះពិព័រណ៍។ ហើយនៅខាងក្នុង មានតាំងវត្ថុ និងផលិតផលដែលគេគ្រវាត់ចោល។

វាពិតជាគួរឱ្យសោកស្តាយខ្លាំងណាស់ នៅពេលបានឃើញតួលេខបញ្ជាក់អំពីភាពខ្ជះខ្ជាយចំណីអាហារ និងចំនួនប្រជាជនជាពិសេសកុមារបន្តជួបគ្រោះទុរភិក្ខ ក្នុងសតវត្សរ៍ទី២១នេះ។

ម្យ៉ាងវិញទៀត ការបាត់បង់ខ្ជះខ្ជាយនេះ បានបំផ្លាញបរិស្ថានយ៉ាងខ្លាំង ដោយបានបញ្ចេញឧស្ម័នកាបូនិកពុលទំហំប្រមាណជា ៣.៣ពាន់លានតោន ពោលគឺបើគិតជាប្រទេសវិញ សំណល់ចំណីអាហារខ្ជះខ្ចាយនេះ ជាអ្នកបញ្ចេញឧស្ម័នបំពុលបរិយាកាសខ្លាំងទីបីបន្ទាប់ពីចិន និងសហរដ្ឋអាមេរិក។ ភាពខ្ជះខ្ជាយអាហារនិងកសិកម្មនេះ មានកាន់តែខ្លាំងនិងច្រើន ជាងគេនៅសហរដ្ឋអាមេរិក ប្រទេសដែលមានប្រភពកសិកម្មខ្លាំងជាងគេមួយនៅលើពិភពលោក។

សហការជាមួយអង្គការស្បៀងអាហារពិភពលោក មហាវិទ្យាល័យមីឡង់របស់អ៊ីតាលី ជាម្ចាស់ផ្ទះព្រមទាំងបារាំង និងស្វីសជាដើម។ល។ បានប្រើវេទិកាពិព័រណ៍សកលមីឡង់ សម្រាប់បំផុសមតិសាធារណៈឱ្យបានយល់ដឹង និងរិះរកមធ្យោបាយប្រយុទ្ធប្រឆាំងនឹងភាពខ្ជះខ្ជាយដែលអាចគំរាមកំហែងយ៉ាងខ្លាំងដល់សន្តិសុខចំណីអាហារ ទៅថ្ងៃអនាគត ព្រមទាំងបានស្នើផ្តល់ជាគំនិត បែបសាមញ្ញ ជាក្បួនធ្វើម្ហូបបន្លែបន្លុកសេសសល់ ដល់ការរិះគន់ប្រសិទ្ធិភាពនៃប្រព័ន្ធឧស្សាហកម្មចំណីអាហារ ពីការផលិតដល់ការចែកចាយ។

សូមបញ្ជាក់ថា ការខ្ជះខ្ចាយចំណីអាហារ ត្រូវបានពិភពលោកទទួលស្គាល់ថា ជាចំណែកនាំឱ្យមានការប្រែប្រួលអាកាសធាតុ។ អង្គការសហប្រជាជាតិ ដែលគ្មានទម្លាប់អញ្ជើញភ្ញៀវមកពីក្រៅទទួលទានអាហារសោះ នាឱកាសធ្វើមហាសន្និបាតបានរៀបចំអាហារថ្ងៃត្រង់ទទួលថ្នាក់ដឹកនាំប្រទេសពិភពលោក នាំមុខដោយប្រធានាធិបតីបារាំង នូវមុខម្ហូបធ្វើសំណល់ បន្លែផ្លែឈើដែលធម្មតាចុងភៅបោះចោល៕